Mapan iti linaonna

Mapan iti listaan dagiti linaonna

Agserbi ken Jehova, Saan a ni Satanas

Agserbi ken Jehova, Saan a ni Satanas

Amintayo ket addaan ti panagpili. Mabalin nga agserbitay ken Jehova wenno agserbitay ken Satanas ken dagiti demoniona. Ditay mabalin nga aramiden nga agpadpada. Anian a nainsiriban ti agserbi ken Jehova!

Ni Jehova ket Naimbag

Kas nakitatayon, pagragsakan dagiti demonio a saktan ken allilawen dagiti tattao. Saan a kasta ni Jehova. Ay-ayatenna ti sangatauan a kas ti maysa nga ama nga ay-ayatenna dagiti annakna. Isut’ Manangted iti “isuamin a naimbag a sagut ken isuamin a naan-anay a sagut.” (Santiago 1:17) Awan ti ipaidamna a naimbag iti sangatauan, uray no dakkel ti gatadna dayta kenkuana.—Efeso 2:​4-7.

Ni Jesus, ti Anak ti Dios, nangipakita ti ayat kadagiti tattao babaen ti panangagasna kadagiti saksakitda

Panunotenyo dagiti bambanag nga inaramid ni Jesus ditoy daga, ti Anak ti Dios. Pinagsaona dagiti umel ket inikkanna dagiti bulsek iti panagkita. Inagasanna dagiti agkukutel ken dagiti pilay. Nangparuar kadagiti demonio ken inagasanna ti amin a kita dagiti saksakit. Ni Jesus, babaen ti pannakabalin ti Dios, pinagungarna pay dagiti natay iti biag.—Mateo 9:32-35; 15:30, 31; Lucas 7:11-15.

Imbes a mangulbod tapno allilawennatayo, kankanayon nga ibagbaga ti Dios ti kinapudno. Pulos a dina allilawen ti asinoman.—Numeros 23:19.

 Liklikan dagiti Narugit nga Aramid

No kasano a ti sapot ti lawalawa tenglenna ti maysa a ngilaw, minilion a tattao ti tinengngel ti panaganito ken kinaulbod. Kabutengda dagiti natay. Kabutengda dagiti demonio. Madandanaganda kadagiti panangilunod, partaan, anting-anting, ken an-anib. Naigalutda kadagiti pammati ken tradision a naibatay kadagiti kinaulbod ni Satanas a Diablo. Awan pakasiloan dagiti adipen ti Dios kadagitoy a bambanag.

Ni Jehova adayo a nabilbileg ngem ni Satanas. No agserbikay ken Jehova, salaknibannakayto manipud kadagiti demonio. (Santiago 4:7) Dinakayto maan-ano dagiti panangilunod. Kas pangarigan, idiay Nigeria, tallo a nabileg a mangkukulam ti nangilunod a mangpapatay iti maysa a Saksi ni Jehova a nagkitakit a mangpanaw iti ili. Idi a napaay dagiti panangilunod, maysa kadagiti mangkukulam ti nagbuteng, napan iti daydiay Saksi, ket nagpakpakaasi iti asi.

Dagiti taga Efeso pinuoranda dagiti libroda maipapan iti mahika

No riribukennakay dagiti demonio, awaganyo ni Jehova iti naganna ket salaknibannakayto. (Proverbio 18:10) Ngem tapno magun-odanyo ti pannalaknib ti Dios, masapul a lumapsutkayo a naan-anay manipud isuamin a naitimpuyog iti espiritismo ken panagdayaw iti demonio. Dagiti managdaydayaw ti Dios idiay Efeso inaramidda dayta. Inummongda amin dagiti libroda iti mahika ket pinuoranda ida. (Aramid 19:19, 20) Dagiti adipen ti Dios itatta masapul nga aramidenda a kasta. Iwaksianyo ti bagiyo kadagiti anting-anting, karkarading, “mangsalaknib” a kuintas, an-anib, libro iti mahika, ken aniaman a nainaig iti espiritistiko nga ar-aramid.

 Alagadenyo ti Pudno a Panagdayaw

No tarigagayanyo nga ay-aywen ti Dios, saan nga umdas ti basta panangpanaw iti ulbod a panagdayaw ken ti panagsardeng nga agaramid iti dakes. Masapul nga aktibo nga alagadenyo ti nadalus a ­panagdayaw. Ipakita ti Biblia no ania ti kasapulan:

Tumabuno kadagiti Nakristianuan a panaggigimong.—Hebreo 10:24, 25

Adalen ti Biblia.—Juan 17:3

Mangaskasaba kadagiti sabsabali.—Mateo 24:14

Agkararag ken Jehova.—Filipos 4:6, 7

Mabautisaran.—Aramid 2:41

 Makitimpuyog kadagiti Saksi ni Jehova

Ni Satanas ken dagiti demonio addaanda kadagiti tattao ditoy daga a mangisursuro ken mangar-aramid kadagiti dakes a bambanag. Ngem addaan met ni Jehova kadagiti tattao. Isuda dagiti Saksi ni Jehova. (Isaias 43:10) Iti intero a daga, adda nasuroken nga innem a milion a Saksi. Aminda ket pagregreggetanda nga aramiden ti naimbag ken isursuroda dagiti tattao iti kinapudno. Iti kaaduan a dagdaga, maam-ammoyo ida idiay Kingdom Hall, a sadiay sibabara nga abrasaendakayo.

Ti trabahoda isut’ panangtulong kadagiti dadduma nga agserbi iti Dios. Iyadalda ti Biblia kadakayo idiay pagtaenganyo, a tulongandakayo no kasano a dayawen ni Jehova iti umiso a pamay-an. Saan a kasapulan a bayadanyo daytoy. Maragsakan dagiti Saksi a mangisuro iti kinapudno agsipud ta ayatenda dagiti tattao ken ayatenda ni Jehova.

Dagiti Saksi ni Jehova tulongandakayto nga agserbi iti Dios