Mapan iti linaonna

Mapan iti listaan dagiti linaonna

 LEKSION 54

Nakaan-anus ni Jehova ken Jonas

Nakaan-anus ni Jehova ken Jonas

Nakadakdakes dagiti tattao idiay Nineve, a maysa a siudad ti Asiria. Imbaon ni Jehova ti propetana a ni Jonas a mapan sadiay tapno ibagana kadagiti tattao a masapul nga isardengda ti dakes nga aramidda. Ngem saan a nagtulnog ni Jonas ket napan iti sabali a lugar. Naglugan iti barko nga agpa-Tarsis.

Idi agbibiahedan iti baybay, nagbagyo iti napigsa ket permi ti buteng dagiti marinero. Nagkararagda kadagiti diosda ket insaludsodda: ‘Apay a mapaspasamak daytoy?’ Idi agangay, imbaga ni Jonas: ‘Siak ti makimbasol. Itartarayak ni Jehova ta diak kayat nga aramiden ti imbilinna. Itapuakdak iti baybay ket agsardengto ti bagyo.’ Saan a kayat dagiti marinero nga aramiden dayta, ngem impilit ni Jonas. Idi intapuakdan ni Jonas, nagsardeng ti bagyo.

Impagarup ni Jonas a matayen. Bayat a lumlumned iti baybay, nagkararag ken Jehova. Idi kuan, nangibaon ni Jehova iti dakkel nga ikan. Tinilmon ti ikan ni Jonas ngem saan a natay. Iti tian ti ikan, inkararagna: ‘Ikarik a kanayonak nga agtulnog kenka.’ Prinotektaran ni Jehova ni Jonas iti tian ti ikan iti tallo nga aldaw. Kalpasanna, imbilin ni Jehova iti ikan nga isaruana ni Jonas iti igid ti baybay.

Gapu ta insalakan ni Jehova ni Jonas, kayatna kadi a sawen a saannan a kasapulan ti mapan idiay Nineve? Saan. Imbaga manen  ni Jehova ken Jonas a mapan sadiay. Ket ita, nagtulnogen ni Jonas. Napan sadiay ket imbagana kadagiti dakes a tattao: ‘Madadaelto ti Nineve kalpasan ti 40 nga aldaw.’ Kalpasanna, adda di ninamnama a napasamak—dimngeg dagiti taga-Nineve ket nagbalbaliwda. Imbaga ti ari ti Nineve kadagiti tattao: ‘Umawagkayo iti Dios ket agbabawikayo. Bareng saannatayo a dadaelen.’ Idi nakita ni Jehova a nagbabawida, saannan a dinadael ti Nineve.

Nakaunget ni Jonas ta saan a nadadael ti siudad. Panunotem: Naanus ken naasi ni Jehova ken ni Jonas, ngem saan a naasian ni Jonas kadagiti taga-Nineve. Dismayado a nagtugaw iti sirok ti mula a tabungaw iti ruar ti siudad. Idi kuan, natay ti mula ket nakaunget ni Jonas. Isu nga imbaga ni Jehova: ‘Maasianka iti dayta a mula, ngem saanka a maasian kadagiti taga-Nineve. Naasianak kadakuada isu a saanko ida a dinadael.’ Ania ti maadalta? Adayo a napatpateg dagiti taga-Nineve ngem iti aniaman a mula.

“Ni Jehova . . . naanus kadakayo ta saanna a kayat a madadael ti asinoman no di ket kayatna nga agbabawi ti amin.”—2 Pedro 3:9