Mapan iti linaonna

Mapan iti listaan dagiti linaonna

 LEKSION 55

Prinotektaran ti Anghel ni Jehova ni Ezekias

Prinotektaran ti Anghel ni Jehova ni Ezekias

Nasakupen ti Imperio ti Asiria ti 10 a tribu a pagarian ti Israel. Ket ita, kayat ni Senaquerib, nga ari ti Asiria, a sakupen ti dua a tribu a pagarian ti Juda. Isu a sinaggaysana a sinakup dagiti siudad. Ngem ti Jerusalem ti kangrunaan a kayatna a sakupen. Dina ammo a protprotektaran ni Jehova ti Jerusalem.

Nagbayad ti ari ti Juda a ni Ezekias iti adu a kuarta ken Senaquerib tapno saanna a sakupen ti Jerusalem. Innala ni Senaquerib ti kuarta, ngem nangibaon latta iti nagadu a soldado a mangraut iti Jerusalem. Mabutbuteng dagiti tattao ta umas-asideg dagiti Asirio. Ngem imbaga ni Ezekias kadakuada: ‘Dikay agbuteng. Napigsa dagiti Asirio, ngem pagbalinennatayo ni Jehova a napigpigsa.’

Imbaon ni Senaquerib ti Rabsaque a mensaherona idiay Jerusalem tapno uyawenna dagiti tattao. Nagtakder ti Rabsaque iti ruar ti siudad ket impukkawna: ‘Saannakay a kabaelan a tulongan ni Jehova. Dikay agpaallilaw ken Ezekias. Awan ti dios a makaisalakan kadakayo manipud kadakami.’

Insaludsod ni Ezekias ken Jehova no ania ti aramidenna. Insungbat ni Jehova: ‘Dika agbuteng iti imbaga ti Rabsaque. Saan a masakup ni Senaquerib ti Jerusalem.’ Kalpasanna, nakaawat ni Ezekias kadagiti surat a naggapu ken Senaquerib a mangibagbaga: ‘Sumukoka lattan. Saannaka a maisalakan ni Jehova.’ Inkararag ni Ezekias: ‘Pangngaasim, Jehova, isalakannakami, tapno maammuan ti amin a sika laeng ti pudno a Dios.’ Imbaga ni Jehova: ‘Saanto a makastrek ti ari ti Asiria iti Jerusalem. Protektarakto ti siudadko.’

Sigurado ni Senaquerib a masakupna ti Jerusalem. Ngem maysa a rabii, nangibaon ni Jehova iti anghel iti kampo dagiti  soldado iti ruar ti siudad. Pinapatay ti anghel ti 185,000 a soldado! Natay dagiti kalalaingan a soldado ni Ari Senaquerib. Gapu ta naabaken, awanen ti maaramidanna no di agawid. Prinotektaran ni Jehova ni Ezekias ken ti Jerusalem, kas iti inkarina. No addaka koma idi sadiay, nagtalekka ngata ken Jehova?

“Bambantayan ti anghel ni Jehova dagidiay agbuteng Kenkuana, ket isalakanna ida.”—Salmo 34:7