Mapan iti linaonna

Mapan iti listaan dagiti linaonna

 LEKSION 30

Inlemmeng ni Rahab Dagiti Espia

Inlemmeng ni Rahab Dagiti Espia

Idi napan dagiti espia nga Israelita iti siudad ti Jerico, nagyanda iti balay ti maysa a babai nga agnagan Rahab. Naammuan dayta ti ari ti Jerico ket nangibaon kadagiti soldado iti balay ni Rahab. Inlemmeng ni Rahab ti dua nga espia iti atep sa inturongna dagiti soldado iti sabali a direksion. Imbagana kadagiti espia: ‘Tulongankayo ta ammok a tultulongannakayo ni Jehova ket masakupyonto ti daga. Pangngaasiyo, ikariyo nga isalakanyonto ti pamiliak.’

Imbaga dagiti espia ken Rahab: ‘Ikarimi a saanto a maan-ano dagiti adda iti uneg ti balaymo.’ Kinunada: ‘Mangigalutka iti nalabaga a tali iti tawam, ket maisalakanto ti pamiliam.’

Pinababa ni Rahab dagiti espia iti tawa babaen iti tali. Naglemmengda iti kabambantayan iti tallo nga aldaw sada nagsubli ken Josue. Idi kuan, bimmallasiw dagiti Israelita iti Karayan Jordan ken nagsaganada a mangsakup iti daga. Ti Jerico ti umuna a siudad a nasakupda. Imbilin ni Jehova nga agmartsada iti aglawlaw ti siudad  iti maminsan iti kada aldaw iti uneg ti innem nga aldaw. Iti maikapito nga aldaw, namimpito a nagmartsada iti aglawlaw ti siudad. Kalpasanna, pinuyotan dagiti padi dagiti trumpetada, ket nagpukkaw dagiti soldado iti nakapigpigsa. Narba dagiti pader ti siudad! Ngem saan a narba ti balay ni Rahab nga adda iti pader. Naisalakan ni Rahab ken ti pamiliana gapu ta nagtalek ken Jehova.

“Kasta met, saan kadi a naibilang met a nalinteg ni Rahab . . . gapu iti aramidna idi pinastrekna dagiti mensahero ken insurona ti rummuaranda?”—Santiago 2:25