LEKSION 60
Maysa a Pagarian nga Agtalinaed iti Agnanayon
Maysa a rabii, nagtagtagainep ni Ari Nabucodonosor ket nariribukan unay ken saan a makaturog. Pinaayabanna dagiti adipenna nga agar-aramid iti milagro ket imbagana: ‘Ibagayo ti kaipapanan ti tagtagainepko.’ Kinunada: ‘Ibagam kadakami ti tagtagainepmo, O ari.’ Ngem kinuna ti ari: ‘Saan! Dakayo ti mangibaga iti tagtagainepko. No diyo maibaga, patayenkayo.’ Kinunada manen: ‘Ibagam ti tagtagainepmo, ket ibagaminto ti kaipapananna.’ Kinunana: ‘Luklukuendak. Ibagayo ti tagtagainepko!’ Insungbatda iti ari: ‘Awan ti tao a makaaramid iti dayta. Imposible dayta.’
Napalalo ti unget ni Nabucodonosor ket imbilinna a mapapatay ti amin a masirib a lallaki iti daga, a pakairamanan da Daniel, Sidrac, Mesac, ken Abednego. Indawat ni Daniel iti ari nga ikkanna pay iti panawen. Kalpasanna, nagkararag ni Daniel ken dagiti gagayyemna ken Jehova a tulonganna ida. Ania ti inaramid ni Jehova?
Babaen iti sirmata, impakaammo ni Jehova ken Daniel ti tagtagainep ni Nabucodonosor ken ti kaipapananna. Iti simmaruno nga aldaw, napan ni Daniel iti adipen ti ari ket imbagana: ‘Dimo papatayen dagiti masirib a lallaki. Maibagak ti kaipapanan ti tagtagainep ti ari.’ Ni Daniel ket impan ti adipen ken ni Nabucodonosor. Imbaga ni Daniel iti ari: ‘Impakaammo ti Dios kenka ti mapasamak iti masanguanan. Daytoy ti tagtagainepmo: Nakakitaka iti dakkel nga estatua a balitok ti ulona, pirak ti barukong ken takiagna, gambang ti tian ken luppona, landok dagiti gurongna, ken naglaok a landok ken pila dagiti sakana. Idi kuan, adda bato a natikap iti bantay ket dayta ti nangtiro kadagiti saka ti estatua. Narumek ti estatua ket
nagbalin a pulbos sa nayangin. Ti bato ket nagbalin a dakkel a bantay, ket sinaknapanna ti intero a daga.’Kalpasanna, imbaga ni Daniel: ‘Daytoy ti kaipapanan ti tagtagainepmo: Ti balitok nga ulo isu ti pagariam. Ti pirak isu ti pagarian a sumaruno kenka. Kalpasanna, addanto mangituray iti intero a daga a kas iti gambang. Ti sumarunonto a pagarian ket napigsa a kas iti landok. Kamaudiananna, addanto nabingaybingay a pagarian, a ti dadduma a pasetna ket napigsa a kas iti landok ken ti dadduma ket nalaka a maburak a kas iti pila. Ti bato a nagbalin a bantay isu ti Pagarian ti Dios. Rumekennanto dagitoy a pagarian ket agtalinaedto dayta iti agnanayon.’
Nagruknoy ni Nabucodonosor iti sanguanan ni Daniel. Imbagana: ‘Impakaammo kenka ti Diosmo daytoy a tagtagainep. Awan ti Dios a kas kenkuana.’ Saan a pinatay ti ari ni Daniel. Pinagbalinna ketdi a panguluen ti amin a masirib a lallaki ken agturay iti intero a probinsia ti Babilonia. Makitam kadi no kasano a sinungbatan ni Jehova ti kararag ni Daniel?
“Inurnongda ida iti lugar a maaw-awagan iti Armagedon iti Hebreo.”—Apocalipsis 16:16