1. Maysa kadagiti Kristiano iti kongregasion idiay Roma a pinatulodan ni Pablo kadagiti personal a kablaawna.​—Ro 16:14.

  2. Maysa a Griego a dios; ti anak ni Zeus babaen ken Maia, nga ibagbaga dagiti Romano nga isu ni Mercury a diosda iti komersio. Ni Hermes ket naibilang a mensahero ti didios. Naipagarup nga isu ti masirib a manangbalakad kadagiti bannuar ken naibilang a dios ti komersio, nasigo a panagsao, kinasigo iti gimnastiko, pannaturog, ken dagiti tagtagainep. Naipagarup met a daytoy a dios saanna laeng nga iwanwanwan dagiti sibibiag no di ket isu met ti mangiturturong kadagiti natay a mapan iti Hades.

 Bayat nga adda ni apostol Pablo idiay Listra, idi nakita dagiti umili sadiay nga inagasan ti apostol ti maysa a lalaki a pilay manipud pannakayanakna, imbilangda ni Pablo nga isu ti dios a ni Hermes, ta ni Pablo daydiay “mangidadaulo iti panagsao.” (Ara 14:8-13) Naikunada daytoy maitunos iti panangipapanda a ni Hermes ket mensahero ti dios ken dios ti nasigo a panagsao. Ipakita ti sumaganad a kitikit a nasarakan iti dayta a lugar idi 1909 a ni Hermes ket nagdaydayawan dagiti umili iti Listra: “Idi a ni Toues Macrinus a naawagan met iti Abascantus ken ni Batasis nga anak ni Bretasis ket nagaramidda babaen iti bukodda a gastos [iti maysa nga estatua ni] Hermes a Katan-okan maitunos iti karida, agraman ti maysa a pagorasan babaen ti anniniwan ti init a dayta ket indedikarda ken Zeus nga dios-init.”​—The International Standard Bible Encyclopaedia, inurnos ni J. Orr, 1960, Tomo III, p. 1944.