[Iti (Kukua ti) Cus (Etiopia)].

 Ti termino a “Cusita” ket mabalin a tumukoy kadagiti agnanaed iti daga ti Cus idiay Africa wenno mabalin a tumukoy no dadduma kadagiti tattao nga agnanaed iti Peninsula ti Arabia. Nabatad a daytoy naud-udi a nadakamat ti agaplikar iti asawa ni Moises a  ni Zipora. (Ex 18:1-5; Nu 12:1) Ni Zipora ket maysa a Keneo a di masinunuo ti kapuonanna. (Ge 15:18, 19; Uk 4:11) Ti sasao iti 2 Cronicas 21:16 nga “iti sibay dagiti Etiope [Cusita]” nga agaplikar iti sumagmamano nga Arabo mabalin met a kaipapananna ti “iti sidong ti panangituray dagiti Etiope,” ket mangipasimudaag daytoy iti maysa a pangibatayan no apay a mabalin nga iyaplikar ti nagan a “Cusita” kadagiti tattao a saan a nagtaud ken Cus. Maipagarup a ti sumagmamano kadagiti annak ni Cus ket nagnaed iti Peninsula ti Arabia.​—Kitaenyo ti HAVILA Num. 3; SABTA.

 Nupay kasta, ti “Cusita” ket kangrunaanna a tumukoy kadagiti Africano nga agnanaed iti rehion a naawagan iti Etiopia idi nagkauna a tiempo. Malaksid kada “Zera nga Etiope [Cusita]” ken “Tirhaca nga ari ti Etiopia” (2Cr 14:9; 2Ar 19:9), ti dadduma pay a Cusita a nadakamat iti Biblia isu ni Ebed-melec (Jer 38:7-12; 39:16-18), ti eunuko nga Etiope a nagbalin a Kristiano, ken ti reyna a nagserbianna, ni Candace. (Ara 8:26, 27) Maysa a di nainaganan a Cusita a tumataray (naawagan Cusi iti KJ), imbes a maysa nga Israelita, ti pinili ni Heneral Joab a mangipadamag ken David iti pannakaabak ken pannakatay ti anakna a ni Absalom.​—2Sm 18:19-32; kitaenyo ti CUS Num. 2.