Zacarias 8:1-23

  • Iyeg ni Jehova ti talna ken kinapudno iti Sion (1-23)

    • Jerusalem, ti “siudad ti kinapudno” (3)

    • “Agsaokayo iti pudno iti padayo a tao” (16)

    • Panagpiesta imbes a panagayunar (18, 19)

    • ‘Sipapasnek a birokentayo ni Jehova’ (21)

    • Kumpetto ti 10 a tattao iti bado ti maysa a Judio (23)

8  Kinuna pay ni Jehova a panguluen dagiti armada:  “Daytoy ti kuna ni Jehova a panguluen dagiti armada, ‘Kasta unay ti panangipategkonto iti Sion,+ ken buyogen ti nakaro a pungtot, ipatpategkonto isuna.’”  “Kastoy ti kuna ni Jehova, ‘Agsubliakto iti Sion+ ken agnaedakto iti Jerusalem.+ Maawaganto ti Jerusalem iti siudad ti kinapudno,*+ ket maawaganto ti bantay ni Jehova a panguluen dagiti armada iti nasantuan a bantay.’”+  “Daytoy ti kuna ni Jehova a panguluen dagiti armada, ‘Agtugawto manen dagiti lallakay ken babbaket kadagiti plasa ti Jerusalem, agsarukodto ti tunggal maysa kadakuada gapu iti kinapaut ti biagda.*+  Ket agay-ayamto ti adu nga ubbing kadagiti plasa ti siudad.’”+  “Kastoy ti kuna ni Jehova a panguluen dagiti armada, ‘Nupay kasla imposible daytoy kadagiti nabatbati a tattao kadagita a tiempo, imposible met ngata dayta kaniak?’ kuna ni Jehova a panguluen dagiti armada.”  “Daytoy ti kuna ni Jehova a panguluen dagiti armada, ‘Iruarko dagiti tattaok manipud kadagiti lugar iti daya ken iti laud.*+  Ket ipanko ken pagnaedekto ida iti Jerusalem.+ Agbalindanto a tattaok ket siakto a mismo ti agbalin a napudno* ken nalinteg a Diosda.’”+  “Daytoy ti kuna ni Jehova a panguluen dagiti armada, ‘Papigsaenyo ti pakinakemyo,*+ dakayo a dumdumngeg kadagitoy a sasao dagiti propeta,+ a naibaga met laeng idi aldaw a naikabil ti pundasion ti balay ni Jehova a panguluen dagiti armada tapno maibangon ti templo. 10  Ta sakbay dayta a tiempo, saan a masuelsuelduan dagiti tattao ken dagiti animal;+ ken napeggad idi ti agbiahe gapu iti kabusor, ta impalubosko nga aggiginnura ti amin a tattao.’ 11  “‘Ngem saanen a kas idi ti panangtratok kadagitoy a nabatbati a tattaok,’+ kuna ni Jehova a panguluen dagiti armada. 12  ‘Ta maimulanto ti bin-i a mangyeg iti talna; agbunganto ti ubas, adunto ti maapit iti daga,+ ken addanto umdas a linnaaw. Ipatawidkonto amin dagitoy kadagiti nabatbati a tattaok.+ 13  Nupay inlupitlupitdakayo dagiti nasion,+ O sangakabbalayan ti Juda ken sangakabbalayan ti Israel, isalakankayto ken agbalinkayto a bendision.+ Dikay agbuteng!+ Papigsaenyo ti pakinakemyo.’*+ 14  “Ta kuna ni Jehova a panguluen dagiti armada, ‘“Idi pinagpungtotdak dagidi ammayo, determinadoak a mangdidigra kadakayo,” kuna ni Jehova a panguluen dagiti armada, “ket saanko idi a nagladingitan dayta,+ 15  isu nga ita, determinadoak a mangaramid iti nasayaat kadagiti tattao iti Jerusalem ken Juda.+ Dikay agbuteng!”’+ 16  “‘Dagitoy ti rumbeng nga aramidenyo: Agsaokayo iti pudno iti padayo a tao,+ ken ipakatyo ti kinahustisia no mangukomkayo tapno agari ti kinapudno ken talna.+ 17  Dikay agpanggep iti pagdaksan ti padayo a tao,+ ken saankayo nga agsapata iti ulbod;+ ta kagurak amin dagita,’+ kuna ni Jehova.” 18  Imbaga pay ni Jehova a panguluen dagiti armada: 19  “Daytoy ti kuna ni Jehova a panguluen dagiti armada, ‘Ti panagayunar iti maikapat,+ maikalima,+ maikapito,+ ken maikasangapulo a bulan+ ket agbalinto a nakaragragsak a piesta+—nagraragsak nga okasion para iti sangakabbalayan ti Juda. Isu nga ayatenyo ti kinapudno ken talna.’ 20  “Kuna ni Jehova a panguluen dagiti armada, ‘Dumtengto ti tiempo nga umay dagiti tattao ken dagiti umili ti adu a siudad; 21  ket mapanto dagiti umili ti maysa a siudad iti sabali a siudad ket ibagada: “Sipapasnek a mapantayo agpakaasi ken* Jehova ken birokentayo ni Jehova a panguluen dagiti armada. Mapankami met.”+ 22  Adunto a tattao ken napipigsa a nasion ti mapan idiay Jerusalem tapno birokenda ni Jehova a panguluen dagiti armada+ ken agpakaasida ken* Jehova.’ 23  “Kuna ni Jehova a panguluen dagiti armada, ‘Kadagita nga aldaw, kumpetto ti 10 a tattao manipud iti amin a lengguahe kadagiti nasion,+ wen, kumpetdanto a naimbag iti bado* ti maysa a Judio,* nga ibagbagada: “Kayatmi ti kumuyog kadakayo+ ta nangngegmi nga adda kadakayo ti Dios.”’”+

Footnotes

Wenno “kinamatalek.”
Lit., “gapu iti kinaadu ti aldawda.”
Wenno “manipud iti lugar a pagsingisingan ti init ken iti lugar a paglennekan ti init.”
Wenno “matalek.”
Wenno “Bumilegkayo.”
Wenno “Bumilegkayo.”
Wenno “paluknengen ti rupa ni.”
Wenno “paluknengenda ti rupa ni.”
Wenno “gayadan ti bado.”
Lit., “Judio a lalaki.”