Zacarias 6:1-15
6 Timmangadak manen ket nakitak ti uppat a karuahe a rumrummuar iti nagbaetan ti dua a gambang a bantay.
2 Guyguyoden dagiti nalabaga a kabalio ti umuna a karuahe. Dagiti met nangisit a kabalio ti mangguyguyod iti maikadua a karuahe.+
3 Guyguyoden dagiti puraw a kabalio ti maikatlo a karuahe. Dagiti met labang ken turikturikan iti nagduduma a kolor ti mangguyguyod iti maikapat a karuahe.+
4 Dinamagko iti anghel a makisarsarita kaniak: “Ania dagitoy, apo?”
5 Simmungbat ti anghel: “Dagitoy ti uppat nga espiritu+ idiay langit. Kagapgapuda iti sanguanan ti Apo ti intero a daga.+
6 Daydiay* guyguyoden dagiti nangisit a kabalio ket mapan iti daga iti amianan,+ agpalaud* met dagiti puraw a kabalio, idinto ta agpaabagatan dagiti labang.
7 Magagaran dagiti turikturikan iti nagduduma a kolor a mapan mangwanawan iti daga.” Kinuna pay ti anghel: “Mapanyo sursoren ti daga.” Ket napanda sinursor ti daga.
8 Kalpasanna, impukkaw ti anghel kaniak: “Kitaem, bimmaaw ti pungtot ni Jehova iti daga iti amianan gapu kadagiti kabalio a napan sadiay.”
9 Kinuna pay ni Jehova kaniak:
10 “Alaem kada Heldai, Tobia, ken Jedaias dagiti sagut nga inyawidda a naggapu kadagiti tattao a naipan idiay Babilonia; ket iti dayta nga aldaw, agkakaduakayo a mapan idiay balay ni Josias nga anak ni Sofonias.
11 Mangalaka iti pirak ken balitok ket mangaramidka iti korona* a maikabil iti ulo ni Josue+ nga anak ni Jehozadak a nangato a padi.
12 Ibagam kenkuana,“‘Daytoy ti imbaga ni Jehova a panguluen dagiti armada: “Daytoy ti lalaki nga agnagan Tarubong.+ Agtubonto iti mismo a daga nga ayanna ket bangonennanto ti templo ni Jehova.+
13 Isunto ti mangbangon iti templo ni Jehova, ken isunto ti mangawat iti pammadayaw a para iti ari. Agtugawto iti tronona,+ ken agbalinto nga ari ken padi, ket agsaknapto ti kinatalna gapu kadagita a dua a saadna.*
14 Agtalinaedto ti korona* iti templo ni Jehova kas pakalaglagipan* kada Helem, Tobia, Jedaias,+ ken ni Hen nga anak ni Sofonias.
15 Umayto dagiti adda iti adayo a lugar a tumulong iti pannakaibangon ti templo ni Jehova.” No agtulnogkayo kadagiti ibaga ni Jehova a Diosyo, maammuanyonto a ni Jehova a panguluen dagiti armada ti nangibaon kaniak kadakayo.’”
Footnotes
^ Kayatna a sawen, ti karuahe.
^ Wenno “iti labes ti baybay.”
^ Wenno “nangayed a korona.”
^ Kayatna a sawen, ti saadna kas agturay ken padi.
^ Wenno “nangayed a korona.”
^ Wenno “a mangipalagip.”
