Zacarias 3:1-10

  • Maikapat a sirmata: Nasukatan dagiti bado ti nangato a padi (1-10)

    • Busoren ni Satanas ni Josue a Nangato a Padi (1)

    • “Iyegko ti adipenko a ni Tarubong!” (8)

3  Impakitana kaniak ni Josue+ a nangato a padi a nakatakder iti sanguanan ti anghel ni Jehova. Nakatakder met ni Satanas+ iti makannawan ni Josue tapno busorenna.  Kalpasanna, imbaga ti anghel ni Jehova ken ni Satanas:+ “Tubngarennaka koma ni Jehova, sika a Satanas, babalawennaka koma ni Jehova a nangpili iti Jerusalem!+ Saan kadi a mayarig daytoy a lalaki iti mapupuoran a troso a naikkat manipud iti apuy?”  Nakatakder ni Josue iti sango ti anghel ken narugit dagiti badona.  Kinuna ti anghel kadagiti nakatakder iti sanguananna: “Uksobenyo dagiti narugit a badona.” Kalpasanna, kinuna ti anghel kenkuana: “Inikkatkon dagiti kamalim,* ket maisuotto kenka dagiti nadalus a bado.”*+  Kinunak: “Adda koma nadalus a turbante a maikabil iti ulona.”+ Isu nga inkabilda ti nadalus a turbante iti ulona ken insuotda kenkuana dagiti nadalus a badona; ket agtaktakder idi ti anghel ni Jehova iti asideg.  Kalpasanna, kinuna ti anghel ni Jehova ken ni Josue:  “Daytoy ti kinuna ni Jehova a panguluen dagiti armada, ‘No magnaka kadagiti daldalanko ken no aramidem dagiti responsabilidadmo iti sanguanak, agserbikanto a kas hues iti balayko+ ken paraaywan* kadagiti paraangak; ket nawayakanto nga umay kaniak ken kadagiti agtaktakder ditoy.’  “‘Denggem koma, O Josue a Nangato a Padi, sika ken dagiti kakaduam a nakatugaw iti sanguanam, ta agserserbikayo a kas pagilasinan dagiti mapasamak iti masanguanan. Kitaenyo, iyegko ti adipenko+ a ni Tarubong!+  Kitaenyo ti bato nga inkabilko iti sanguanan ni Josue! Pito ti mata ti bato; ken adda ikitikitko iti dayta,’ kuna ni Jehova a panguluen dagiti armada, ‘ket iti maysa nga aldaw, punasekto ti basol dayta a daga.’+ 10  “‘Iti dayta nga aldaw,’ kuna ni Jehova a panguluen dagiti armada, ‘awisento ti tunggal maysa kadakayo ti kaarrubana nga umay iti sirok ti ubasna ken iti sirok ti kayona a higos.’”+

Footnotes

Wenno “basolmo.”
Wenno “bado para iti espesial nga okasion.”
Wenno “paraasikaso; guardia.”