Zacarias 11:1-17

  • Dagiti resulta ti panangilaksid iti pastor ti pudno a Dios (1-17)

    • “Ipastoram ti arban a nairanta a mapapatay” (4)

    • Dua a baston: Da Makaay-ayo ken Panagkaykaysa (7)

    • Tangdan ti pastor: 30 a pedaso a pirak (12)

    • Ti kuarta a naipuruak iti pagidulinan iti gameng (13)

11  “Luktam dagiti ruanganmo, O Lebanon,Tapno sumrek ti apuy a manguram kadagiti kayom a sedro.   Aganug-ogka, sika a kayo a parwa ta natuangen dagiti sedro;Nadadaelen dagiti nagpipintas ken dadakkel a kayo! Aganug-ogkayo, dakayo a kayo a roble ti Basan,Ta nauramen ti napuskol a kabakiran!   Denggenyo! Agdungdung-aw dagiti pastor,Ta awanen dagiti nalangto a pagpapaarabanda. Denggenyo! Ngumerngernger dagiti urbon a leon,*Ta nadadaelen dagiti kasamekan iti igid ti Jordan.  “Kuna ni Jehova a Diosko, ‘Ipastoram ti arban a nairanta a mapapatay.+  Pinapatay ida dagiti gimmatang kadakuada+ ngem saanda a madusa. Kuna dagiti mangilaklako kadakuada:+ “Maidaydayaw koma ni Jehova ta bumaknangakton.” Saan met a maasian kadakuada dagiti pastorda.’+  “‘Ta diakton kaasian dagiti umili iti daga,’ kuna ni Jehova. ‘Ipaluboskonto nga iturayan ti maysa ti kaarrubana ken iturayanto met ida ti arida; dadaelendanto ti daga, ket saankonto ida nga isalakan.’”  Impastorak ti arban a nairanta a mapapatay,+ para iti pagimbaganyo, dakayo a maparparigatan iti arban. Isu a nangalaak iti dua a sarukod. Pinanaganak ti maysa iti Makaay-ayo ken ti sabali iti Panagkaykaysa,+ ket inaywanak ti arban.  Iti uneg ti makabulan, tallo a pastor ti pinapanawko ta saankon a maanusan ida, ken kagurguradak met.  Kinunak: “Naumaakon a mangipaspastor kadakayo. Matay koma daydiay matmatay, mapukaw koma daydiay mapukpukaw. Agiinnibus koma dagidiay mabati.” 10  Isu nga innalak ti sarukodko a pinanaganak iti Makaay-ayo+ ket pinutedputedko, tapno agpatingga ti tulag nga inaramidko iti amin a tattaok. 11  Iti kasta, nawaswas ti tulag iti dayta nga aldaw, ket dagiti maparparigatan iti arban a mangbuybuya idi kaniak naamirisda a naggapu ken Jehova ti ibagbagak. 12  Kalpasanna, kinunak: “No panagkunayo ket nasayaat, itedyo ti tangdanko; ngem no saan, saanyo nga it-ited.” Ket binayadanda* ti tangdanko a 30 a pedaso a pirak.+ 13  Kinuna ni Jehova kaniak: “Ipuruakmo dayta iti pagidulinan iti gameng—ti mayat a presio a pinangpresioda kaniak.”+ Isu nga innalak ti 30 a pedaso a pirak ket impuruakko iti pagidulinan iti gameng iti balay ni Jehova.+ 14  Kalpasanna, pinutedputedko ti sabali pay a sarukodko a maawagan iti Panagkaykaysa+ tapno waswasek ti panagkabsat ti Juda ken Israel.+ 15  Kinuna ni Jehova kaniak: “Alaem ita ti alikamen ti awan serserbina a pastor.+ 16  Ta mangisaadak iti pastor iti daga. Saannanto nga aywanan dagiti matmatayen a karnero;+ saannanto a biroken dagiti urbon wenno paimbagen dagiti nadangran+ wenno pakanen dagiti napigsa pay laeng. Kanenna ketdi ti karne ti nalukmeg+ ken tuklapenna ti kuko dagiti karnero.+ 17  Kaasi pay ti awan serserbina a pastor nga insaadko,+ a saan a mangay-aywan iti arban!+ Espada ti mangtagbatto iti takiagna ken mangsuat iti kannawan a matana. Magangonto ti intero a takiagna,Ken mabulsekto* ti kannawan a matana.”

Footnotes

Wenno “burboran a bumaro a leon.”
Lit., “tinimbangda.”
Lit., “kumudrepto.”