Uk-ukom 13:1-25

  • Agparang ti anghel ken Manoa ken iti asawana (1-23)

  • Mayanak ni Samson (24, 25)

13  Inaramid manen dagiti Israelita ti dakes iti imatang ni Jehova,+ ket inted ida ni Jehova iti ima dagiti Filisteo+ iti 40 a tawen.  Iti dayta a tiempo, adda lalaki nga agnagan iti Manoa+ a taga-Zora+ ken kameng ti pamilia dagiti Danita.+ Lupes* ti asawana ken awanan iti anak.+  Naminsan, nagparang iti asawana ti anghel ni Jehova ket kinunana: “Maysaka a lupes ken awanan iti anak. Ngem agsikog ken mangyanakkanto iti maysa a lalaki.+  Manipud ita, annadam ta bagim ket dika uminum iti arak wenno aniaman a naingel nga inumen+ ken dika mangan iti aniaman a maibilang a narugit.+  Agsikogkanto ken mangyanakka iti maysa a lalaki, ket masapul a saan a mapukisan,+ ta agbalinto ti ubing a Nazareo ti Dios manipud pannakayanakna.* Idauluannanto ti pannakaisalakan ti Israel iti ima dagiti Filisteo.”+  Imbaga ti babai iti asawana: “Adda immay kaniak nga adipen ti pudno a Dios. Kasla anghel ti pudno a Dios ti langana ket nakaskasdaaw unay. Diak dinamag ti naggapuanna ken saanna met nga imbaga ti naganna.+  Ngem kinunana, ‘Agsikog ken mangyanakkanto iti maysa a lalaki. Gapuna, dika uminum iti arak wenno aniaman a naingel nga inumen, ken dika mangan iti aniaman a maibilang a narugit, ta agbalinto a Nazareo ti Dios ti ubing manipud pannakayanakna* agingga iti ipapatayna.’”  Impakaasi ni Manoa ken ni Jehova: “Pangngaasim, Apo Jehova, ta pagsubliem ti adipen ti pudno a Dios tapno isurona ti masapul nga aramidenmi iti mayanak nga ubing.”  Pinatgan ti pudno a Dios ti kiddaw ni Manoa, ket nagsubli ti anghel ti pudno a Dios bayat a nakatugaw ti babai iti away. Saanna idi a kadua ni Manoa. 10  Dagus a nagtaray ti babai ket imbagana iti asawana: “Nagpakita kaniak ti lalaki a nagparang idi kalman.”+ 11  Kimmuyog ni Manoa iti asawana ket napanda iti lalaki. Insaludsod ni Manoa: “Sika kadi ti nakisarita iti asawak?” Insungbat ti lalaki: “Wen, siak.” 12  Kinuna ni Manoa: “Pumudno koma ti imbagam! Anianto ti biag ti ubing ken ti aramidenna?”+ 13  Insungbat ti anghel ni Jehova: “Masapul a tungpalen ti asawam ti amin nga imbagak kenkuana.+ 14  Saan a mangan iti aniaman a produkto ti ubas, saan nga uminum iti arak wenno aniaman a naingel nga inumen,+ ken saan a mangan iti aniaman a maibilang a narugit.+ Tungpalenna koma ti amin nga imbilinko.” 15  Kinuna ni Manoa iti anghel ni Jehova: “Pangngaasim ta saanka pay a pumampanaw ta isaganaandaka iti urbon a kalding.”+ 16  Insungbat ti anghel ni Jehova: “No agtalinaedak, saankonto a kanen ti taraon nga isaganam; ngem no kayatmo nga idatag dayta ken Jehova kas daton a mapuoran, mabalinmo nga aramiden.” Saan nga ammo ni Manoa nga anghel dayta ni Jehova. 17  Dinamag ni Manoa iti anghel ni Jehova: “Ania ti naganmo,+ tapno mapadayawandaka inton pumudno ti imbagam?” 18  Insungbat ti anghel ni Jehova: “Saanmo a damdamagen ti naganko, ta nakaskasdaaw dayta!” 19  Innala ni Manoa ti urbon a kalding ken ti daton a bukbukel ket indatonna dagita ken Jehova iti rabaw ti dakkel a bato. Kumitkita ni Manoa ken ti asawana idi adda nakaskasdaaw nga inaramid ti Dios. 20  Bayat nga agpangpangato ti apuy manipud iti altar, nakita ni Manoa ken ti asawana nga agpangpangato met ti anghel ni Jehova. Dagus a nagruknoyda agingga iti daga. 21  Nabigbig ni Manoa nga anghel dayta ni Jehova. Saanen nga inulit ti anghel ni Jehova ti nagparang kadakuada.+ 22  Kinuna ni Manoa iti asawana: “Sigurado a matayta ta nakitata ti Dios.”+ 23  Insungbat ti asawana: “No kayat ni Jehova a matayta, saanna koma nga inawat ti daton a mapuoran+ ken ti daton a bukbukel, saanna koma nga impakita kadata dagitoy a banag, ken saanna koma nga imbaga kadata ti aniaman kadagitoy.” 24  Idi agangay, nangyanak ti asawa ni Manoa iti maysa a lalaki ket pinanagananna iti Samson.+ Dimmakkel ti ubing, ket nagtultuloy a binendisionan ni Jehova. 25  Nangrugi nga agtignay kenkuana ti espiritu ni Jehova+ idiay Mahane-dan,+ iti nagbaetan ti Zora ken Estaol.+

Footnotes

Saan nga agsikog.
Lit., “manipud iti aanakan.”
Lit., “manipud iti aanakan.”