Malakias 2:1-17

  • Saan nga isursuro ti papadi dagiti tattao (1-9)

    • Masapul a saluadan ti bibig dagiti papadi ti pannakaammo (7)

  • Nakabasol ti tattao iti di nainkalintegan a panagdiborsio (10-17)

    • “‘Kagurak ti panagdiborsio,’ kuna ni Jehova” (16)

2  “Ita, O papadi, para kadakayo daytoy a bilin.+  No dikay dumngeg ken diyo ipapuso ti panangidayaw iti naganko,” kuna ni Jehova a panguluen dagiti armada, “ibaonkonto kadakayo ti lunod,+ ket pagbalinekto a lunod dagiti bendisionyo.+ Wen, pinagbalinko a lunod dagiti bendisionyo gapu ta diyo impapuso dayta.”  “Dadaelekto* ti immulayo a bukel gapu kadakayo,+ ken iwariskonto ti takki kadagiti rupayo, ti takki dagiti piestayo; ket maipankayto iti dayta.*  Iti kasta, maammuanyonto nga intedko kadakayo daytoy a bilin, tapno agtultuloy ti tulagko ken Levi,”+ kuna ni Jehova a panguluen dagiti armada.  “Ti tulag nga inaramidko kenkuana ket mangtaginayon iti biagna. Maaddaan met iti natalna a biag ken matignay nga agbuteng* kaniak. Nagbuteng kaniak, wen, rinaemna ti naganko.  Adda iti ngiwatna ti linteg* ti kinapudno,+ ken awan ti kinakillo iti bibigna. Nakipagna kaniak iti talna ken kinalinteg,+ ken adu ti pinagtallikudna iti dakes nga aramidda.  Ta masapul a saluadan ti bibig ti padi ti pannakaammo, ken rumbeng a sapulen dagiti umili ti linteg* manipud iti ngiwatna,+ ta isu ti mensahero ni Jehova a panguluen dagiti armada.  “Ngem simminakayo iti dalan. Adu ti intibkolyo mainaig iti linteg.*+ Dinadaelyo ti tulag ni Levi,”+ kuna ni Jehova a panguluen dagiti armada.  “Ibabain ken ipababakayto iti sanguanan ti amin nga umili, ta saanyo a sinurot dagiti dalanko no di ket nangidumdumakayo iti panangyaplikaryo iti linteg.”+ 10  “Saan kadi a maymaysa ti amatayo amin?+ Saan kadi a maymaysa ti Dios a nangparsua kadatayo? Apay ngarud nga al-allilawentayo ti maysa ken maysa,+ a suksukirentayo ti tulag dagidi ammatayo? 11  Nangallilaw ti Juda, ket adda nagdakes a naaramid iti Israel ken Jerusalem; ta rinugitan ti Juda ti kinanasantuan* ni Jehova,+ nga inayatna, ken innalana kas nobia ti anak a babai ti sabali a dios.+ 12  Papatayento ni Jehova manipud iti tolda ni Jacob ti asinoman a mangaramid iti daytoy, asinoman dayta a tao,* nupay mangipaay iti daton a sagut ken Jehova a panguluen dagiti armada.”+ 13  “Adda pay sabali* nga ar-aramidenyo, a nangabbong iti altar ni Jehova iti lulua ken panagsangit ken panagsennaay, isu a saannan a taliawen ti daton a sagutyo wenno maragsakan iti aniaman nga itedyo.+ 14  Ket ibagayo, ‘Ania a rason?’ Gapu ta nagtestigo ni Jehova iti nagbaetanyo ken ti inallilawyo nga asawayo iti kinaagtutuboyo, nupay isu ti kaparehayo ken asawa a nakaitulaganyo.*+ 15  Ngem adda maysa a saan a nangaramid iti dayta, ta adda kenkuana ti natedda iti espiritu. Ania ti sapsapulenna? Ti kaputotan* ti Dios. Saluadanyo ngarud ti bagiyo mainaig iti espirituyo, ken saanyo nga allilawen ti asawayo iti kinaagtutuboyo. 16  Ta kagurak* ti panagdiborsio,”+ kuna ni Jehova a Dios ti Israel, “ken daydiay mangabbong iti badona iti kinaranggas,”* kuna ni Jehova a panguluen dagiti armada. “Saluadanyo ti bagiyo mainaig iti espirituyo, ken dikay mangallilaw.+ 17  “Binannogyo ni Jehova iti ibagbagayo.+ Ngem kinunayo, ‘Kasano a binannogmi?’ Babaen ti panangibagayo, ‘Ti asinoman nga agaramid iti dakes ket nasayaat iti imatang ni Jehova ken maragsakan kenkuana,’+ wenno, ‘Ayan ti Dios ti kinahustisia?’”

Footnotes

Lit., “Tubngarekto.”
Kayatna a sawen, ti disso a pakaikabilan ti takki dagiti maidaton.
Wenno “a mangrespeto; a mangraem.”
Wenno “instruksion.”
Wenno “instruksion.”
Wenno mabalin a, “babaen ti instruksionyo.”
Wenno mabalin a, “ti santuario.”
Lit., “asinoman a siririing ken asinoman a sumungbat.”
Lit., “maikadua.”
Wenno “legal nga asawayo.”
Lit., “bin-i.”
Lit., “kagurana.”
Wenno “daydiay agar-aramid iti kinaranggas.”