Jeremias 7:1-34
7 Daytoy ti mensahe ni Jehova ken Jeremias:
2 “Agtakderka iti ruangan ti balay ni Jehova ket iwaragawagmo sadiay daytoy a mensahe, ‘Denggenyo ti kinuna ni Jehova, dakayo amin a tattao iti Juda, a sumrek kadagitoy a ruangan tapno agdaydayaw ken Jehova.
3 Daytoy ti imbaga ni Jehova a panguluen dagiti armada, ti Dios ti Israel: “Baliwanyo dagiti kababalin ken aramidyo, ket ipaluboskonto nga agtultuloykayo nga agyan iti daytoy a lugar.+
4 Dikay agtalek iti makaallilaw a sasao ken diyo ibagbaga, ‘Daytoy* ti templo ni Jehova, ti templo ni Jehova, ti templo ni Jehova!’+
5 Ta no talaga a baliwanyo dagiti kababalin ken aramidyo; no talaga nga ipatungpalyo ti hustisia kadagiti kaso ti maysa a tao ken ti kaarrubana;+
6 no saanyo nga irurumen dagiti ganggannaet a residente, ulila,* ken balo a babbai;+ no saanyo a patayen dagiti inosente iti daytoy a lugar; ken no saankayo nga agdaydayaw kadagiti sabali a dios a pakadidigraanyo;+
7 ipaluboskonto ngarud nga agtultuloykayo nga agyan iti daytoy a lugar, iti daga nga intedko kadagidi ammayo iti agnanayon.”’”*
8 “Ngem agtaltalekkayo iti makaallilaw a sasao+—sigurado nga awanto a pulos ti pagimbaganna dayta kadakayo.
9 Mabalinyo kadi ti agtakaw,+ pumatay, makikamalala, agsapata iti ulbod,+ agdaton* ken Baal,+ ken agdaydayaw kadagiti sabali a dios a diyo am-ammo,
10 sa umaykayo ken agtakderkayo iti sanguanak iti daytoy a balay a nakaipanaganan ti naganko, ket ibagayo, ‘Maisalakankami,’ uray no ar-aramidenyo amin dagitoy a nakadakdakes a bambanag?
11 Daytoy kadi a balay a nakaipanaganan ti naganko ket imbilangyon a kueba dagiti mannanakaw?+ Nakitak a mismo dayta,” kuna ni Jehova.
12 “‘Mapankayo ngarud ita iti lugarko idiay Shilo,+ a damo a pinilik a pakaidaydayawan ti naganko,+ ket kitaenyo ti inaramidko iti dayta gapu iti kinadakes ti ilik nga Israel.+
13 Ngem kanayon nga ar-aramidenyo amin dagitoy,’ kuna ni Jehova, ‘ket saankayo a nangipangag uray no maulit-ulit a nagsaoak kadakayo.*+ Kanayon nga ay-ayabankayo, ngem saankayo a simmungbat.+
14 Isu a ti inaramidko idiay Shilo+ ket aramidekto met iti balay a nakaipanaganan ti naganko,+ a pagtaltalkanyo,+ ken iti daytoy a lugar nga intedko kadakayo ken kadagidi ammayo.
15 Papanawenkayto iti sanguanak, kas iti panangpapanawko iti amin a kakabsatyo, ti intero a kaputotan ni Efraim.’+
16 “Ngem saanmo nga ikararagan dagitoy a tattao. Saanka nga umawag wenno agkararag wenno agpakaasi kaniak para kadakuada+ ta saankanto a denggen.+
17 Saanmo kadi a makita ti ar-aramidenda kadagiti siudad ti Juda ken kadagiti kalsada ti Jerusalem?
18 Agur-urnong dagiti annakda iti kayo, ar-arunan dagiti amma ti apuy, ken agmasmasa dagiti assawa a babbai iti arina nga aramidenda a tinapay nga idatonda iti Reyna ti Langit.*+ Mangibukbukbokda met iti daton nga inumen para kadagiti sabali a dios tapno saktanda ti riknak.+
19 ‘Ngem siak aya ti saksaktanda?’* kuna ni Jehova. ‘Saan aya a ti bagbagida met laeng, a pakaibabainanda?’+
20 Isu a kastoy ti imbaga ti Kangatuan* nga Apo Jehova, ‘Kitaenyo! Ti unget ken pungtotko ket maibuyat iti daytoy a lugar,+ kadagiti tattao ken animal, kadagiti kaykayo iti tay-ak ken iti bungbunga ti daga. Ti pungtotko ket kaslanto apuy a saan a maiddep.’+
21 “Daytoy ti kinuna ni Jehova a panguluen dagiti armada, ti Dios ti Israel, ‘Sige, inayonyo dagiti sibubukel a datonyo a mapuoran iti dadduma pay a datonyo, ken kanenyo ti karne.+
22 Ta idi inruarko dagidi ammayo idiay Egipto, saanko a kinasarita wenno binilin ida maipapan kadagiti sibubukel a daton a mapuoran ken daton.+
23 Ngem imbilinko kadakuada: “Agtulnogkayo kaniak, ket agbalinakto a Diosyo, ken agbalinkayto a tattaok.+ Masapul a magnakayo iti amin a dalan nga ibilinko kadakayo tapno nasayaat ti pagbanaganyo.”’+
24 Ngem saanda a dimngeg wenno nangipangag.+ Sinurotda ketdi dagiti bukodda a kapanunotan,* inggagarada ti nagtulnog iti dakes a pusoda,+ isu a dimmakesda imbes a simmayaatda,
25 manipud idi rimmuar dagidi ammayo idiay Egipto agingga ita nga aldaw.+ Isu nga inaldaw ken maulit-ulit nga imbaonko kadakayo* ti amin nga adipenko a propeta.+
26 Ngem saanda a dimngeg kaniak ken saandak nga impangag.+ Natangken ketdi ti uloda,* ken dakdakes pay dagiti inaramidda ngem kadagidi ammada!
27 “Ibagamto amin dagitoy kadakuada,+ ngem saandakanto a denggen; awagamto ida ngem saandakanto a sungbatan.
28 Ibagamto kadakuada, ‘Daytoy ti nasion a saan a nagtulnog ken Jehova a Diosda ken saan nga immawat iti disiplina. Awanen ti matalek kadakuada ken saanda payen a pagsasaritaan dayta.’*+
29 “Pukisam ti di pay naputdan* a buokmo ket ibellengmo, ken agdung-awka* kadagiti kalbo a turod, ta inlaksiden ni Jehova ken baybay-annanto daytoy a henerasion a kapungtotna la unay.
30 ‘Ta dakes ti inaramid dagiti tattao ti Juda iti sanguanak,’ kuna ni Jehova. ‘Inkabilda dagiti makarimon nga idoloda iti balay a nakaipanaganan ti naganko tapno rugitanda dayta.+
31 Imbangonda dagiti nangato a disso ti Tofet, nga adda idiay Tanap ti Anak ni Hinnom,*+ tapno puoranda ti annakda a lallaki ken babbai,+ a saanko nga imbilin ken pulos a saanko man la a napanunot.’*+
32 “‘Isu a kitaem! um-umayen dagiti aldaw,’ kuna ni Jehova, ‘inton saanen a Tofet wenno Tanap ti Anak ni Hinnom* ti maipanagan iti dayta no di ket Tanap a Pagpapatayan. Agitabondanto idiay Tofet agingga nga awanen ti mabati a pagitabonan.+
33 Dagiti bangkay dagitoy a tattao ket kanento dagiti billit iti tangatang ken dagiti animal iti daga. Awanto ti mangpapanaw kadagita.+
34 Pasardengekto ti panagraragsak ken panagrarag-o, ti timek ti nobio ken ti nobia+ kadagiti siudad ti Juda ken kadagiti kalsada ti Jerusalem, ta madadaelto dayta a lugar.’”+
Footnotes
^ Lit., “Dagitoy,” a tumukoy iti amin a pasdek iti pasilidad ti templo.
^ Wenno “awanan ama nga ubbing.”
^ Wenno “manipud iti awan inggana agingga iti awan inggana.”
^ Wenno “agpaasuk iti daton.”
^ Lit., “nasapaak a bimmangon ken nagsao.”
^ Ti titulo ti maysa a diosa a nagdaydayawan dagiti apostata nga Israelita; mabalin a diosa ti kinabunga.
^ Wenno “rurrurodenda; pagpungpungtotenda.”
^ Wenno “Soberano.”
^ Wenno “balakad.”
^ Lit., “inaldaw a nasapaak a bimmangon ken imbaonko.”
^ Lit., “Pinatangkenda ti teltelda.”
^ Lit., “nagessaten iti ngiwatda.”
^ Wenno “naidedikar.”
^ Wenno “agkantaka iti naladingit.”
^ Wenno “saan a pulos a simrek iti pusok.”
