Jeremias 6:1-30
6 O annak ni Benjamin, agkamangkayo iti adayo ti Jerusalem.
Puyotanyo ti tangguyob+ idiay Tekoa;+Mangsindikayo iti pagilasinan nga apuy idiay Bet-hakerem!
Ta adda um-umayen a kalamidad manipud iti amianan, maysa a nakaro a didigra.+
2 Ti anak a babai ti Sion ket kas iti napintas ken naimnas a babai.+
3 Umayto dagiti papastor ken dagiti pangenda.
Agtoldada iti aglawlawna+Ket ipaarab ti tunggal maysa ti arban nga ay-aywananna.+
4 “Agsaganakayo iti* gubat maibusor kenkuana!
Agtignaykayo, ket darupentayo iti tengnga ti aldaw!”
“Kaasitayo met, ta lumlumneken ti initKen umat-atiddogen dagiti anniniwan ti rabii!”
5 “Agtignaykayo, ket darupentayo iti rabiiKet dadaelentayo dagiti natibker a torrena.”+
6 Ta daytoy ti kuna ni Jehova a panguluen dagiti armada:
“Mangpukankayo iti kayo ket mangaramidkayo iti bunton a pagdalanan tapno marautyo ti Jerusalem.+
Isu ti siudad a masapul a masingir;Puro panangirurumen ti adda kenkuana.+
7 No kasano nga iti pagurnongan iti danum ti pagtaudan ti nalamiis* a danum,Isu met ti pagtataudan ti kinadakes.
Mangmangngeg kenkuana ti kinaranggas ken pannakadadael;+Kanayon a makitkitak ti sakit ken didigra.
8 Awatem ti pakdaar, O Jerusalem, ta no saan, makapungtotak ket adaywanka;+Pagbalinenka a langalang, lugar a saan a mapagnaedan.”+
9 Daytoy ti kuna ni Jehova a panguluen dagiti armada:
“Dagiti nabati iti Israel ket kas kadagiti maudi a bunga ti ubas.
Masapul nga alaem amin ida a kas iti panangburas ti tao kadagiti nabati nga ubas.”
10 “Asino ti masapul a kasaritak ken pakdaarak?
Asino ti dumngeg?
Kitaem! Ap-apputenda dagiti lapayagda,* isu a saanda a mangipangag.+
Kitaem! Uy-uyawenda ti sao ni Jehova;+Saanda a maragsakan iti dayta.
11 Isu a napnoak iti pungtot ni Jehova,Ket nabannogakon a mangigawgawid iti dayta.”+
“Ibulosmo ti ungetmo iti ubing iti kalsada,+Kadagiti naguummong nga agtutubo a lallaki.
Matiliwdanto amin, ti lalaki ken ti asawana,Dagiti lallakay ken dagiti lakay unayen.*+
12 Dagiti balayda ket maitedto iti sabsabali,Agraman dagiti talon ken assawada a babbai.+
Ta usarekto ti mannakabalin nga imak maibusor kadagiti agnanaed iti daga,” kuna ni Jehova.
13 “Nanumo man wenno natan-ok, naagumda amin iti material a gunggona;+Propeta man wenno padi, tunggal maysa ket mangsasaur.+
14 Sinsinan* ti panangpadasda a mangpaimbag iti sugat* ti ilik, nga ibagbagada,‘Adda talna! Adda talna!’
Idinto ta awan ti talna.+
15 Mabainda kadi kadagiti makaparurod nga inaramidda?
Saan a pulos!
Dida pay ketdi ammo ti rikna ti mabainan!+
Isu a mapapataydanto a kadua dagiti napapatayen.
Maitibkoldanto inton dusaek ida,” kuna ni Jehova.
16 Daytoy ti imbaga ni Jehova:
“Agtakderkayo kadagiti nagsangaan ti dalan ket kumitakayo.
Agsaludsodkayo maipapan kadagiti nagkauna a dalan,Damagenyo no ayan ti nasayaat a dalan, ket magnakayo iti dayta,+Ket makainanakayonto.”
Ngem kunada: “Saankaminto a magna iti dayta.”+
17 “Ket nangdutokak kadagiti parabantay+ a nangibaga,‘Ipangagyo ti uni ti tangguyob!’”+
Ngem imbagada: “Saanminto nga ipangag.”+
18 “Denggenyo ngarud, O dakayo a nasion!
Ken ammuenyo, O dakayo a tattao,Ti mapasamakto kadakuada.
19 Imdengam, O daga!
Mangyegak iti kalamidad kadagitoy a tattao+Gapu kadagiti dakes a pampanunotda,Ta saanda nga impangag dagiti imbagakKen dida tinungpal ti lintegko.”*
20 “Ania ti serserbina kaniak ti panangtedyo iti olibano manipud ShebaKen iti nabanglo a ruot manipud iti adayo a lugar?
Saanko nga awaten dagiti sibubukel a datonyo a mapuoran,Ken saanak a maragsakan kadagiti datonyo.”+
21 Gapuna, daytoy ti imbaga ni Jehova:
“Mangikabilak kadagiti pakaitibkolan dagitoy a tattao,Ket maitublakdanto kadagita,Ken mataydanto amin,Dagiti amma ken annak,Ti kaarruba ken ti kaduana.”+
22 Daytoy ti imbaga ni Jehova:
“Kitaenyo! Um-umay dagiti tattao manipud iti pagilian iti amianan,Ket mariingto ti maysa a dakkel a nasion manipud kadagiti kaadaywan a paset ti daga.+
23 Agiggemdanto kadagiti pana ken pika.
Naulpitda ken saandanto a maasian.
Dumaranudor a kas ti baybay ti bosesda,Ken nakakabalioda.+
Nakasaganada a manggubat kenka, O anak a babai ti Sion.”
24 Nangngegmi ti damag maipapan iti dayta.
Agkakapuyen dagiti imami.+Permi ti pannakariribukmi,Marigrigatankami* a kas iti agan-anak a babai.+
25 Dika mapan iti tay-ak,Ken dika magna iti dalan,Ta nakaespada ti kalaban;Nakabutbuteng ti intero nga aglawlaw.
26 O anak a babai dagiti tattaok,Agbadoka iti nakersang a lupot+ ken agtulidtulidka iti dapdapo.
Agdung-awka iti napalalo ken agladingitka a kas iti natayan iti kakaisuna nga anak,+Ta bigla nga umay ti mangdadael kadatayo.+
27 “Kadagiti tattaok, pinagbalinka* a panggugor iti metal,Ta masapul nga ammuem ti pudno a kasasaadda;Masapul a sukimatem ken usigem dagiti ar-aramidenda.
28 Napalalo ti kinasukirda amin,+Agpagnapagnada kas mangpadpadakes.+
Kasda la gambang ken landok;Agar-aramidda amin iti dakes.
29 Inkagumaan ti trabahador a pagbalinen a puro ti metal.
Pinuoranna dagiti anguyob a pinangparangrangna iti apuy.
Ngem awan serserbi ti panagreggetna ta buli laeng ti rimmuar iti apuy,+Dagiti managdakdakes ket saan a naisina kadagiti tattao.+
30 Sigurado a nailaksid a pirak ti pangawag kadakuada dagiti tattao,Ta inlaksid ida ni Jehova.”+
Footnotes
^ Lit., “Pagbalinenyo a nasantuan ti.”
^ Wenno “presko.”
^ Lit., “Saan a nakugit dagiti lapayagda.”
^ Lit., “dagiti aduanen iti al-aldaw.”
^ Wenno “bullo.”
^ Wenno “Parparawpaw.”
^ Wenno “instruksionko.”
^ Lit., “Mariknami ti ut-ot ti panagpasikal.”
^ Kayatna a sawen, ni Jeremias.
