Jeremias 46:1-28
46 Daytoy ti kinuna ni Jehova ken propeta Jeremias maipapan kadagiti nasion:+
2 Para iti Egipto,+ maipapan iti armada ni Faraon Neco+ nga ari ti Egipto, nga adda iti igid ti karayan Eufrates ken inabak ni Ari Nabucodonosor* ti Babilonia idiay Carkemis, idi maikapat a tawen ti panagturay ti anak ni Josias a ni Jehoiakim+ nga ari ti Juda:
3 “Isaganayo dagiti sarapa* ken dadakkel a kalasagyo,Ket umabantekayo a makigubat.
4 Dakayo a kumakabalio, isaganayo dagiti kabalio ket agsakaykayo.
Agtakderkayo ken isuotyo dagiti helmetyo.
Pasilengenyo dagiti gayang ken isuotyo ti kabalyo.
5 ‘Apay a makitkitak ida a mabutbuteng?
Umat-atrasda, maab-abak dagiti soldadoda.
Nagtatarayda gapu iti butengda, saan a timmaltaliaw dagiti soldadoda.
Nakabutbuteng ti aglawlaw,’ kuna ni Jehova.
6 ‘Saan a makalibas dagiti nasiglat, ken saan a makatalaw dagiti soldado.
Iti amianan, idiay igid ti Karayan Eufrates,Naitibkol ken natumbada.’+
7 Asino daytoy um-umay a kas iti Karayan Nilo,Kas kadagiti karayan a napegges dagiti danumda?
8 Um-umay ti Egipto kas iti Karayan Nilo,+Kas kadagiti karayan a napegges dagiti danumda.Ket ibagana, ‘Mapanko layusen ti daga.
Dadaelek ti siudad ken dagiti umilina.’
9 Umabantekayo, dakayo a kabalio!
Partakanyo ti tumaray, dakayo a karuahe!
Umabante koma dagiti soldado,Da Cus ken Put a mangig-iggem iti kalasag,+Ken dagiti Ludim+ a mangig-iggem ken mangisagsagana* iti pana.+
10 “Dayta ti aldaw ti Kangatuan* nga Apo, ni Jehova a panguluen dagiti armada. Dayta ti aldaw a panangbalesna kadagiti kabusorna. Ket mangpapatayto ti espada ken mapnekto dayta ken mabsogto iti darada, ta ti Kangatuan nga Apo, ni Jehova a panguluen dagiti armada, ket agidaton* iti daga ti amianan idiay igid ti Karayan Eufrates.+
11 Mapanka idiay Gilead tapno mangalaka iti balsamo,+O birhen nga anak a babai ti Egipto.
Awan serserbi ti adu a pamuspusam,Ta awan ti makaagas kenka.+
12 Nadamag dagiti nasion ti pannakaibabainmo,+Ken nangngeg ti intero a pagilian ti ikkismo.
Ta agdidinnungpar dagiti soldado,Ken agpapadada a matumba.”
13 Daytoy ti kinuna ni Jehova ken propeta Jeremias maipapan iti iyuumay ni Ari Nabucodonosor* ti Babilonia tapno rautenna ti Egipto:+
14 “Ipakaammom idiay Egipto, iwaragawagmo idiay Migdol.+
Iwaragawagmo idiay Nof* ken Tapanhes.+
Ibagam, ‘Agtakderkayo ken agsaganakayo,Ta adda espada a mangpapatay iti amin nga adda iti aglawlawyo.
15 Apay a natuang dagiti nabileg a lallakiyo?
Saanda ngamin a nagtalinaed iti pagtaktakderanda,Ta intumba ida ni Jehova.
16 Nakaad-adu dagiti maitibtibkol ken matumtumba.
Ibagbagada iti maysa ken maysa:
“Tumakderkayo! Agsublitayo kadagiti kailiantayo ken iti daga a nakayanakantayoGapu iti naranggas nga espada.”’
17 Impakaammoda sadiay,‘Napangas ni Faraon nga ari ti Egipto ngem awan serserbi ti ar-aramidenna,Pinalabasna ti oportunidad.’*+
18 ‘Ikarik,’ kuna ti Ari ken sibibiag a Dios a ti naganna ket Jehova a panguluen dagiti armada,‘Isu* ket umay a kas iti Tabor+ iti kabambantayanKen kas iti Carmelo+ iti igid ti baybay.
19 Isaganam ti bagahem a pumanaw,O babai nga aggigian iti Egipto.
Ta agbalinto a nakabutbuteng ti Nof;*Mapuoranto* ken saanton a mapagnaedan.+
20 Ti Egipto ket kas iti napintas a kabaian a baka.Ngem addanto dagiti mangkagat kenkuana a sepsep manipud amianan.
21 Uray no dagiti tinangdananda a soldado ket kasda la kadagiti nalukmeg a baka,Immatrasda met ken nagtatarayda a pimmanaw.
Saanda a nagtalinaed iti pagtaktakderanda,+Ta dimtengen ti aldaw ti pannakadidigrada,Ti tiempo ti pannakasingirda.’
22 ‘Kas iti aguy-uyas nga uleg ti karasakasna,Ta nakaiggemda kadagiti wasay a mangraut kenkuana,Kas kadagiti lallaki nga agpukpukan iti kayo.*
23 Kalbuendanto ti bakirna,’ kuna ni Jehova, ‘uray no kasla saan a maasak dayta.
Ta ad-aduda ngem kadagiti saan a mabilang a dudon.
24 Ta maibabainto ti anak a babai ti Egipto.
Mayawatto kadagiti tattao iti amianan.’+
25 “Imbaga ni Jehova a panguluen dagiti armada, ti Dios ti Israel: ‘Dusaekon ni Amon+ iti siudad ti No,*+ ni Faraon, ti Egipto, dagiti diosna,+ ken dagiti arina; wen, ni Faraon ken amin nga agtaltalek kenkuana.’+
26 “‘Ket itedkonto ida kadagiti mayat a mangala iti biagda,* ken ni Ari Nabucodonosor* ti Babilonia+ ken kadagiti adipenna. Ngem kalpasanna, mapagnaedanto manen a kas idi un-unana,’ kuna ni Jehova.+
27 ‘Saanka nga agbuteng, adipenko a Jacob,Ken saanka nga agamak, O Israel.+
Ta manipud iti adayo, isalakankaKen ti kaputotam* manipud iti nakaipananda a daga.+
Agsublinto ni Jacob a kalmado ken di maan-ano,Ta awanto ti pagbutnganda.+
28 Isu a saanka a mabuteng, adipenko a Jacob,’ kuna ni Jehova, ‘ta addaak kenka.
Ta pukawekto ti amin a nasion a nangiwarawaraak kenka,+Ngem saankanto a pukawen.+
Disiplinaenkanto* iti maitutop a pamay-an,+Ngem dikanto pulos baybay-an a saan a madusa.’”
Footnotes
^ Lit., “Nabucodorosor,” sabali pay nga ispelingna.
^ Bassit a kalasag a masansan nga awiten dagiti pumapana.
^ Lit., “mangpilpilko babaen ti saka.”
^ Wenno “Soberano.”
^ Wenno “mangpatay.”
^ Lit., “Nabucodorosor,” sabali pay nga ispelingna.
^ Wenno “Memfis.”
^ Lit., “naituding a tiempo.”
^ Kayatna a sawen, ti mangsakup manipud iti Egipto.
^ Wenno “Memfis.”
^ Wenno mabalin a, “Mabaybay-anto.”
^ Wenno “agur-urnong kadagiti pedaso a kayo.”
^ Kayatna a sawen, ti Tebes.
^ Lit., “Nabucodorosor,” sabali pay nga ispelingna.
^ Wenno “mangbirbirok iti kararuada.”
^ Lit., “bin-im.”
^ Wenno “Ilintegkanto.”
