Jeremias 45:1-5
-
Mensahe ni Jehova ken Baruc (1-5)
45 Idi maikapat a tawen ti anak ni Josias a ni Jehoiakim+ nga ari ti Juda, daytoy ti imbaga ni propeta Jeremias ken Baruk+ nga anak ni Nerias idi insuratna iti libro dagitoy a sasao nga indiktar ni Jeremias:+
2 “Daytoy ti kuna ni Jehova a Dios ti Israel maipapan kenka, Baruk,
3 ‘Imbagam: “Kaasiak met ta ti rigatko ket ninayonan ni Jehova iti ladingit! Nabannogakon a malidlidayan, ket awan ti nasarakak a paginanaak.”’
4 “Masapul nga ibagam kenkuana, ‘Daytoy ti kuna ni Jehova: “Kitaem! Rebbaek ti binangonko, ket parutek ti immulak—ti intero a pagilian.+
5 Ngem agsapsapulka* iti naindaklan a bambanag para iti bagim. Isardengmo ti agsapul kadagita.”’
“‘Ta dandanin ti panangdidigrak iti amin a lasag,’*+ kuna ni Jehova, ‘ket isalakankonto ti biagmo* iti sadinoman a papanam.’”+
