Jeremias 44:1-30
44 Daytoy ti mensahe a naited ken Jeremias para iti amin a Judio nga aggigian idiay Egipto,+ kadagidiay aggigian idiay Migdol,+ Tapanhes,+ Nof,*+ ken daga ti Patros:+
2 “Daytoy ti imbaga ni Jehova a panguluen dagiti armada, ti Dios ti Israel, ‘Nakitayo ti amin a didigra nga inyegko iti Jerusalem+ ken iti amin a siudad iti Juda. Ita, rebrebba dagitan ken awanen ti agnanaed.+
3 Gapu dayta kadagiti dakes nga inaramidda tapno rurodendak. Nagdaton+ ken nagserbida kadagiti sabali a dios a dida am-ammo, a saanyo nga am-ammo ken saan nga am-ammo dagidi ammayo.+
4 Maulit-ulit nga imbaonko kadakayo* ti amin nga adipenko a propeta tapno ibagada: “Pangngaasiyo ta diyo aramiden daytoy makarimon a banag a kagurak.”+
5 Ngem saanda a dimngeg wenno nangipangag tapno isardengda ti dakes nga aramidda a panagdaton kadagiti sabali a dios.+
6 Isu a naibuyat ti pungtot ken ungetko a nangpuor kadagiti siudad iti Juda ken kadagiti kalsada iti Jerusalem. Nadadael ken nalangalang dagita kas iti kasasaadda ita.’+
7 “Ita, daytoy ti imbaga ni Jehova a Dios dagiti armada, ti Dios ti Israel, ‘Apay a mangar-aramidkayo iti pakadidigraanyo, a pakatayan ti tunggal lalaki, babai, ubing, ken maladaga iti Juda, ket awan mabati kadakayo?
8 Apay a pagpungtotendak kadagiti ar-aramidenyo a panagdaton kadagiti sabali a dios iti Egipto a nagyananyo idi? Mataykayto ket ilunod ken um-umsiendakayto ti amin a nasion iti daga.+
9 Nalipatanyo kadin dagiti dakes nga inaramid dagidi ammayo ken dagiti dakes nga inaramid ti ar-ari ti Juda+ ken dagiti dakes nga inaramid dagiti assawada,+ agraman dagiti dakes nga inaramidyo ken dagiti dakes nga inaramid dagiti assawayo+ idiay Juda ken kadagiti kalsada ti Jerusalem?
10 Agingga ita nga aldaw, saanda a nagpakumbaba,* saanda a nagbuteng kaniak,+ ken saanda a sinurot ti bilin ken dagiti lintegko kadakayo ken kadagidi ammayo.’+
11 “Isu nga imbaga ni Jehova a panguluen dagiti armada, ti Dios ti Israel, ‘Inkeddengkon a didigraenkayo tapno madadael ti intero a Juda.
12 Alaekto dagiti nabati iti Juda a desidido a mapan agyan idiay Egipto, ket mataydanto amin idiay Egipto.+ Mataydanto iti espada ken nakaro a bisin: nanumo man wenno natan-ok, mataydanto iti espada ken nakaro a bisin. Agbalindanto a lunod, nakabutbuteng, malalais, ken mauy-uyaw.+
13 Dusaekto dagidiay agnanaed idiay Egipto, kas iti panangdusak iti Jerusalem iti espada, nakaro a bisin, ken makapapatay a sakit.+
14 Dagiti nabati iti Juda a napan nagyan idiay Egipto ket saanto a makalasat wenno maisalakan tapno agsubli idiay Juda. Kailiwdanto ti agsubli ken agyan sadiay, ngem didanto agsubli, malaksid iti sumagmamano a nakatalaw.’”
15 Amin a lallaki a makaammo nga agidatdaton dagiti assawada kadagiti sabali a dios ken amin nga assawa a babbai a nakatakder sadiay, kas dakkel a grupo, ken amin a tattao nga aggigian idiay Egipto,+ idiay Patros,+ insungbatda ken Jeremias:
16 “Saanmi nga ipangag ti imbagam kadakami iti nagan ni Jehova.
17 Aramidenmi ketdi ti amin nga imbagami, nga agdatonkami iti Reyna ti Langit* ken mangibukbokkami kenkuana iti daton nga inumen,+ kas iti inaramidmi ken dagidi ammami, ar-arimi, ken piprinsipemi kadagiti siudad iti Juda ken kadagiti kalsada iti Jerusalem, idi mapmapnekkami iti tinapay ken nabaknangkami, idi awan a pulos ti nakitami a didigra.
18 Manipud idi insardengmi ti agdaton iti Reyna ti Langit* ken mangibukbok kenkuana iti daton nga inumen, agkurkurangkamin iti amin a kasapulanmi ken matmataykamin iti espada ken nakaro a bisin.”
19 Imbaga met dagiti babbai: “Idi agidatdatonkami iti Reyna ti Langit* ken mangibukbukbokkami kenkuana iti daton nga inumen, saan aya nga immanamong dagiti assawami iti panangaramidmi kadagiti idatonmi a tinapay a kas iti sukog ti ladawanna ken ti panangibukbokmi kenkuana iti daton nga inumen?”
20 Imbaga ni Jeremias iti amin a tattao, kadagiti lallaki ken assawada ken iti amin nga umili a nakisarita kenkuana:
21 “Ammo ni Jehova ken dina malipatan dagiti indatonyo ken indaton dagidi ammayo, ar-ariyo, piprinsipeyo, ken dagiti umili kadagiti siudad iti Juda ken kadagiti kalsada iti Jerusalem!+
22 Kamaudiananna, saanen a naanusan ni Jehova dagiti dakes nga aramidyo ken dagiti makaparurod nga inaramidyo, isu a ti dagayo ket nagbalin a langalang, nakabutbuteng ken lunod, nga awanan iti agnanaed a kas ita.+
23 Nagidatdatonkayo ngamin ken nagbasolkayo ken Jehova ta saankayo a nagtulnog ken Jehova, ken diyo sinurot dagiti linteg, bilin, ken pammalagipna, isu a napasamak kadakayo daytoy a didigra a kas ita.”+
24 Intuloy nga imbaga ni Jeremias iti amin nga umili ken babbai: “Denggenyo ti kinuna ni Jehova, dakayo amin a taga-Juda nga adda iti Egipto.
25 Daytoy ti imbaga ni Jehova a panguluen dagiti armada, ti Dios ti Israel, ‘Inaramidyo ken dagiti assawayo dagiti mismo nga imbagayo, ta kinunayo: “Sigurado a tungpalenmi dagiti karimi nga agdatonkami iti Reyna ti Langit* ken mangibukbokkami kenkuana iti daton nga inumen.”+ Dakayo a babbai, sigurado a tungpalen ken aramidenyo dagiti kariyo.’
26 “Denggenyo ngarud ti imbaga ni Jehova, dakayo amin a taga-Juda nga aggigian idiay Egipto, ‘“Isapatak iti naindaklan a naganko,” kuna ni Jehova, “a ti naganko ket saanton nga usaren ti asinoman a tao ti Juda+ iti intero nga Egipto a kunana, ‘Isapatak iti nagan ti sibibiag a Kangatuan* nga Apo Jehova!’+
27 Bantayak ida tapno maiyeg ti didigra ken saan a ti nasayaat a banag;+ matayto iti espada ken nakaro a bisin ti amin a lallaki ti Juda nga adda idiay Egipto, agingga nga awanen ti mabati kadakuada.+
28 Manmanonto laeng ti makalisi iti espada ken agsubli iti Juda manipud idiay Egipto.+ Maammuanto ti amin a nabati iti Juda a napan nagyan idiay Egipto no makinsao ti pimmudno, ti imbagak wenno ti imbagada!”’”
29 “‘Ket daytoy ti pagilasinan kadakayo,’ kuna ni Jehova, ‘a dusaenkayo iti daytoy a lugar, tapno maammuanyo a talaga a pumayso dagiti imbagak a didigra a mapasamak kadakayo.
30 Daytoy ti imbaga ni Jehova: “Itedko ni Faraon Hofra nga ari ti Egipto kadagiti kabusorna ken kadagidiay mayat a mangala iti biagna,* kas iti panangtedko ken Ari Zedekias ti Juda iti kabusorna ken mayat a mangala iti biagna* a ni Ari Nabucodonosor* ti Babilonia.”’”+
Footnotes
^ Wenno “Memfis.”
^ Lit., “Nasapaak a bimmangon ken imbaonko.”
^ Wenno “nakarikna iti pannakailupitlupit.”
^ Ti titulo ti maysa a diosa a nagdaydayawan dagiti apostata nga Israelita; mabalin a diosa ti kinabunga.
^ Ti titulo ti maysa a diosa a nagdaydayawan dagiti apostata nga Israelita; mabalin a diosa ti kinabunga.
^ Ti titulo ti maysa a diosa a nagdaydayawan dagiti apostata nga Israelita; mabalin a diosa ti kinabunga.
^ Ti titulo ti maysa a diosa a nagdaydayawan dagiti apostata nga Israelita; mabalin a diosa ti kinabunga.
^ Wenno “Soberano.”
^ Wenno “mangbirbirok iti kararuana.”
^ Wenno “mangbirbirok iti kararuana.”
^ Lit., “Nabucodorosor,” sabali pay nga ispelingna.
