Jeremias 42:1-22
42 Amin a pangulo ti armada ken da Johanan+ nga anak ni Karea, Jezanias nga anak ni Osaias, ken amin nga umili, nanumo man wenno natan-ok ket immasideg
2 ken propeta Jeremias sada imbaga: “Pangngaasim ta denggem ti panagpakaasimi, ket ikararagannakami ken Jehova a Diosmo, agraman dagitoy amin a nabati,+ ta manmanodan kas iti makitam.
3 Ibaga koma kadakami ni Jehova a Diosmo ti dalan a rumbeng a pagnaanmi ken rumbeng nga aramidenmi.”
4 Insungbat ni propeta Jeremias: “Nangngegkayo, ket agkarkararagak ken Jehova a Diosyo kas iti kiniddawyo. Ibagakto kadakayo ti amin nga isungbat ni Jehova. Awanto ti ilimedko.”
5 Insungbatda ken Jeremias: “Agbalin koma ni Jehova a pudno ken matalek a saksi kontra kadakami no saanmi nga aramiden ti amin nga imbaga ni Jehova a Diosmo nga aramidenmi.
6 Naimbag man wenno dakes, agtulnogkami iti ibaga ni Jehova a Diosmi, a pangibabaonanmi kenka tapno nasayaat ti pagbanaganmi gapu ta agtultulnogkami iti ibagbaga ni Jehova a Diosmi.”
7 Kalpasan ti 10 nga aldaw, adda imbaga ni Jehova ken Jeremias.
8 Isu nga inayabanna ni Johanan nga anak ni Karea ken ti amin a pangulo ti armada a kaduana ken ti amin nga umili, nanumo man wenno natan-ok.+
9 Imbagana kadakuada: “Daytoy ti kuna ni Jehova a Dios ti Israel, a nangibaonanyo kaniak a pangibagaak iti dawatyo:
10 ‘No talaga nga agtalinaedkayo iti daytoy a lugar, ibangonkayo ket saankayo a rebbaen, ket imulakayo ken saankayo a paruten, ta pagladingitak ti didigra nga inyegko kadakayo.+
11 Saankayo nga agbuteng iti ari ti Babilonia a pagbutbutnganyo.’+
“‘Saankayo nga agbuteng kenkuana,’ kuna ni Jehova, ‘ta addaak kadakayo, tapno isalakan ken alawenkayo iti imana.
12 Kaasiankayto,+ ket kaasiannakayto ken isublinakayo iti dagayo.
13 “‘Ngem no ibagayo: “Saan; saankaminto nga agtalinaed iti daytoy a lugar!” ken agsukirkayo ken Jehova a Diosyo,
14 ken kunayo: “Saan, mapankami ketdi idiay Egipto,+ ta awan ti gubat a makitami idiay wenno awan ti mangngegmi a tangguyob wenno saankami nga agbisin; idiay ti pagyananmi,”
15 denggenyo ngarud ti kuna ni Jehova, dakayo a nabati iti Juda. Daytoy ti imbaga ni Jehova a panguluen dagiti armada, ti Dios ti Israel: “No ipapilityo ti mapan agyan* idiay Egipto,
16 makamakamnakayto idiay Egipto ti espada a kabutbutengyo, ken surotennakayto idiay Egipto ti nakaro a bisin a kabutbutengyo, ket mataykayto sadiay.+
17 Amin a mangipapilit a mapan agyan idiay Egipto ket matayto iti espada, nakaro a bisin, ken makapapatay a sakit. Awanto ti makalasat wenno makalisi iti didigra nga iyegko kadakuada.”’
18 “Ta daytoy ti imbaga ni Jehova a panguluen dagiti armada, ti Dios ti Israel: ‘No kasano a naibuyat ti unget ken pungtotko kadagiti agnanaed iti Jerusalem,+ maibuyatto met kadakayo ti pungtotko no mapankayo idiay Egipto. Agbalinkayto a lunod, nakabutbuteng, malalais, ken mauy-uyaw,+ ken diyonton makita manen daytoy a lugar.’
19 “Nagsao ni Jehova maibusor kadakayo a nabati iti Juda. Dikay mapan idiay Egipto. Laglagipenyo a pinakdaarankayo ita nga aldaw
20 a ti biagyo* ti kasukat ti kamaliyo. Ta imbaondak ken Jehova a Diosyo, nga ibagbagayo, ‘Ikararagannakami ken Jehova a Diosmi, ken ibagam ti amin nga imbaga ni Jehova a Diosmi, ket aramidenminto dayta.’+
21 Ket ita, imbagakon kadakayo, ngem saankayto nga agtulnog iti ibaga ni Jehova a Diosyo wenno saanyo nga aramiden ti aniaman nga impaibagana kaniak kadakayo.+
22 Gapuna, ammuenyo a sigurado a mataykayonto iti espada, nakaro a bisin, ken makapapatay a sakit iti lugar a kayatyo a papanan ken pagyanan.”+
