Jeremias 34:1-22
34 Ti mensahe ni Jehova ken Jeremias idi a ni Ari Nabucodonosor* ti Babilonia, ti intero nga armadana, ti amin a pagarian ditoy daga nga iturturayanna, ken ti amin a tattao ket makilablaban iti Jerusalem ken iti amin a siudadna:+
2 “Daytoy ti imbaga ni Jehova a Dios ti Israel, ‘Inka ibaga ken Ari Zedekias+ ti Juda: “Daytoy ti imbaga ni Jehova, ‘Itedko daytoy a siudad iti ari ti Babilonia ket puorannanto.+
3 Saankanto a makalibas kenkuana ta sigurado a tiliwendaka ken iyawatdaka kenkuana.+ Makitamto a personal ti ari ti Babilonia ket makisaritanto kenka iti rupanrupa, ken mapankanto idiay Babilonia.’+
4 Ngem denggem ti kinuna ni Jehova, O Ari Zedekias ti Juda, ‘Daytoy ti ibaga ni Jehova maipapan kenka: “Saankanto a matay iti espada.
5 Natalnanto ti ipapataymo,+ ket addanto seremonia a panangpuor iti insienso para kenka a kas iti inaramidda kadagidi ammam, dagidi ar-ari nga immun-una ngem sika. Isangitdanto, ‘Kaasika pay nga arimi!’ ta ‘imbagak ti mensahe,’ kuna ni Jehova.”’”’”
6 Imbaga ngarud amin dagitoy ni propeta Jeremias iti ari ti Juda a ni Zedekias idiay Jerusalem,
7 idi makilablaban dagiti armada ti ari ti Babilonia maibusor iti Jerusalem ken iti amin a nabati a siudad iti Juda,+ maibusor iti Lakis+ ken iti Azeka;+ ta dagita laengen ti nabati a napaderan a siudad kadagiti siudad iti Juda.
8 Ti mensahe ni Jehova ken Jeremias kalpasan a nakitulag ni Ari Zedekias iti amin a tattao idiay Jerusalem tapno iwaragawagna ti panangwayawaya kadakuada,+
9 a masapul a wayawayaan ti tunggal maysa dagiti adipenna a Hebreo a lallaki ken babbai, tapno awan ti agtultuloy a mangadipen iti padana a Judio.
10 Nagtulnog ngarud ti amin a prinsipe ken tattao. Sinurotda ti tulagan a masapul a wayawayaan ti tunggal maysa dagiti adipenda a lallaki ken babbai tapno saandan nga agtalinaed nga adipen. Nagtulnogda ket pinalubosanda idan a pumanaw.
11 Ngem kalpasanna, innalada met laeng dagiti winayawayaanda nga adipen a lallaki ken babbai, ket pinilitda ida nga agpaadipen manen.
12 Isu a daytoy ti mensahe ni Jehova ken Jeremias manipud ken Jehova:
13 “Daytoy ti imbaga ni Jehova a Dios ti Israel, ‘Nakitulagak kadagidi ammayo+ idi inruarko ida idiay Egipto a nakaadipenanda+ a kinunak:
14 “Iti ngudo ti pito a tawen, rumbeng a pagawiden ti tunggal maysa kadakayo ti kabsatna a Hebreo a nailako ken nagserbi kadakayo iti innem a tawen; rumbeng a wayawayaanyo.”+ Ngem saandak a dinengngeg wenno impangag dagidi ammayo.
15 Ket itay nabiit,* nagbalbaliwkayo ken inaramidyo ti umiso iti imatangko ta inwaragawagyo ti pannakawayawaya dagiti padayo a tattao, ken nakitulagkayo kaniak iti balay a nakaipanaganan ti naganko.
16 Ngem inaramidyo manen ti di umiso ken imbabainyo ti naganko+ ta pinagsubliyo dagiti lallaki ken babbai nga adipenyo a winayawayaanyo idin tapno mapatgan ti tarigagayda,* ket pinilityo ida nga agpaadipen manen.’
17 “Gapuna, daytoy ti imbaga ni Jehova, ‘Saanyo a tinungpal ti imbagak nga iwaragawagyo ti pannakawayawaya ti kabsatyo ken padayo a tao.+ Isu nga ikkankayo ita iti wayawaya,’ kuna ni Jehova, ‘wayawaya a matay iti espada, makapapatay a sakit, ken nakaro a bisin,+ ket pagbalinenkayto a nakabutbuteng iti amin a pagarian iti daga.+
18 Daytoy ti mapasamakto kadagiti tattao a saan a nangtungpal iti tulagko ta saanda a sinurot ti pannakitulagda kaniak idi ginuduada ti urbon a baka ken limmasatda iti tengngana.+
19 Isuda dagiti prinsipe ti Juda, prinsipe ti Jerusalem, opisial ti palasio, papadi, ken amin nga umili iti daga a limmasat iti tengnga ti nagudua nga urbon a baka:
20 Itedkonto ida kadagiti kabusorda ken kadagidiay mayat a mangpapatay kadakuada. Dagiti bangkayda ket kanento dagiti billit iti tangatang ken animal iti daga.+
21 Itedkonto ti ari ti Juda a ni Zedekias ken dagiti prinsipena kadagiti kabusorda ken iti ima dagiti mayat a mangpapatay kadakuada ken kadagiti armada ti ari ti Babilonia,+ nga umat-atras kadakayo.’+
22 “‘Itedko ti bilin,’ kuna ni Jehova, ‘ket isublikto ida iti daytoy a siudad, ket makilabandanto iti dayta, sakupenda dayta ken puoranda;+ ket pagbalinekto a langalang dagiti siudad iti Juda ken awanto metten ti agnaed iti dayta.’”+
