Jeremias 33:1-26

  • Naikari ti pannakaisubli (1-13)

  • Kinatalged iti sidong ti “nalinteg a saringit” (14-16)

  • Tulag ken David ken kadagiti papadi (17-26)

    • Tulag maipapan iti aldaw ken rabii (20)

33  Kinuna ni Jehova ken Jeremias iti maikadua a daras, bayat a nakapupok pay laeng iti Paraangan ti Guardia:+ 2  “Daytoy ti imbaga ni Jehova a Nangaramid iti daga, ni Jehova a nangparsua ken sititibker a nangipasdek iti dayta; Jehova ti naganna, 3  ‘Awagannak, ket sungbatankanto ken nakasaganaak a mangibaga kenka iti naindaklan ken di maawatan a bambanag a saanmo pay nga ammo.’”+ 4  “Ta daytoy ti imbaga ni Jehova a Dios ti Israel maipapan kadagiti balay iti daytoy a siudad ken balbalay ti ar-ari ti Juda a narakrak gapu kadagiti naipalawlaw a bunton ken iti espada,+ 5  ken maipapan kadagidiay um-umay a makilaban kadagiti Caldeo, ken mangpunno kadagitoy a lugar iti bangkay dagidiay pinatayko gapu iti unget ken pungtotko, dagidiay tinallikudak iti daytoy a siudad gapu iti kinadakesda: 6  ‘Paimbagekto ken pasalun-atek; ket paimbagekto+ ken ipaayakto ida iti naruay a talna ken kinapudno.+ 7  Isublikto dagiti naipanaw iti Juda ken Israel,+ ket pabilgek ida a kas idi damo.+ 8  Dalusakto ida iti amin a basolda kaniak,+ ken pakawanekto ti amin a basol ken kamalida kaniak.+ 9  Agbalinto a pakaitan-okak, pakaidaydayawak, ken pakaipadayagak iti amin a nasion ti daga a makangngeg iti amin a nasayaat nga ipapaayko kadakuada.+ Ket agbuteng ken agsiddaawdanto+ gapu iti amin a kinasayaat ken talna nga ipapaayko kenkuana.’”+ 10  “Daytoy ti imbaga ni Jehova: ‘Iti daytoy a lugar a kunayo a langalang, nga awanan iti tao wenno taraken nga animal, kadagiti siudad ti Juda ken kadagiti kalsada ti Jerusalem a nalangalang, nga awanan iti tao wenno agnanaed wenno taraken nga animal, mangngegto manen 11  ti uni ti panagragsak ken panagrag-o,+ ti timek ti nobio ken ti nobia, ti timek dagidiay agkunkuna: “Agyamankayo ken Jehova a panguluen dagiti armada, ta naimbag ni Jehova;+ agnanayon ti napudno nga ayatna!”’+ “‘Mangyegdanto kadagiti daton ti panagyaman iti balay ni Jehova,+ ta isublikto dagiti naipanaw iti daga a kas idi damo,’ kuna ni Jehova.” 12  “Daytoy ti imbaga ni Jehova a panguluen dagiti armada: ‘Iti daytoy a langalang, nga awanan iti tao wenno taraken nga animal, addanto manen dagiti pagpaaraban dagiti pastor kadagiti arbanda.’+ 13  “‘Kadagiti siudad iti kabambantayan, kadagiti siudad iti kapatagan, kadagiti siudad iti abagatan, iti daga ti Benjamin, kadagiti aglawlaw ti Jerusalem,+ ken kadagiti siudad ti Juda,+ bilangento manen dagiti pastor ti arbanda,’ kuna ni Jehova.” 14  “‘Kitaenyo! Um-umayen dagiti aldaw,’ kuna ni Jehova, ‘inton tungpalek ti nagsayaat nga inkarik maipapan iti sangakabbalayan ti Israel ken sangakabbalayan ti Juda.+ 15  Kadagita nga aldaw ken iti dayta a tiempo, mangpatuboak para ken David iti nalinteg a tarubong,*+ ket ipakatnanto ti hustisia ken kinalinteg iti daga.+ 16  Kadagita nga aldaw, maisalakanto ti Juda+ ket agnaedto a sitatalged ti Jerusalem.+ Ket daytoy ti mayawagto kenkuana: Ni Jehova ti Kinalintegtayo.’”+ 17  “Ta daytoy ti imbaga ni Jehova: ‘Kanayon nga addanto lalaki a miembro ti pamilia ni David nga agtugaw iti trono ti sangakabbalayan ti Israel,+ 18  ken kanayon nga addanto papadi a Levita nga agserbi iti sanguanak a mangidaton kadagiti sibubukel a daton a mapuoran, bukbukel a mapuoran, ken dadduma pay a daton.’” 19  Kinuna manen ni Jehova ken Jeremias: 20  “Daytoy ti imbaga ni Jehova, ‘No madadaelyo ti tulagko maipapan iti aldaw ken rabii, tapno saan a dumteng ti aldaw ken rabii iti umiso a tiempoda,+ 21  madadaelto metten ti tulagko iti adipenko a ni David,+ tapno awanto ti anakna nga agturay kas ari iti tronona,+ ken awanto metten ti agserbi kaniak a papadi a Levita.+ 22  No kasano a saan a mabilang ti armada ti langit ken ti darat ti baybay, kastanto met ti panangpaaduk iti kaputotan* ti adipenko a ni David ken kadagiti Levita nga agserserbi kaniak.’” 23  Kinuna manen ni Jehova ken Jeremias: 24  “Saanmo aya a nadlaw ti ibagbaga dagitoy a tattao, ‘Ilaksidto ni Jehova ti dua a pamilia a pinilina’? Ket saandan a raraemen dagiti tattaok, ken saanda idan nga ibilang kas maysa a nasion. 25  “Daytoy ti imbaga ni Jehova, ‘No kasano nga inaramidko a saan a mawaswas ti tulagko maipapan iti aldaw ken rabii,+ dagiti linteg ti langit ken daga,+ 26  diakto met pulos ilaksid ti kaputotan* ni Jacob ken ti adipenko a ni David, isu a kanayon nga addanto mangituray kadagiti kaputotan* ken iti sumarsaruno a henerasion* da Abraham, Isaac, ken Jacob. Ta ummongekto manen dagiti naipanaw kadakuada+ ken maasianakto kadakuada.’”+

Footnotes

Wenno “nga agtawid.”
Lit., “bin-i.”
Lit., “bin-i.”
Lit., “bin-i.”
Lit., “bin-i.”