Jeremias 3:1-25
3 Isaludsod dagiti tattao: “No papanawen ti maysa a lalaki ti asawana ket pumanaw ti babai ken agbalin nga asawa ti sabali a lalaki, rumbeng kadi a sublian ti lalaki ti asawana?”
Saan kadi a nakarugrugiten dayta a daga?+
“Adu a kakaduam ti nakidennaam,+Ket ita agsublika kaniak?” kuna ni Jehova.
2 “Tangadem ken kitaem dagiti kalbo a turod.
Sadino ti saanmo a nakaramesan?
Nagtugawka iti igid ti dalan a nagur-uray kadakuada,Kas iti maysa nga agakar-akar* iti let-ang.
Intultuloymo a rinugitan ti dagaBabaen ti panagbalangkantis ken kinadakesmo.+
3 Dayta ti makagapu a saan a nagtudo,+Ken saan a dimteng ti naladaw a tudo.
Nagpuskol ta rupam* a kas asawa a babai nga agbalbalangkantis;Dika man la nagbain.+
4 Ngem ita, ibagbagam kaniak,‘Amak, sikan ti kaduak manipud pay idi ubingak!+
5 Rumbeng aya a makapungtotka iti agnanayon,Wenno kanayon nga agsakit ti nakemmo?’
Dayta ti ibagbagam,Ngem ipappapasmo latta ti agaramid iti dakes.”+
6 Idi kaaldawan ni Ari Josias,+ imbaga kaniak ni Jehova: “‘Nakitam kadi ti saan a kinamatalek ti Israel? Napan iti tunggal nangato a bantay ken iti sirok ti tunggal narukbos a kayo tapno agbalangkantis.+
7 Uray kalpasan nga inaramidna amin dagita, kanayon nga imbagak kenkuana nga agsubli kaniak,+ ngem saan a nagsubli; ket kanayon a nakita ti Juda ti ar-aramiden ti manangallilaw a kabsatna a babai.+
8 Idi nakitak dayta, pinapanawko ti saan a matalek nga Israel ket intedko ti kompleto a kasuratan ti diborsio+ gapu iti pannakikamalalana.+ Ngem saan a nagbuteng ti Juda, ti manangallilaw a kabsatna a babai; nagbalangkantis met.+
9 Tinagtagilag-anna ti panagbalangkantisna, ken intultuloyna a rinugitan ti daga ken nakikamkamalala kadagiti bato ken kayo.+
10 Iti laksid amin dagitoy, saan a naimpusuan a nagsubli kaniak ti Juda a manangallilaw a kabsatna. Naginsusubli laeng,’ kuna ni Jehova.”
11 Isu nga imbaga kaniak ni Jehova: “Impakita ti saan a matalek nga Israel nga isu ket nalinlinteg ngem ti Juda a manangallilaw a kabsatna.+
12 Mapanka iti amianan ket ipakaammom daytoy a mensahe:+
“‘“Agsublika, O rebelioso nga Israel,” kuna ni Jehova.’+ ‘“Diakto makaunget a kumita* kenka,+ ta napudnoak,” kuna ni Jehova.’ ‘“Saan nga agsakit ti nakemko iti agnanayon.
13 Isuna laeng ta aminem a nagbasolka, ta nagrebeldeka ken Jehova a Diosmo. Intultuloymo ti nakirelasion* kadagiti estranghero* iti sirok ti tunggal narukbos a kayo ngem dimo impangag ti timekko,” kuna ni Jehova.’”
14 “Agsublikayo, dakayo a rebelioso nga annak,” kuna ni Jehova. “Ta nagbalinak a pudpudno nga apoyo;* ket alaenkayto, maysa iti tunggal siudad ken dua iti tunggal pamilia, ket ipankayo idiay Sion.+
15 Ikkankayo kadagiti pastor a mangaramid iti pagayatak,*+ ket ipaayandakayto iti pannakaammo ken pannakatarus.
16 Umadu ken dumakkelto ti populasionyo iti daga kadagita nga aldaw,” kuna ni Jehova.+ “Saandanton nga ibaga, ‘Ti lakasa ti tulag ni Jehova!’ Saandanton a mapanunot wenno malagip wenno kailiw dayta, ken saanton a maaramid manen dayta.
17 Iti dayta a tiempo, awagandanto ti Jerusalem a trono ni Jehova;+ ken maipanto a sangsangkamaysa idiay Jerusalem+ ti amin a nasion tapno maidaydayaw ti nagan ni Jehova. Saandanto metten nga igagara ti agtulnog iti dakes a pusoda.”
18 “Kadagidiay nga aldaw, agkaduanto a magna dagiti tattao ti Juda ken tattao ti Israel.+ Aggapudanto iti daga ti amianan a mapan iti daga nga impatawidko kadagidi ammayo.+
19 Pinampanunotko, ‘Maragsakanak unay a nangikabil kenka iti tengnga dagiti annakko ken inikkanka iti napintas a daga, ti kapipintasan a tawid kadagiti nasion!’*+ Impagarupko met nga awagannak iti, ‘Amak!’ ken kanayonto a sumurotka kaniak.
20 ‘Kas iti manangallilaw a babai a nangpanaw ken lakayna,* kasta met ti inaramidyo, O tattao ti Israel, talaga nga inallilawdak,’+ kuna ni Jehova.”
21 Adda nangngeg nga uni iti tapaw dagiti kalbo a turod,Ti panagsangit ken panagpakpakaasi ti tattao ti Israel.Ta inaramidda a killokillo ti dalanda;Linipatda ni Jehova a Diosda.+
22 “Agsublikayo, dakayo a rebelioso nga annak.
Ilintegkonto ti rebelioso a kasasaadyo.”+
“Adtoykami! Immaykami kenka,Ta sika, O Jehova, ti Diosmi.+
23 Linoklokomi laeng ti bagimi idi nagdaydayawkami kadagiti didiosen iti tapaw dagiti turod ken bantay.+
Talaga a ni Jehova a Diosmi ti mangisalakan iti Israel.+
24 Manipud idi ubbingkami, inibus ti nakababain a banag* ti nagbannogan dagidi ammami,+Dagiti karnero, kalding, ken bakada,Dagiti annakda a lallaki ken babbai.
25 Agiddatayo iti pakaibabainantayo,Ket abbongannatayo koma ti pannakaibabaintayo,Ta nagbasoltayo ken Jehova a Diostayo,+Datayo ken dagidi ammatayo manipud pay kinaubingtayo agingga ita nga aldaw,+Ken saantayo nga impangag ti timek ni Jehova a Diostayo.”
Footnotes
^ Lit., “Arabiano.”
^ Lit., “ti mugingmo.”
^ Lit., “pagdissuen ti rupak.”
^ Lit., “dagiti dalanmo.”
^ Wenno “ganggannaet a dios.”
^ Wenno mabalin nga, “asawa kadakayo.”
^ Lit., “pusok.”
^ Lit., “kadagiti armada dagiti nasion.”
^ Lit., “iti kaduana.”
^ Wenno “ti nakababain a dios.”
