Jeremias 22:1-30
22 Daytoy ti imbaga ni Jehova: “Mapanka iti balay* ti ari ti Juda, ket ipakaammom daytoy a mensahe.
2 Masapul nga ibagam, ‘Denggem ti kinuna ni Jehova, O ari ti Juda nga agtugtugaw iti trono ni David, sika agraman dagiti adipenmo ken kailiam, dagidiay sumsumrek kadagitoy a ruangan.
3 Daytoy ti imbaga ni Jehova: “Ipatungpalyo ti hustisia ken kinalinteg. Isalakanyo ti masasaur. Diyo maltratuen ti asinoman a ganggannaet a residente, ken saanyo a dangdangran ti asinoman nga awan amana nga ubing* wenno balo a babai.+ Ket saanyo a patayen ti asinoman nga inosente iti daytoy a lugar.+
4 Ta no siguraduenyo a tungpalen dagita, dagiti ngarud ari nga agtugtugaw iti trono ni David+ ket sumrekto kadagiti ruangan daytoy a balay, a nakasakay kadagiti karuahe ken kabalio, a kaduada dagiti adipen ken kailianda.”’+
5 “‘Ngem no dikay agtulnog kadagitoy a sasao, isapatak a mismo,’ kuna ni Jehova, ‘a madadaelto daytoy a balay.’+
6 “Ta daytoy ti kuna ni Jehova maipapan iti balay ti ari ti Juda,‘Para kaniak, kayarigam ti Gilead,Kas iti tapaw ti Lebanon.
Ngem pagbalinenkanto a let-ang;Awan ti uray maysa kadagiti siudadmo ti mapagnaedanto.+
7 Ket mangdutokakto* kadagiti mangdadael kenka,Awitto ti tunggal maysa dagiti armasna.+
Pukanendanto dagiti kasayaatan a sedromKet puoranda dagita.+
8 “‘Ket adu a nasion ti lumabasto iti daytoy a siudad ket agsisinnaludsodda: “Apay a kasta ti inaramid ni Jehova iti daytoy dakkel a siudad?”+
9 Ket isungbatdanto: “Saanda ngamin a tinungpal ti tulag ni Jehova a Diosda ket nagdayaw ken nagserbida kadagiti sabali a dios.”’+
10 Diyo sangitan daydiay natay,Ken dikay maasian kenkuana.
Sangitanyo ketdi daydiay pumanaw,Ta dinton agsubli a mangkita iti daga a nakayanakanna.
11 “Ta daytoy ti kuna ni Jehova maipapan ken Salum*+ nga anak ni Josias, ti ari ti Juda nga agturturay imbes a ni Josias nga amana,+ a pimmanaw iti daytoy a lugar: ‘Saanton nga agsubli pay iti daytoy a lugar.
12 Ta matayto iti lugar a nangipananda kenkuana, ket dinanton pulos makita daytoy a daga.’+
13 Kaasi met daydiay sinisuitik ti panangibangonna iti balaynaKen sinasaur ti panangaramidna kadagiti makinngato a kuartona,Pinagtrabahona ti padana a tao nga awan man la ti intedna,Ket dina man la inted ti tangdanna;+
14 Daydiay mangibagbaga, ‘Mangibangonakto iti dakkel a balaykoNga addaan iti nalalawa a kuarto iti ngato.
Iyaramidakto kadagiti tawaKet didingakto iti kayo ti sedro ken pinturaakto iti bermelion.’*
15 Agtultuloykanto aya nga agturay ta natantan-okka ngem iti dadduma gapu iti panangusarmo iti sedro?
Nangan ken imminum met ni amam,Ngem impatungpalna ti hustisia ken kinalinteg,+Ket nagsayaat ti nagbanaganna.
16 Inlabanna ti kaso ti marigrigatan ken napanglaw.Isu a nasayaat ti resultana.
‘Saan kadi nga inaramidna dayta gapu ta am-ammonak?’ kuna ni Jehova.
17 ‘Ngem kanayon a naagum ti matam ken pusom iti material a gunggona,Pappapatayem dagiti inosente,Mangkikkikil ken mangag-agawka.’
18 “Isu a daytoy ti imbaga ni Jehova maipapan iti anak ni Josias a ni Jehoiakim+ nga ari ti Juda,‘Saandanto nga isangit:
“Kaasika met, kabsatko a lalaki! Kaasika met, kabsatko a babai!”
Saandanto nga isangit:
“Kaasika met, O apok! Kaasika met, ta nagpatinggan ti dayawmo!”
19 Maitabonto a kas iti pannakaitabon ti asno,+Maiparingguyod ken maibelleng,Iti ruar dagiti ruangan ti Jerusalem.’+
20 Sumang-atka idiay Lebanon ken agpukkawka,Agrungaabka idiay Basan.Ken aganug-ogka manipud Abarim,+Ta nadadaelen ti amin a mangay-ayat unay kenka.+
21 Kinasaritaka idi natalna ti kasasaadmo.
Ngem imbagam, ‘Diak kayat ti agtulnog.’+
Kastakan manipud pay idi agtutuboka,Ta saanka nga agtultulnog iti ibagbagak.+
22 Angin ti mangipastorto iti amin a pastormo;+Ket maipanawto dagiti mangay-ayat unay kenka.
Isu a maibabain ken maipababakanto gapu iti amin a napasaram a didigra.
23 O sika nga agnanaed iti Lebanon,+Nanam-ay ti panagyanmo kadagiti sedro,+Napalalonto la ketdi ti panagpaut-otmo no dumteng ti rigatmo,Marigatanka* a kas iti babai nga agan-anak!”+
24 “‘Ikarik,’ kuna ti sibibiag a Dios a ni Jehova, ‘uray no sika Conias,*+ nga anak ni Jehoiakim+ nga ari ti Juda, ti nagbalin a pangselio a singsing iti kannawan nga imak, uksotenkanto!
25 Iyawatkanto iti ima dagiti mayat a mangala iti biagmo,* kadagiti ima dagiti kabutengmo, iti ima ni Ari Nabucodonosor* ti Babilonia, ken iti ima dagiti Caldeo.+
26 Ibellengkayto nga agina iti sabali a daga a saanyo a nakayanakan, ket idiayto ti pakatayanyo.
27 Didanto pulos makasublin iti lugar nga il-iliwenda.*+
28 Ni kadi Conias ket maysa laeng a mauy-uyaw ken naburak a banga,Maysa a pagkargaan nga awan ti mangayat?
Apay a naipuruak a kaduana dagiti annaknaKen naibellengda iti lugar a saanda nga ammo?’+
29 O daga,* daga, daga, denggem ti kinuna ni Jehova.
30 Daytoy ti imbaga ni Jehova:
‘Isuratyo a daytoy a tao ket awan putotna,Maysa a lalaki a dinto pulos agballigi iti intero a panagbiagna,*Ta awanto ti agballigi kadagiti annaknaNga agtugaw iti trono ni David ken agturay manen iti Juda.’”+
Footnotes
^ Wenno “palasio.”
^ Wenno “asinoman nga ulila.”
^ Lit., “mangsantipikarakto.”
^ Naawagan met iti Jehoahaz.
^ Wenno “nalabaga.”
^ Lit., “Mariknam ti ut-ot ti panagpasikal.”
^ Naawagan met iti Jehoiakin ken Jeconias.
^ Wenno “mangbirbirok iti kararuam.”
^ Lit., “Nabucodorosor,” sabali pay nga ispelingna.
^ Wenno “iti daga a tartarigagayan unay ti kararuada a pagsublian.”
^ Wenno “lugar.”
^ Lit., “nga al-aldawna.”
