Jeremias 19:1-15

  • Naibilin ken Jeremias a buongenna ti karamba (1-15)

    • Panangidaton kadagiti ubbing ken Baal (5)

19  Kinuna ni Jehova: “Mapanka gumatang iti karamba iti agdamdamili.+ Ikuyogmo ti sumagmamano a panglakayen dagiti umili ken dadduma a lallakayen a papadi,  sa rummuarka iti Tanap ti Anak ni Hinnom,+ iti pagserkan ti Ruangan Dagiti Ribak.* Idiay nga ipakaammom dagiti ibagak kenka.  Ibagamto, ‘Denggenyo ti kuna ni Jehova, dakayo nga ar-ari ti Juda ken umili ti Jerusalem. Daytoy ti kuna ni Jehova a panguluen dagiti armada, ti Dios ti Israel: “‘“Dandanin ti panangdidigrak iti daytoy a lugar, nga uray la makigtotto* ti asinoman a makangngeg iti dayta.  Gapu ta pinanawandak+ ken pinagbalinda daytoy a lugar a saanen a mailasin.+ Ditoy nga agidatdatonda kadagiti sabali a dios a dida am-ammo ken saan nga am-ammo dagidi ammada ken dagiti ari ti Juda. Pinunnoda met daytoy a lugar iti dara dagiti inosente.+  Imbangonda dagiti nangato a disso a pagdaydayawanda ken Baal tapno puoranda ti annakda a lallaki kas sibubukel a daton ken Baal,+ banag a saanko nga imbilin wenno imbaga ken pulos a saanko man la a napanunot.”’*+  “‘“Isu a kitaem! um-umayen dagiti aldaw,” kuna ni Jehova, “inton saanen a Tofet wenno Tanap ti Anak ni Hinnom ti maipanagan iti daytoy a lugar no di ket Tanap a Pagpapatayan.+  Dadaelekto dagiti plano ti Juda ken Jerusalem iti daytoy a lugar, ket bay-akto a matayda iti espada iti sango dagiti kabusorda ken iti ima dagidiay mayat a mangala iti biagda.* Ipakankonto met dagiti bangkayda kadagiti billit iti tangatang ken kadagiti animal iti daga.+  Ket pagbalinek daytoy a siudad a nakabutbuteng ken mauy-uyaw.* Mabuteng ken agwingiwingto ti amin a lumabas a makakita iti dayta gapu iti amin a pannakadidigrana.+  Ket bay-akto a kanenda ti lasag ti annakda a lallaki ken babbai, ken kanento ti tunggal maysa kadakuada ti lasag ti padana a tao, gapu iti pannakapupok ken kinadesperadoda inton parigaten ida dagiti kabusorda ken dagidiay mayat a mangala iti biagda.”’*+ 10  “Burakem ti karamba iti sango dagiti lallaki a kimmuyog kenka, 11  ken ibagam kadakuada, ‘Daytoy ti kuna ni Jehova a panguluen dagiti armada: “Kastoy ti panangburakko kadagitoy a tattao ken iti daytoy a siudad, kas iti panangburak ti maysa a tao iti karamba ti agdamdamili tapno saanen a matarimaan dayta; ket itabondanto dagiti natay idiay Tofet agingga nga awanen ti pagitabonan kadakuada.”’+ 12  “‘Kasta ti aramidekto iti daytoy a lugar,’ kuna ni Jehova, ‘ken kadagiti umilina, tapno agbalin daytoy a siudad a kas iti Tofet. 13  Dagiti balay ti Jerusalem ken balbalay ti ar-ari ti Juda ket agbalinto a narugit a kas iti daytoy a lugar ti Tofet,+ wen, ti amin a balay a ti rabaw dagiti atepda ti nangidatonanda kadagiti daton para iti init, bulan, ken amin nga armada ti langit,+ ken nangibukbokanda iti daton nga inumen kadagiti sabali a dios.’”+ 14  Idi nakaawiden ni Jeremias manipud Tofet a nangibaonan kenkuana ni Jehova tapno agipadto, nagtakder iti paraangan ti balay ni Jehova ket imbagana iti amin nga umili: 15  “Daytoy ti kuna ni Jehova a panguluen dagiti armada, ti Dios ti Israel, ‘Ipagtengko iti daytoy a siudad ken iti amin nga ilina ti amin a didigra nga imbagak maibusor iti dayta, ta inggagarada ti saan* nga agtulnog kadagiti imbagak.’”+

Footnotes

Wenno “Ruangan ti Agdamdamili.”
Lit., “mabibinegto ti lapayag.”
Wenno “saan a pulos a simrek iti pusok.”
Wenno “mangbirbirok iti kararuada.”
Lit., “banag a masagawisiwan.”
Wenno “mangbirbirok iti kararuada.”
Lit., “a pinatangken ti teltelda tapno saanda.”