Jeremias 15:1-21
15 Ket imbaga kaniak ni Jehova: “Uray agtakder da Moises ken Samuel iti sangok,+ saankonto a kaasian daytoy nga ili. Papanawem ida iti sanguanak. Pagtalawem ida.
2 No saludsodenda kenka, ‘Papananmi?’ ibagam kadakuada, ‘Daytoy ti kuna ni Jehova:
“Matayto iti sakit ti dadduma kadakayo!
Matayto iti espada ti dadduma kadakayo!+
Matayto iti nakaro a bisin ti dadduma kadakayo!
Ken maipanawto ti dadduma kadakayo!”’+
3 “‘Mangyegakto kadakuada iti uppat a didigra,’*+ kuna ni Jehova, ‘ti espada a mangpapatay, dagiti aso a mangguyodguyod kadagiti bangkayda, ken dagiti billit iti tangatang ken animal iti daga a mangalun-on ken mangdadael.+
4 Pagbalinekto met ida a nakabutbuteng iti amin a pagarian ditoy daga+ maigapu iti ari ti Juda a ni Manases nga anak ni Ezekias ken gapu iti inaramidna iti Jerusalem.+
5 O Jerusalem, asino ti makipagrikna kenka,Asino ti makisimpatia kenka,Ken asino ti dumagas a mangkomusta iti kasasaadmo?’
6 ‘Pinanawannak,’ kuna ni Jehova.+
‘Kanayon a taltallikudannak.*+
Isu nga usarekto ti pannakabalinko maibusor kenka ket dadaelenka.+
Naumaakon a mangipakpakita kenka iti asi.*
7 Ket iwarawarak ida a kas iti pannakaitaep ti bukbukel kadagiti ruangan ti daga.
Ipaluboskonto a maawananda iti annak.+
Dadaelekto dagiti tattaok,Gapu ta dida kayat a balbaliwan dagiti dakes nga aramidda.+
8 Iti imatangko, ad-adunto dagiti baloda a babbai ngem iti darat dagiti baybay.
Mangyegakto iti mangdadael kadakuada iti tengnga ti aldaw, maikontra kadagiti inna ken agtutubo a lallaki.
Bigla nga iyegkonto kadakuada ti danag ken buteng.
9 Naglusdoy ti babai a nangyanak iti pito;Marigrigatan nga umanges.
Limneken ti initna uray no aldaw pay laeng,Isu a mapabainan ken maibabain.’*
‘Ti sumagmamano kadakuada a sibibiag pay laengKet itedkonto kadagiti kabusorda a mangpapatay kadakuada,’ kuna ni Jehova.”+
10 O inak, kaasiak pay, gapu ta inyanaknak,+Maysaak a lalaki a kanayon a mairamraman iti riri ken supiat iti intero a daga.
Saanak a nagpautang wenno immutang.Ngem agpapadada a mangilunlunod kaniak.
11 Kinuna ni Jehova: “Sigurado a tulonganka;Sigurado a salaknibanka manipud iti kabusor,Iti tiempo ti didigra, iti tiempo ti rigat.
12 Kabaelan aya ti asinoman a tukkotukkolen ti landok,Uray ti landok a naggapu iti amianan, agraman ti gambang?
13 Baybay-akto a maala dagiti sanikuam ken kinabaknangmo,+Saan a gapu iti balor, no di ket maigapu iti amin a basolmo iti amin a teritoriam.
14 Itedkonto dagita kadagiti kabusormoTapno maipan iti lugar a saanmo nga ammo.+
Ta simgeden ti ungetko,Ken sumsumgiab maibusor kadakayo.”+
15 Ammom, O Jehova,Lagipennak ken asikasuennak.
Ibalesannak kadagiti mangidaddadanes kaniak.+
Dimo ipalubos a matayak* ta nabannayatka nga agpungtot.
Panunotem a para kenka ti panangibturko iti daytoy a pannakaumsi.+
16 Nasarakak ti sasaom, ket kinnanko dagita;+Ti saom ket pakaragsakak ken pagrag-oan ti pusok,Ta naipanagan kaniak ti naganmo, O Jehova a Dios dagiti armada.
17 Saanak a makikadua kadagiti managayat iti ragragsak ken makipagrag-o kadakuada.+
Gapu ta adda kaniak ti imam, agmaymaysaak nga agtugaw,Ta pinunnonak iti pungtot.*+
18 Apay a di met la sumardengen ti marikriknak nga ut-ot ken saan a maagasan ti sugatko?
Saanna a kayat ti umimbag.
Agbalinka kadi kaniak a kas iti ubbog nga awan danumnaA saan a mapangnamnamaan?
19 Isu a daytoy ti imbaga ni Jehova:
“No agsublika, kaasiankanto manen,Ket agtakderkanto iti sanguanak.
No isinam ti napateg manipud kadagiti awan pategna,Agbalinkanto a pannakangiwatko.*
Umaydanto kenka,Ngem saankanto a mapan kadakuada.”
20 “Pagbalinenka a natibker a pader a gambang kadagitoy a tattao;+Sigurado a labanandaka,Ngem saandanto nga agballigi kenka,*+Ta addaak kenka, tapno isalakanka ken alawenka,” kuna ni Jehova.
21 “Alawenkanto iti ima dagiti managdakdakes
Ken wayawayaanka iti dakulap dagidiay naulpit.”
Footnotes
^ Wenno mabalin nga, “uppat a kita ti panangukom.” Lit., “uppat a pamilia.”
^ Wenno mabalin a, “Kanayon nga immatraskayo.”
^ Wenno “maladladingitan kenka.”
^ Wenno mabalin a, “Nabainan dayta ken nakarikna iti pannakaibabain.”
^ Lit., “Saannak nga ipanaw.”
^ Wenno “mensahe ti nakaro a pungtot.”
^ Wenno “kas iti bukodko a ngiwat.”
^ Wenno “saandakanto a maabak.”
