Jeremias 11:1-23
11 Daytoy ti mensahe ni Jehova ken Jeremias:
2 “Dakayo a tattao, denggenyo ti ibagbaga daytoy a tulag!
“Ipakaammom* kadagiti tattao ti Juda ken kadagiti umili ti Jerusalem,
3 ket ibagam kadakuada, ‘Daytoy ti kuna ni Jehova a Dios ti Israel: “Mailunod ti tao a saan nga agtulnog iti ibagbaga daytoy a tulag,+
4 nga imbilinko kadagidi ammayo idi inruarko ida iti Egipto,+ manipud iti urno a pagtunawan iti landok,+ a kinunak, ‘Agtulnogkayo kaniak, ken aramidenyo ti amin nga ibilinko kadakayo; ket agbalinkayto a tattaok ken agbalinakto a Diosyo,+
5 tapno matungpalko ti insapatak kadagidi ammayo, nga itedko ti daga a pagay-ayusan ti gatas ken diro,+ kas iti daytoy nga aldaw.’”’”
Ket insungbatko: “Amen,* O Jehova.”
6 Kinuna kaniak ni Jehova: “Ipakaammom dagitoy a sasao kadagiti siudad iti Juda ken kadagiti kalsada iti Jerusalem: ‘Denggenyo ti ibagbaga daytoy a tulag, ken aramidenyo dagitoy.
7 Ta binilinko a naimbag dagidi ammayo idi inruarko ida idiay Egipto, ken agingga ita nga aldaw, a maulit-ulit a bagbagaak ida:* “Agtulnogkayo kaniak.”+
8 Ngem saanda a dimngeg wenno nangipangag; inggagarada ketdi ti nagtulnog iti dakes a pusoda.+ Isu nga imbagak kadakuada ti amin a linaon daytoy a tulag nga imbilinko a tungpalenda ken saanda a kayat nga aramiden.’”
9 Imbaga ngarud kaniak ni Jehova: “Nagkukumplot dagiti tattao ti Juda ken dagiti umili ti Jerusalem.
10 Inulitda dagiti nagkamalian dagidi ammada, a saanda a nagtulnog kadagiti sasaok.+ Nagdaydayaw ken nagserbida kadagiti sabali a dios.+ Dinadael ti sangakabbalayan ti Israel ken sangakabbalayan ti Juda ti tulagko kadagidi ammada.+
11 Gapuna, imbaga ni Jehova, ‘Mangyegak iti didigra+ a saanda a maitarayan. Inton agpakaasida kaniak iti tulong, saankonto ida a denggen.+
12 Dagiti siudad ti Juda ken dagiti umili ti Jerusalem ket mapanto kadagiti didiosen a pagidatdatonanda kadagiti daton* ket agpakaasida iti tulong.+ Ngem pulos a saanto ida a maisalakan dagita a didiosen iti tiempo ti pannakadadaelda.
13 Ta dagiti didiosem ket nagbalin a kas kaadu dagiti siudadmo, O Juda, ket nangibangonka kadagiti altar a kas iti kaadu dagiti kalsada ti Jerusalem para iti nakababain a banag,* dagiti altar a pagidatonan ken Baal.’+
14 “Ngem sika,* saanmo nga ikararagan dagitoy a tattao. Saanka nga agpakaasi wenno agkararag para kadakuada,+ ta saanakto a dumngeg inton agpakaasida iti tulong gapu iti pannakadidigrada.
15 Ania koma ti karbengan daydiay ipatpategko nga agyan iti balaykoTa nakaad-adu ti agar-aramid kadagiti dakes a bambanag?
Babaen ti nasantuan a karne* mapasardengda aya ti didigra a dumteng kenka?
Maragsakankanto kadi iti dayta a tiempo?
16 Narangpaya nga olibo ti awag idi kenka ni Jehova,Napintas a kayo a nagsayaat ti bungana.
Babaen ti napigsa nga uni, pinuoranna dayta,Ken tinukkolda dagiti sangana.
17 “Ni Jehova a panguluen dagiti armada, ti Nangimula kenka,+ impakaammona a madidigraka gapu iti dakes nga inaramid ti sangakabbalayan ti Israel ken sangakabbalayan ti Juda. Sinaktanda ti riknak ta nagdatonda ken Baal.”+
18 Imbaga ni Jehova kaniak tapno maammuak;Iti dayta a tiempo, impakitam kaniak dagiti ar-aramidenda.
19 Kaslaak iti naamo a kordero a naipan iti pagpartian.
Diak ammo nga adda planoda maibusor kaniak:+
“Dadaelentayo ti kayo agraman ti bungana,Ket pagpatinggaentayo ti biagna iti daga dagiti sibibiag,Tapno saanton a pulos malagip ti naganna.”
20 Ngem nalinteg ti panangukom ni Jehova a panguluen dagiti armada;Suksukimatenna ti kaunggan a pampanunot* ken ti puso.+
Makitak koma ti panangbalesmo kadakuada,Ta intalekko kenkan ti kasok.
21 Gapuna, imbaga ni Jehova maibusor kadagiti tattao iti Anatot+ a mayat a mangkettel iti biagmo* ken mangibagbaga: “Dika agipadto iti nagan ni Jehova,+ no dimo kayat a patayendaka”;
22 isu nga imbaga ni Jehova a panguluen dagiti armada: “Dusaek ida. Mapapatay iti espada dagiti agtutubo a lallaki,+ ken matayto iti nakaro a bisin dagiti annakda a lallaki ken babbai.+
23 Awanto ti uray maysa a mabati kadakuada, ta didigraekto dagiti tattao iti Anatot+ iti tawen a panangsingirko kadakuada.”
Footnotes
^ Nalabit naibaga ken Jeremias.
^ Wenno “Sapay koma.”
^ Lit., “masapaak a bumangon ken bagbagaak ida.”
^ Wenno “daton a mangpataud iti asuk.”
^ Wenno “nakababain a dios.”
^ Kayatna a sawen, ni Jeremias.
^ Kayatna a sawen, dagiti maidaton iti templo.
^ Wenno “kaunggan nga emosion.” Lit., “dagiti bato.”
^ Wenno “mangbirbirok iti kararuam.”
