Eclesiastes 11:1-10

  • Dimo sayangen ti oportunidad (1-8)

    • Ipuruakmo ti tinapaymo iti danum (1)

    • Agmulaka iti bin-i iti bigat agingga iti rabii (6)

  • Umiso a panangtagiragsak iti kinaagtutubo (9, 10)

11  Ipuruakmo* ti tinapaymo iti danum,+ ta masarakamto manen kalpasan ti adu nga aldaw.+  Ibingayam ti pito wenno uray ti walo,+ ta dimo ammo no anianto a didigra* ti mapasamak iti daga.  No mapno iti danum dagiti ulep, agibukbokda iti tudo iti daga; ket no matuang ti kayo iti abagatan wenno amianan, agtalinaed dayta iti nakatuanganna.  Ti mangsipsiput iti angin saanto nga agmula iti bin-i; ket ti kumitkita iti ulep saanto nga agapit.+  No kasano a dimo ammo ti panagtignay ti espiritu iti tulang ti ubing iti tian* ti masikog a babai,+ dimo met ammo ti aramid ti pudno a Dios, a mangar-aramid iti amin a banag.+  Imulam ti bin-im iti bigat ket dimo paginanaen ti imam agingga iti rabii;+ ta dimo ammo no ania kadagita ti agballigi, no daytoy wenno daydiay, wenno agpadadanto a naimbag.  Makaay-ayo ti lawag, ken nasayaat iti mata a makitana ti init.  Ta no agbiag iti adu a tawen ti maysa a tao, bay-am nga agragsak iti inaldaw.+ Ngem laglagipenna koma a mabalin nga adu ti aldaw ti rigat; awan serserbi ti amin a dumteng.+  Agragsakka, sika nga agtutubo, bayat nga agtutuboka, ket bay-am a maragsakan ti pusom kadagiti aldaw ti kinaagtutubom. Surotem ti kayat ti pusom ken ti pangiturongan kenka ti matam; ngem laglagipem nga ukomennakanto* ti pudno a Dios kadagitoy a banag.+ 10  Gapuna, ikkatem iti pusom ti dakes a bambanag, ket iyadayom iti bagim* ti makadangran a bambanag; ta awan serserbi ti kinaagtutubo ken kinaagkabannuag.+

Footnotes

Wenno “Ibaonmo.”
Wenno “kalamidad.”
Lit., “kadagiti tulang iti aanakan.”
Wenno “a panungsungbatennakanto.”
Lit., “lasagmo.”