Eclesiastes 10:1-20

  • Ti bassit a kinamaag abakenna ti sirib (1)

  • Dagiti peggad no saan a kualipikado ti maysa (2-11)

  • Ti naladingit a kasasaad ti maag (12-15)

  • Kinamaag dagiti agtuturay (16-20)

    • Mabalin nga uliten ti billit ti imbagam (20)

10  No kasano a bumangsit ken agburek ti nabanglo a lana gapu iti natay a ngilaw, abaken met ti bassit a kinamaag ti sirib ken dayag.+  Ti puso ti masirib ti mangiturong kenkuana iti umiso a dalan,* ngem ti puso ti maag ti mangiturong kenkuana iti di umiso a dalan.*+  Aniaman ti pagnaan ti maag, saan a masirib,*+ ken ipakpakaammona iti amin nga isu ket maag.+  No sumged ti pungtot* kenka ti maysa nga agturay, dika pumanaw,+ ta ti kinakalmado kissayanna dagiti nakaro a basol.+  Adda nakitak a makapaupay iti baba ti init, ti kamali nga inaramid dagiti agturay:+  Nangato ti saad dagiti maag, ngem agtalinaed a nababa ti saad dagiti baknang.*  Nakakitaak kadagiti adipen a nakakabalio ngem magmagna dagiti prinsipe a kasla adipen.+  Ti mangkali iti abut matnagto iti dayta;+ ket ti mangbuttaw iti pader a bato makagatto iti uleg.  Ti mangtebbag kadagiti bato mabalin a masaktan kadagita, ken ti manggudua kadagiti troso mabalin nga agpeggad kadagita.* 10  No namudel ti landok a remienta ti maysa a tao ket saanna nga asaen, adu a pigsa ti maibusna. Ngem makatulong ti sirib tapno agballigi. 11  No kumagat ti uleg sakbay a mapaamo, awan ti magunggona ti eksperto nga engkantador.* 12  Ti sasao iti ngiwat ti masirib a tao mangyeg iti pabor,+ ngem ti bibig ti maag ti pakadadaelanna.+ 13  Kinamaag ti umuna a rummuar iti ngiwatna,+ ken makadadael a kinamauyong ti maudi nga ibagana. 14  Ngem sao a sao ti maag.+ Saan nga ammo ti tao no anianto ti mapasamak; asino ti makaibaga kenkuana iti mapasamak inton matay?+ 15  Mabannog ti maag iti napasnek a panagtrabahona, ta saanna nga ammo a biroken uray ti dalan nga agturong iti siudad. 16  Kaasi pay ti daga no ubing ti ari+ ken bigbigat a mangrugi nga agraragsak dagiti prinsipe! 17  Naragsak ti daga no ti ari ket anak dagiti natan-ok ken mangan dagiti prinsipe iti umiso a tiempo tapno agpapigsa, saan a tapno agbartek!+ 18  Madadael ti atep gapu iti nakaro a kinasadut, ken agubo ti balay gapu iti sadut nga ima.+ 19  Naaramid ti tinapay* a mangpakatawa, ken ti arak a mangparagsak iti biag;+ ngem kuarta ti sungbat ti amin a kasapulan.+ 20  Dimo ilunod ti* ari uray iti panunotmo,*+ ken dimo ilunod ti baknang iti siledmo; ta mabalin nga idanon ti billit* dayta,* wenno uliten ti nagpayak a parsua ti imbagam.

Footnotes

Lit., “ket adda iti kannawan nga imana.”
Lit., “ket adda iti kannigid nga imana.”
Lit., “awanan iti puso.”
Lit., “espiritu; anges.”
Wenno “makabael.”
Wenno mabalin a, “masapul nga agannad kadagita.”
Lit., “ti apo ti dila.”
Wenno “taraon.”
Wenno “Dika agsao iti dakes maipapan iti.”
Wenno mabalin a, “katrem.”
Lit., “agtaytayab a parsua iti tangatang.”
Wenno “ti mensahe.”