Deuteronomio 7:1-26

  • Pito a nasion a madadael (1-6)

  • No apay a napili ti Israel (7-11)

  • Mangyeg iti balligi ti panagtulnog (12-26)

7  “Inton iserreknakayo ni Jehova a Diosyo iti daga a tagikuaenyo,+ papanawennanto met iti sanguananyo dagiti nasion nga adu ti populasionna:+ dagiti Heteo, Girgaseo, Amoreo,+ Canaanita, Perizeo, Heveo, ken Jebuseo,+ dagiti pito a nasion nga ad-adu ti populasionna ken nabilbileg ngem dakayo.+  Iyawatto ida kadakayo ni Jehova a Diosyo, ket abakenyonto ida.+ Sigurado a dadaelenyonto ida.+ Dikay makitulag kadakuada ken saankayo a maasian kadakuada.+  Dikay makiinnasawa* kadakuada. Diyo iyasawa ti annakyo a babbai iti annakda a lallaki ken diyo met iyasawa ti annakyo a lallaki iti annakda a babbai.+  Ta iyadayodanto kaniak dagiti annakyo ket agserbida kadagiti sabali a dios.+ Iti kasta, makapungtotto kadakayo ni Jehova ket dagus nga ibusennakayo.+  “Imbes ketdi, kastoy ti aramidenyo: Dadaelenyo dagiti altarda, rebbaenyo dagiti sagrado nga adigida,+ pukanenyo dagiti sagrado a posteda,*+ ken puoranyo dagiti kinitikitan nga imahenda.+  Ta nasantuankayo ken Jehova a Diosyo, ket pinilinakayo ni Jehova a Diosyo nga agbalin nga ilina, ti espesial a sanikuana,* manipud iti amin a nasion iti rabaw ti daga.+  “Ipatpateg ken pinilinakayo ni Jehova saan a gapu ta dakayo ti kaaduan iti amin a nasion;+ kinapudnona, dakayo ti kabassitan iti amin a nasion.+  Ay-ayatennakayo ni Jehova ken tinungpalna ti inkari ni Jehova kadagidi ammayo.+ Daytoy ti gapuna nga inusarna ti mannakabalin nga imana a mangsubbot kadakayo iti nakaadipenanyo,+ iti pannakabalin* ni Faraon nga ari ti Egipto.  Pagaammoyo a ni Jehova a Diosyo ti pudno a Dios, ti matalek a Dios, a mangtungtungpal iti tulagna ken mangipakpakita iti napudno nga ayatna iti rinibu a henerasion dagidiay mangay-ayat kenkuana ken mangtungtungpal kadagiti bilinna.+ 10  Ngem dusaennanto dagidiay manggurgura kenkuana,+ ket dagus a balsennanto ida. 11  Gapuna, tungpalenyo a naimbag dagiti bilin, regulasion, ken pangngeddeng nga itedko kadakayo ita. 12  “No itultuloyyo nga ipangag ken tungpalen dagitoy a pangngeddeng, tungpalento ni Jehova ti tulag ken ti napudno nga ayatna nga inkarina kadagidi ammayo. 13  Ayaten, bendisionan, ken paaduennakayto. Wen, ikkannakayto iti adu nga annak,*+ apit, bukbukel, baro nga arak, lana,+ baka, karnero, ken kalding, iti daga nga inkarina kadagidi ammayo nga itedna kadakayo.+ 14  Dakayto ti kaaduan iti bendision iti amin a nasion;+ awanto ti lalaki wenno babai wenno tarakenyo nga awanan iti anak.+ 15  Ilisinakayto ni Jehova iti amin a sakit, ken saannanto nga iyeg kadakayo ti aniaman a nakabutbuteng a sakit a nakitayo idiay Egipto.+ Ngem iyegnanto dagita iti amin a manggura kadakayo. 16  Dadaelenyonto* ti amin a nasion nga iyawat kadakayo ni Jehova.+ Dikay maasian* kadakuada,+ ken dikay agserbi kadagiti diosda,+ ta maysanto dayta a silo kadakayo.+ 17  “No ibagayo iti pusoyo, ‘Ad-adu dagitoy a nasion ngem datayo. Kasanotayo a mapapanaw ida?’+ 18  dikay agbuteng kadakuada.+ Laglagipenyo ti inaramid ni Jehova a Diosyo ken ni Faraon ken iti intero nga Egipto,+ 19  dagiti nakitayo a nakaro a pannusa,* pagilasinan, milagro,+ mannakabalin nga ima, ken nabileg* a takiag nga inusar ni Jehova a nangiruar kadakayo.+ Kasta ti aramidento ni Jehova a Diosyo iti amin a nasion a kabutengyo.+ 20  Mangyegto ni Jehova iti pakaupayanda* agingga a maibus dagiti nabati+ ken aglemlemmeng kadakuada. 21  Dikay agbuteng gapu kadakuada, ta adda kadakayo ni Jehova a Diosyo,+ a naindaklan ken nakaskasdaaw a Dios.+ 22  “Sigurado nga in-inutto a pagtalawen ni Jehova a Diosyo dagita a nasion.+ Saankayto a mapalubosan a mangibus a dagus kadakuada, tapno saan nga umadu dagiti atap nga animal iti kabakiran a mamagpeggad iti biagyo. 23  Iyawatto ida kadakayo ni Jehova a Diosyo ket abakenyonto ida agingga a maibusda.+ 24  Iyawatnanto dagiti arida kadagiti imayo,+ ket punasenyonto dagiti naganda iti baba ti langit.+ Awanto ti makaabak kadakayo+ ket ibusenyonto ida.+ 25  Masapul a puoranyo dagiti kinitikitan nga imahenda.+ Diyo tarigagayan wenno alaen ti pirak ken ti balitok nga adda kadagita,+ tapno dikay masiluan, ta karimon dayta ni Jehova a Diosyo.+ 26  Dikay mangiserrek iti makarimon a banag iti balayyo tapno saankayo a mairaman iti pannakadadael dayta. Karimon ken kagurayo dayta, ta maikari a madadael.

Footnotes

Wenno “makialiansa babaen ti pannakiinnasawa.”
Kitaem ti Glosario.
Wenno “ti ipatpategna a sanikua.”
Lit., “ima.”
Lit., “bendisionanna ti bunga ti aanakanyo.”
Lit., “Alun-onenyonto.”
Lit., “Saan a maasian ti matayo.”
Wenno “pannubok.”
Lit., “nakaunnat.”
Wenno mabalin a, “makagapu a matarantada; makagapu a madanaganda.”