Deuteronomio 24:1-22

  • Panagasawa ken diborsio (1-5)

  • Panagraem iti biag (6-9)

  • Pannakaseknan kadagiti napanglaw (10-18)

  • Paglintegan iti panagadas (19-22)

24  “No mangasawa ti maysa a lalaki iti babai ngem saan a naragsakan ta adda natakuatanna a naalas a kababalinna, mangaramid iti kasuratan ti diborsio,+ itedna dayta iti babai, sa papanawenna iti balayna.+  No nakapanawen ti babai, mabalinnan ti makiasawa iti sabali a lalaki.+  No kagura* ti maikadua nga asawana, ket mangaramid iti kasuratan ti diborsio, itedna dayta kenkuana, sa papanawenna iti balayna, wenno no matay ti maikadua nga asawana,  saan a mabalin nga asawaen manen ti immuna a lalaki a nangpapanaw kenkuana ta imbilangnan a narugit, ta kagura dayta ni Jehova. Saanka a mangyeg iti basol iti daga nga impatawid ni Jehova a Diosmo.  “No kakaskasar ti maysa a lalaki, saan a mabalin nga agsoldado wenno maikkan iti sabali a responsabilidad. Agtalinaed pay laeng iti balayna iti makatawen ket paragsakenna ti asawana.+  “No pautangam ti maysa a tao, dimo alaen ti gilinganna wenno ti makinngato a paset ti gilinganna kas garantia nga agbayad,*+ ta panangala dayta iti pagbiagna.*  “No adda masarakan a nangkidnap iti padana nga Israelita, ket minaltrato ken inlakona,+ masapul a mapapatay ti nangkidnap.+ Rumbeng a maikkat ti dakes iti tengngayo.+  “No agwaras ti sakit a kukutel,* tungpalenyo a naimbag ti amin nga ibaga dagiti papadi a Levita.+ Aramidenyo ti amin nga imbilinko kadakuada.  Laglagipenyo ti inaramid ni Jehova a Diosyo ken ni Miriam idi addakayo iti dalan, idi rimmuarkayo idiay Egipto.+ 10  “No pautangam ti kaarrubam,+ saanka a sumrek iti balayna a mangala iti imbagana a garantia nga agbayad. 11  Agtakderka iti ruar, ket urayem ti pinautangam a mangiruar ken mangited kenka iti garantia nga agbayad. 12  No kasapulan dayta a tao ti intedna a garantia nga agbayad, saanka nga agidda a dimo pay naisubli.+ 13  Masapul nga isublim apaman a lumnek ti init tapno agidda nga adda badona,+ ken kiddawenna iti Dios a bendisionannaka; ket ibilangto daytoy ni Jehova a Diosmo kas nalinteg nga aramid. 14  “Dimo sauren ti matangtangdanan a trabahador a marigrigat ken napanglaw, kabsatmo man wenno ganggannaet a residente kadagiti siudadyo.*+ 15  Itedmo ti tangdanna iti dayta nga aldaw,+ sakbay a lumnek ti init, ta marigrigat ken ti laeng sueldona ti pagbiagna. Ta no saan, ipulongnaka ken Jehova, ket makabasolka.+ 16  “Saan a mapapatay dagiti amma maigapu kadagiti annakda, ket saan met a mapapatay dagiti annak maigapu kadagiti ammada.+ Mapapatay ti maysa maigapu iti bukodna a basol.+ 17  “Dimo ipaidam ti hustisia iti ganggannaet a residente wenno iti awanan ama nga ubing,*+ ken dimo alaen ti bado ti balo a babai nga itedna kas garantia a bayadanna ti utangna.*+ 18  Laglagipem a nagbalinka nga adipen idiay Egipto, ket inruarnaka sadiay ni Jehova a Diosmo.+ Dayta ti makagapu nga ibilinko nga aramidem daytoy. 19  “No apitem ti talonmo, ket adda malipatam a sangareppet iti talon, saanmon a sublian. Para dayta iti ganggannaet a residente, awanan ama nga ubing, ken balo a babai,+ tapno bendisionan ni Jehova a Diosmo ti amin nga aramidem.+ 20  “No burasem ti bunga ti kayom nga olibo, dimo uliten a burasan dagiti sangana. Bay-am dagiti nabati para iti ganggannaet a residente, awanan ama nga ubing, ken balo a babai.+ 21  “No agburaska iti kaubasam, dimo sublian a burasen dagiti natedda. Bay-am dagiti nabati para iti ganggannaet a residente, awanan ama nga ubing, ken balo a babai. 22  Laglagipem a nagbalinka idi nga adipen idiay Egipto. Dayta ti makagapu nga ibilinko nga aramidem daytoy.

Footnotes

Wenno “saanen a kayat.”
Wenno “kas pammatalged.”
Wenno “biagna; kararuana.”
Nalawa ti kaipapanan ti Hebreo a sao a naipatarus a “kukutel.” Mabalin a ramanenna ti nagduduma a makaakar a sakit ti kudil, kasta met ti dadduma a kita ti pannakaimpektar ti lupot ken balay.
Lit., “ruanganyo.”
Wenno “ulila.”
Wenno “kas pammatalged.”