Deuteronomio 20:1-20
20 “No mapankayo makigubat kadagiti kabusoryo ket makitayo dagiti kabalio, karuahe a pakigubat, ken armadada nga ad-adu ngem dakayo, dikay agbuteng, ta adda kadakayo ni Jehova a Diosyo a nangiruar kadakayo idiay Egipto.+
2 Sakbay a makigubatkayo, umasideg ti padi ket kasaritana dagiti tattao.+
3 Masapul nga ibagana kadakuada, ‘Denggenyo, O Israel, sakbay a makilabankayo kadagiti kabusoryo. Papigsaenyo ti pakinakemyo. Dikay agbuteng wenno agamak wenno agpigerger gapu kadakuada,
4 ta tulongannakayo ni Jehova a Diosyo a makilaban kadagiti kabusoryo ket isalakannakayo.’+
5 “Masapul met nga ibaga dagiti opisial kadagiti tattao, ‘Asino kadakayo ti nangbangon iti baro a balay ngem saan pay a nagyan iti dayta? Agawid koma iti balayna, ta amangan no matay iti gubat ket sabali a tao ti agyan.
6 Asino kadakayo ti nagmula kadagiti ubas ngem saan pay a nagapit? Agawid koma iti balayna, ta amangan no matay iti gubat ket sabali a tao ti agapit.
7 Asino kadakayo ti naitulag a mangasawa iti maysa a babai ngem saanna pay nga inkasar? Agawid koma iti balayna,+ ta amangan no matay iti gubat ket sabali a lalaki ti mangikasar kenkuana.’
8 Masapul met nga ibaga dagiti opisial kadagiti tattao, ‘Asino ti mabuteng ken nakapuy ti pakinakemna?+ Agawid koma iti balayna, tapno saanna met a pakapuyen ti pakinakem dagiti kakabsatna.’*+
9 Inton makasarita idan dagiti opisial, masapul a mangdutokda kadagiti panguluen dagiti armada a mangidaulo kadagiti tattao.
10 “No umasidegkayo iti maysa a siudad tapno gubatenyo, masapul met nga ipakaammoyo no kayatda ti makikappia.+
11 No kayatda ti makikappia, agbalinto nga adipenyo ti amin a tattao sadiay, ket agserbidanto kadakayo.+
12 Ngem no saanda a makikappia ket makilabanda, masapul a palawlawanyo ti siudad,
13 ket sigurado nga iyawatto ida kadakayo ni Jehova a Diosyo. Masapul a papatayenyo iti espada ti amin a lallaki.
14 Ngem mabalinyo a tiliwen dagiti babbai ken ubbing, ken alaen dagiti taraken ken amin nga adda iti siudad,+ ket alaenyonto ti amin a napateg a banag a kukua dagiti kabusoryo, nga inted kadakayo ni Jehova a Diosyo.+
15 “Kastanto ti aramidenyo iti amin a siudad nga adayo unay kadakayo a saan a sakup dagitoy a nasion iti aglawlawyo.
16 Ngem ibusenyo ti amin a sibibiag kadagita a siudad, nga ited ni Jehova a Diosyo kas tawidyo.+
17 Naan-anay a dadaelenyo ida, dagiti Heteo, Amoreo, Canaanita, Perizeo, Heveo, ken Jebuseo,+ kas imbilin kadakayo ni Jehova a Diosyo;
18 tapno saandakayo nga isuro a mangsurot iti amin a makarimon nga aramidda para kadagiti diosda, ket agbasolkayo ken Jehova a Diosyo.+
19 “No palawlawanyo ti maysa a siudad ket abakenyo kalpasan ti adu nga aldaw a pannakilabanyo iti dayta, diyo pukanen dagiti kayona. Mabalinyo a kanen ti bungada, ngem diyo pukanen.+ Ta darupenyo kadi ti maysa a kayo iti tanap a kas iti panangdarupyo iti tao?
20 Mabalinyo a dadaelen ti kayo nga ammoyo a saan a makan ti bungana. Pukanenyo dayta ket usarenyo a mangpalawlaw iti siudad a kalablabanyo, agingga a maabak.
Footnotes
^ Wenno “a lunagen ti puso dagiti kakabsatna a kas iti pusona.”
