Deuteronomio 14:1-29

  • Di umiso a panangipakita iti panagladingit (1, 2)

  • Taraon a maibilang a nadalus ken narugit (3-21)

  • Apagkapullo para ken Jehova (22-29)

14  “Dakayo ti annak ni Jehova a Diosyo. Diyo sugatsugaten ti bagiyo+ wenno kiskisan ti mugingyo* gapu iti natay a tao.+  Ta nasantuankayo+ ken Jehova a Diosyo, ket pinilinakayo ni Jehova nga agbalin nga ilina, ti espesial a sanikuana,* manipud iti amin a nasion iti rabaw ti daga.+  “Dikay mangan iti aniaman a narugit a banag.+  Dagitoy ti animal a mabalinyo a kanen:+ baka, karnero, kalding,  ugsa, gasela, korso, atap a kalding, antilop, atap a karnero, ken gamusa.  Mabalinyo a kanen ti aniaman nga animal a nagpisi ti kukona ken agngatingat.  Ngem diyo kanen dagitoy nga animal nga agngatingat wenno nagpisi ti kukona: kamelio, liebre, ken koneho iti kabatuan, gapu ta agngatingatda ngem saan a nagpisi ti kukoda. Ibilangyo a narugit dagitoy.+  Kasta met ti baboy, gapu ta nagpisi ti kukona ngem saan nga agngatingat. Ibilangyo a narugit daytoy. Diyo kanen ti lasag dagitoy nga animal wenno sagiden ti bangkayda.  “Dagitoy ti mabalinyo a kanen kadagiti parsua nga agbibiag iti danum: Mabalinyo a kanen ti aniaman nga addaan iti pigar ken siksik.+ 10  Ngem diyo kanen ti aniaman nga awanan iti pigar ken siksik. Ibilangyo a narugit dayta. 11  “Mabalinyo a kanen ti aniaman a nadalus a billit. 12  Ngem diyo kanen dagitoy: agila, kali nga agsippayot iti ikan, nangisit a buitre,+ 13  lumabaga a gikgik, nangisit a gikgik, amin a kita ti sawi, 14  amin a kita ti wak, 15  abestrus, kullaaw, garseta, amin a kita ti kali, 16  puek, atiddog ti lapayagna a kullaaw, kalamon, 17  pelikano, buitre, kasili, 18  tikbaboy, aniaman a kita ti kannaway, abubilia, ken panniki. 19  Ibilangyo met a narugit ti tunggal nagpayak nga agkarayam a parsua.* Diyo kanen dagita. 20  Mabalinyo a kanen ti aniaman a nadalus nga agtaytayab a parsua. 21  “Diyo kanen ti aniaman nga animal a nasarakan a natay.+ Mabalinyo nga ited dayta iti ganggannaet a residente iti siudadyo,* ket mabalinna a kanen, wenno ilakoyo iti maysa a ganggannaet. Agsipud ta nasantuankayo ken Jehova a Diosyo. “Diyo iluto ti urbon a kalding iti gatas ti inana.+ 22  “Masapul nga itedyo ti apagkapullo ti amin a bukbukel a maapityo iti talonyo iti tunggal tawen.+ 23  Kanenyo ti apagkapullo ti bukbukelyo, ti baro nga arak, lana, ken ti inauna nga urbon a baka, karnero, wenno kalding iti sanguanan ni Jehova a Diosyo, iti disso a pilienna a pakaidaydayawan ti naganna.+ Iti kasta, masursuroyo ti agbuteng a kanayon ken Jehova a Diosyo.+ 24  “Ngem no napaut unay ti panagturongyo iti disso a pilien ni Jehova a Diosyo a pakaidaydayawan ti naganna+ ket diyo kabaelan nga awiten dagitoy, ta adayo dayta (ta bendisionannakayto ni Jehova a Diosyo), 25  ilakoyo ngarud ket itugotyo ti kuarta a paglakuanyo sa mapankayo iti disso a piliento ni Jehova a Diosyo. 26  Mabalinyo nga igatang ti kuarta iti aniaman a kayatyo*—baka, karnero, kalding, arak ken dadduma pay a naingel nga inumen, ken aniaman a banag a kayatyo;* ket mangankayo iti sanguanan ni Jehova a Diosyo ken agragsakkayo, dakayo ken ti sangakabbalayanyo.+ 27  Diyo met baybay-an dagiti Levita nga adda iti siudadyo,+ ta awan ti bingayda iti tawidyo.+ 28  “Iti ngudo ti tunggal tallo a tawen, iruaryo ti intero nga apagkapullo ti apityo iti dayta a tawen ket ikabilyo iti uneg ti siudadyo.+ 29  Iti kasta, umay agpennek a mangan dagiti Levita nga awan ti bingayda iti tawidyo, dagiti ganggannaet a residente, awanan ama nga ubbing,* ken dagiti balo a babbai nga adda iti siudadyo,+ tapno bendisionan ni Jehova a Diosyo ti amin nga aramidenyo.+

Footnotes

Lit., “kalbuen ti nagbaetan dagiti matayo.”
Wenno “ti ipatpategna a sanikua.”
Wenno “tunggal insekto.”
Lit., “ruanganyo.”
Wenno “tarigagayan ti kararuayo.”
Wenno “kiddawen ti kararuayo.”
Wenno “ulila.”