Umuna a Surat ken Timoteo 5:1-25

  • Panangtrato iti ub-ubing ken nataengan (1, 2)

  • Tulongan dagiti balo a babbai (3-16)

    • Ipaay ti maysa ti kasapulan ti pamiliana (8)

  • Padayawan dagiti nagaget a panglakayen (17-25)

    • “Bassit nga arak para iti tianmo” (23)

5  Dika agsao iti nasakit iti maysa a lakay.+ Imbes ketdi, makisaoka kenkuana kas ama, kadagiti ub-ubing a lallaki kas kabsat a lallaki,  kadagiti babbaket kas inna, kadagiti ub-ubing a babbai kas kabsat a babbai, a nadalus ti motibom.  Ipakitaam iti konsiderasion* dagiti balo a babbai a talaga a balo.*+  Ngem no adda annak wenno appoko ti asinoman a balo a babai, isuda ti umuna a mangipakita iti debosionda iti Dios iti sangakabbalayanda+ ken itedda ti maiparbeng a subad kadagiti nagannak ken apongda,+ ta makaay-ayo daytoy iti imatang ti Dios.+  Ti babai a talaga a balo ken nabaybay-an ket agtaltalek iti Dios+ ken agtultuloy nga agpakaasi ken agkararag iti aldaw ken rabii.+  Ngem daydiay mangpagpagusto iti tarigagay ti lasagna ket maibilang a natay uray no sibibiag.  Gapuna, itultuloymo nga ited dagitoy nga instruksion,* tapno awan ti pakababalawanda.  No saan nga ipaay ti asinoman ti kasapulan dagiti adda iti poderna, nangnangruna dagiti miembro ti pamiliana, tinallikudannan ti pammati ken dakdakes ngem iti tao nga awanan pammati.+  Mailista koma ti balo a babai nga 60 ti tawenna nga agpangato, a maymaysa laeng idi ti asawana, 10  pagaammo a nasayaat ti aramidna,+ no nangpadakkel iti annak,+ no managpadagus,+ no binugguanna ti saka dagiti nasantuan,+ no tinulonganna dagiti marigrigat,+ ken nagaget iti tunggal naimbag nga aramid. 11  Iti sabali a bangir, saan koma a mailista dagiti ub-ubing a balo a babbai, ta no ti seksual a tarigagayda ti makalapped iti panagserbida iti Kristo, kayatda ti makiasawa. 12  Makabasolda gapu ta tinallikudanda ti umuna nga ebkas ti pammatida.* 13  Kasta met, mabalin a masursuroda ti agbalin a sadut, nga umalla-allatiwda iti balbalay; wen, saanda laeng a sadut no di ket tsismosa ken mannakibiangda pay iti biag ti sabsabali,+ nga isarsaritada ti bambanag a saan a rumbeng. 14  Gapuna, kayatko a makiasawa koma dagiti ub-ubing a balo a babbai,+ tapno aganakda,+ tapno asikasuenda ti pamiliada, tapno saan a kritikaren ida ti bumusbusor. 15  Kinapudnona, addan dagiti nayaw-awan a simmurot ken Satanas. 16  No ti maysa a manamati a babai ket addaan iti kakabagian a balo a babbai, tulonganna koma ida tapno saan a mapadagsenan ti kongregasion. Iti kasta, matulongan ti kongregasion dagidiay talaga a balo.*+ 17  Maikari iti doble a dayaw+ dagiti panglakayen a nasayaat ti panangidauloda,+ nangnangruna dagidiay napinget iti panagsao ken panangisuro.+ 18  Ta kuna ti kasuratan: “Diyo busalan* ti kalakian a baka bayat nga agir-irik,”+ kasta met, “Maikari ti trabahador iti tangdanna.”+ 19  Dimo dengdenggen ti pammabasol maikontra iti maysa a lakay* malaksid no adda pammaneknek ti dua wenno tallo a testigo.+ 20  Tubngarem+ dagidiay mangyugali iti basol iti sanguanan ti amin,+ kas pakdaar iti dadduma.* 21  Sipapasnek a bilinenka iti sanguanan ti Dios ken ni Kristo Jesus ken dagiti napili nga anghel a tungpalem dagitoy nga instruksion nga awan ti dasdasigam wenno pabpaboram.+ 22  Dika agdardaras a mangiparabaw iti imam iti asinoman a lalaki;*+ dika makiraman iti basol dagiti dadduma; pagtalinaedem ti bagim a nadalus. 23  Dika uminumen iti danum,* no di ket uminumka iti bassit nga arak para iti tianmo ken iti masansan a panagsakitmo. 24  Ammo ti publiko dagiti basol ti dadduma a lallaki, nga agtungpal iti dagus a pannakaukom, ngem matakuatanto pay laeng ti basol ti dadduma a lallaki.+ 25  Kasta met, ammo ti publiko dagiti nasayaat nga aramid+ ken saan a mailemmeng dagidiay di nasayaat nga aramid.+

Footnotes

Lit., “Padayawam.”
Wenno “dagiti balo a babbai a talaga nga agkasapulan”; kayatna a sawen, awan ti mangsupsuporta kadakuada.
Wenno “a bilin.”
Wenno “ti immuna a karida.”
Wenno “dagiti balo a babbai a talaga nga agkasapulan”; kayatna a sawen, awan ti mangsupsuporta kadakuada.
Wenno “kaluban ti ngiwat.”
Wenno “panglakayen.”
Lit., “tapno agbuteng ti dadduma.”
Kayatna a sawen, dika agdarasudos a mangdutok iti asinoman a lalaki.
Wenno “Isardengmon ti uminum iti danum laeng.”