Ti Umuna a Cronicas 20:1-8

  • Naabak ti Rabba (1-3)

  • Napapatay dagiti higante a Filisteo (4-8)

20  Iti rugrugi ti tawen,* iti tiempo a panaggugubat dagiti ari, indauluan ni Joab+ dagiti soldado ket dinadaelda ti daga dagiti Ammonita. Pinalikmutanda ti Rabba,+ bayat a nagbati ni David idiay Jerusalem.+ Rinaut ni Joab ti Rabba ket rinebbana dayta.+  Kalpasanna, innala ni David ti korona iti ulo ni Malcam, ket naammuanna nga agdagsen dayta iti maysa a talento* a balitok, ken addaan iti agkakapateg a batbato. Naikabil dayta iti ulo ni David. Innalana met ti nakaad-adu a kinabaknang iti dayta a siudad.+  Innalana met dagiti umili sadiay ket pinagbalinna ida a pararagadi iti batbato ken trabahador+ nga agusar kadagiti natadem a remienta a landok ken wasay. Kasta ti inaramid ni David iti amin a siudad dagiti Ammonita. Kalpasanna, nagsubli ni David ken ti amin a soldadona idiay Jerusalem.  Kalpasanna, nakigubat dagiti Israelita kadagiti Filisteo idiay Gezer. Iti dayta a tiempo, pinatay ni Sibecai+ a Husatita ni Sipai, a kaputotan dagiti Refaim,+ ket naabak dagiti Filisteo.  Nakigubat manen dagiti Israelita kadagiti Filisteo, ket pinatay ni Elhanan nga anak ni Jair ni Lami a kabsat ni Goliat+ a Gitita, a ti putan ti pikana ket kas kapuskol ti pagipulipolan iti sag-ut dagiti agab-abel.+  Adda manen gubat idiay Gat,+ ket adda sadiay ti maysa a lalaki a sobra ti kadakkelna+ nga 6 ti ramay dagiti ima ken sakana, 24 amin; ken kaputotan met dagiti Refaim.+  Lalaisenna+ ti Israel, isu a pinatay ni Jonatan nga anak ni Simea,+ a kabsat ni David.  Dagitoy ti kaputotan dagiti Refaim+ idiay Gat,+ ket pinapatay ida ni David ken dagiti adipenna.

Footnotes

Kayatna a sawen, iti primavera.
Agarup 34.2 kg. Kitaem ti App. B14.