Ti Umuna a Cronicas 16:1-43

  • Naikabil ti Lakasa iti tolda (1-6)

  • Kanta ti panagyaman ni David (7-36)

    • “Nagbalinen nga Ari ni Jehova!” (31)

  • Panagserbi iti sanguanan ti Lakasa (37-43)

16  Isu nga inserrekda ti Lakasa ti pudno a Dios iti tolda nga imbangon ni David.+ Nangipaayda kadagiti daton a mapuoran ken daton a pakikappia iti sanguanan ti pudno a Dios.+  Idi naiteden ni David dagiti daton a mapuoran+ ken daton a pakikappia,+ binendisionanna dagiti tattao iti nagan ni Jehova.  Inikkanna met ti amin nga Israelita, tunggal lalaki ken babai, iti nagtimbukel a tinapay, bibingka a datiles, ken bibingka a pasas.  Kalpasanna, dinutokanna ti dadduma a Levita nga agserbi iti sanguanan ti Lakasa ni Jehova+ tapno itan-ok,* agyaman, ken idaydayawda ni Jehova a Dios ti Israel.  Ni Asaf+ idi ti pannakaulo, ni Zacarias ti sumaruno kenkuana; sa da Jeiel, Semiramot, Jehiel, Matitias, Eliab, Benaias, Obed-edom, ken Jeiel+ ti paratokar kadagiti dekuerdas nga instrumento ken arpa;+ ken ni Asaf ti parapiangpiang,+  ket da Benaias ken Jahaziel a papadi ti parapuyot kadagiti trumpeta iti sanguanan ti lakasa ti tulag ti pudno a Dios.  Iti daydi nga aldaw, nangputar ni David iti kanta kas panagyaman ken Jehova babaen ken Asaf+ ken dagiti kakabsatna:   “Agyamankayo ken Jehova,+ umawagkayo iti naganna,Ipakaammoyo dagiti aramidna kadagiti tattao!+   Kantaanyo, agkantakayo iti panangidaydayaw* kenkuana,+Utobenyo* ti amin a nakaskasdaaw nga aramidna.+ 10  Ipagpannakkelyo ti nasantuan a naganna.+ Agrag-o koma ti puso dagidiay mangsapsapul ken Jehova.+ 11  Sapulenyo ni Jehova+ ken ti pigsana. Itultuloyyo a sapulen ti rupana.*+ 12  Laglagipenyo dagiti nakaskasdaaw nga inaramidna,+Dagiti milagro ken panangukomna, 13  Dakayo a kaputotan* ni Israel nga adipenna,+Dakayo nga annak ni Jacob a pinilina.+ 14  Isu ni Jehova a Diostayo.+ Mangukom iti intero a daga.+ 15  Laglagipenyo iti agnanayon ti tulagna,Ti kari nga imbagana,* iti sangaribu a henerasion,+ 16  Ti tulagna ken Abraham,+Ken ti insapatana ken Isaac,+ 17  Nga inaramidna a bilin ken Jacob,+Ken kas agnanayon a tulag iti Israel, 18  Idi kinunana, ‘Itedkonto kadakayo ti Canaan,+Kas nairanta a tawidyo.’+ 19  Bassit pay laeng idi ti bilangyo,Wen, nakabasbassit, ken ganggannaetkayo idi iti daga.+ 20  Nagakar-akarda iti nagduduma a nasion,Iti nagduduma a pagarian ken ili.+ 21  Dina impalubos nga irurumen ida ti asinoman,+No di ket tinubngarna dagiti ari maigapu kadakuada,+ 22  A kinunana, ‘Diyo sagiden dagiti dinutokak,*Ken dikay agaramid iti dakes kadagiti propetak.’+ 23  Kantaanyo ni Jehova, dakayo amin iti daga! Inaldaw nga ipakaammoyo ti panangisalakanna!+ 24  Ipakaammoyo ti dayagna kadagiti nasion,Dagiti nakaskasdaaw nga aramidna iti amin a tattao. 25  Ta naindaklan ni Jehova ken maikari unay a maidaydayaw. Ad-adda a nakaskasdaaw ngem iti amin a sabali a dios.+ 26  Awan serserbi ti amin a dios dagiti tattao,+Ngem ni Jehova ti nangaramid iti langit.+ 27  Iti ayanna, adda kinadayag* ken kinangayed;+Iti pagnanaedanna, adda pigsa ken rag-o.+ 28  Idaydayawyo ni Jehova, dakayo a pamilia dagiti tattao,Idaydayawyo ni Jehova gapu iti dayag ken pigsana.+ 29  Itedyo ken Jehova ti dayag a maikari iti naganna,+Mangitugotkayo iti sagut ket sumangokayo kenkuana.+ Agruknoykayo* ken Jehova a nakasuotkayo iti nasantuan a bado.*+ 30  Agbutengkayo kenkuana, dakayo amin iti daga! Natibker ti pannakaipasdek ti daga,* saan a magaraw.*+ 31  Agragsak koma ti langit, ken agrag-o koma ti daga;+Ipakaammoyo kadagiti nasion: ‘Nagbalinen nga Ari ni Jehova!’+ 32  Agdaranudor koma ti baybay ken ti amin nga adda iti dayta;Agrag-o koma dagiti talon ken ti amin nga adda kadagita. 33  Siraragsak met koma nga agpukkaw dagiti kayo iti kabakiran gapu ken Jehova,Ta um-umayen* a mangukom iti daga. 34  Agyamankayo ken Jehova, ta isu ket naimbag;+Agnanayon ti napudno nga ayatna.+ 35  Ket ibagayo, ‘Isalakannakami, O Dios a mangisalakan kadakami,+Ummongen ken ispalennakami manipud kadagiti nasion,Tapno makapagyamankami iti nasantuan a naganmo+Ken naragsakkami a mangidaydayaw kenka.*+ 36  Maidaydayaw koma ni Jehova a Dios ti IsraelIti agnanayon.’”* Insungbat ti amin a tattao, “Amen!”* ket indaydayawda ni Jehova. 37  Kalpasanna, pinanawan ni David ni Asaf+ ken dagiti kakabsatna iti sanguanan ti lakasa ti tulag ni Jehova tapno itultuloyda ti agserbi iti sanguanan ti Lakasa,+ sigun iti inaldaw nga ar-aramidenda.+ 38  Pinanawanna met ni Obed-edom ken dagiti kakabsatna, nga agdagup iti 68. Ni Obed-edom, nga anak ni Jedutun, ken ni Hosa idi ti parabantay iti ruangan; 39  dinutokanna ni Zadok+ a padi ken dagiti padana a papadi nga agserbi iti sanguanan ti tabernakulo ni Jehova iti nangato a disso idiay Gibeon+ 40  tapno regular nga agidatagda ken Jehova iti altar ti daton a mapuoran, iti bigat ken rabii, ken aramidenda ti amin a naisurat iti Linteg ni Jehova nga imbilinna iti Israel.+ 41  Kaduada da Heman ken Jedutun+ ken ti dadduma pay a lallaki a napili nga agyaman ken Jehova,+ ta “agnanayon ti napudno nga ayatna”;+ 42  ken kaduada da Heman+ ken Jedutun a mangpaguni kadagiti trumpeta, piangpiang, ken instrumento a mausar a pangidaydayaw* iti pudno a Dios. Dagiti annak ni Jedutun+ idi ti parabantay iti ruangan. 43  Kalpasanna, nagawid ti amin a tattao kadagiti balayda, ket binendisionan ni David ti sangakabbalayanna.

Footnotes

Lit., “lagipen.”
Wenno “mangputarkayo iti musika.”
Wenno mabalin nga, “Isarsaritayo.”
Wenno “kaaddana.”
Lit., “bin-i.”
Lit., “Ti sao nga imbilinna.”
Wenno “pinulotak.”
Wenno “dignidad.”
Wenno “Agdaydayawkayo.”
Wenno mabalin a, “gapu iti kinangayed ti kinanasantuanna.”
Wenno “nabunga a daga.”
Wenno “magunggon.”
Wenno “dimtengen.”
Wenno “agragsakkami iti pannakaidaydayawmo.”
Wenno “Manipud iti awan inggana agingga iti awan inggana.”
Wenno “Sapay koma!”
Wenno “dagiti instrumento iti kanta para.”