ST. PETERSBURG, Russia—Idi Agosto 7, 2013, ti Tsentralniy District Court ti siudad ti Tver, nga agarup 160 kilometro iti amianan ti Moscow, inkeddengna a ti jw.org a website a mangisursuro iti Biblia ket rumbeng a maiparit iti intero a Russian Federation.

Ginasut a ribu ti bumisbisita iti jw.org iti intero a lubong ken talaga a raraemen dayta dagiti managsirarak. Ngem dinasigan ti korte dagiti opisial a mangikagkagumaan a mangiparit iti dayta a popular a website. Nagdesision ti korte a dida man la pinakaammuan wenno kiniddaw ti testimonia dagiti mangipabpablaak iti dayta a site, ti Watchtower Bible and Tract Society of New York. Nagapelar dagiti Saksi ni Jehova iti Tver Regional Court ket nayeskediul a denggen ti korte ti apela idi Enero 22, 2014.

No maibasura ti apela, ti website ket saanton a maluktan ti nasurok a 160,000 a Saksi ni Jehova iti Russia, a regular a mangus-usar iti dayta iti panagdaydayawda ken iti personal ken sangapamiliaan a panagadalda iti Biblia. Agbalin payen a krimen idiay Russia ti panangyendorso iti website. Saanto metten a mapalubosan ti agarup 142 a milion nga agnanaed iti Russia a manglukat iti jw.org tapno makaalada kadagiti libre nga impormasion maipapan iti Biblia. Kuna ni Yekaterina Elbakyan a Doctor of Philosophy, eksperto kadagiti panagadal maipapan iti relihion, ken propesor iti Academy of Labor and Social Relations idiay Moscow, a ti jw.org ket “maysa a regalo para iti asinoman nga agsirsirarak maipapan iti relihion. Mangipapaay dayta kadagiti impormasion a detalyado ken nalaka a maawatan. Naiparang met iti simple a pamay-an dagiti napapateg nga espiritual ken moral nga isyu. No us-usarem ti website, mariknam a siraragsak a paspasangbayendaka dagiti Saksi ni Jehova iti pagtaenganda.”

Manipud iti St. Petersburg, kuna ni Grigory Martynov a pannakangiwat dagiti Saksi ni Jehova iti Russia: “Ti jw.org a website ket nagpintas nga alikamen para kadagiti tattao iti pagilianmi nga agbirbirok kadagiti impormasion maipapan iti Biblia. Awan met ti aniaman a pakainaiganna daytoy iti politika wenno iti komersio. Mangnamnamakami a siguraduen ti Tver Regional Court a daytoy a popular ken makaisuro a website ket agtultuloy a silulukat para iti amin a Russian.”

Kastoy met ti komento ni J. R. Brown a pannakangiwat dagiti Saksi ni Jehova iti sangalubongan a hedkuarterda iti New York: “Ti jw.org a website ket mararaem kas makatulong iti panagsirarak ken pakakitaan kadagiti mapagtalkan nga impormasion para kadagiti pamilia iti intero a lubong. Mararaem unay daytoy ta agarup 900,000 a tattao ti bumisbisita iti site kada aldaw tapno makaala kadagiti positibo nga impormasion a mabasa iti agarup 600 a lengguahe. Nalawag a saan a nainkalintegan ti panangsensor iti daytoy a website.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691