Intuloy ti Korte Suprema ti Russian Federation ti maikatlo nga aldaw a panangdengngeg iti kaso a pannakaiparit dagiti Saksi ni Jehova idiay Russia. Karaman kadagiti nagtestigo ti dua a direktor ti Administrative Center a nangidatag kadagiti argumento maikontra iti pammabasol ti Ministry of Justice kadagiti Saksi ni Jehova.

Kinontra ni Sergey Cherepanov ti kiddaw ti Ministry nga isardeng ti Administrative Center ti panangsukir iti linteg maipapan iti extremism. Ngem di pulos nailawlawag ti Ministry no apay a nakunana a suksukiren ti Administrative Center dayta a linteg wenno no kasano a maisardengda ti panangsukir iti dayta. Kuna ti maysa pay a direktor a ni Vasiliy Kalin a 26 a tawenen nga aktibo ti Administrative Center. Sa insaludsodna: “Kaano a nagbalinkami nga extremist?” Innayonna pay a saan a nagbalbaliw dagiti Saksi ni Jehova—agtultulnogda iti autoridad ken kanayon a sursurotenda dagiti prinsipio maipapan iti talna. Imbagana a maidaddadanesen dagiti Saksi.

Inyeskediul ti hues a maituloy ti kaso inton Abril 12, 2017, iti 10:00 a.m.