Mapan iti linaonna

NOBIEMBRE 29, 2018
RUSSIA

Walo a Pagtaengan Dagiti Saksi iti Crimea, Sinerrek Dagiti Opisial ti Russia

Walo a Pagtaengan Dagiti Saksi iti Crimea, Sinerrek Dagiti Opisial ti Russia

Idi rabii ti Biernes, Nobiembre 16, 2018, sinerrek ti agarup 200 nga opisial ti Russia’s Federal Security Service (FSB) ti walo a pagtaengan dagiti Saksi ni Jehova iti Crimea.

Gapu iti pannakakigtot ken nakaro a danag iti panangserrek dagiti armado ken nakamaskara nga opisial ti FSB, ngimmato ti presion ti dara ti dua a Saksi ket masapul a maipanda iti ospital. Makapaladingit met ta naalisan ti maysa a sister.

Bayat ti panangserrek dagiti opisial, dinangranda ni Aleksandr Ursu, nga agtawen iti 78. Impidegda iti diding, immamegda, sa pinosasanda. Pinalutpot met dagiti polis ti dadduma pay a Saksi.

Ni pay laeng Brother Sergey Filatov (makita iti kannawan ti ladawanna) ti naipasango iti kaso kriminal. Inakusaran dagiti agtuturay a sinalungasingna ti Article 282.2, part 1, ti Russia’s Criminal Code—nga ipatpatungpal ti Russian Federation iti Crimean peninsula. Ti 47 ti tawenna nga ama ken addaan iti uppat nga annak, ti damo a nakasuan iti sidong ti linteg ti Russia maipapan iti extremist nga aktibidad.

Nupay madanagantayo gapu iti pannakaraut ken pannakaidadanes dagiti kakabsattayo, situtured nga agpannuraytayo iti Diostayo a ni Jehova, a mangpabileg kadatayo iti daytoy nariribuk a maudi nga al-aldaw.—Isaias 41:10.