Mapan iti linaonna

Ti grupo dagiti kakabsat manipud iti kannigid nga agpakannawan: Alberto Rovira (Spain), Peter Hamadej (Slovakia), Andrejs Gevla (Latvia), Chong Ho (Korea), Yaroslav Sivulskiy (Russia), Johann Zimmermann (Austria), Stefan Steiner (Switzerland), Vasiliy Kalin (Russia), Tommi Kauko (Finland), Mark Sanderson (United States), Robert Delahaije (Netherlands), Marc Hansen (Belgium), Paul Gillies (United Kingdom), Lars-Erik Eriksson (Sweden), Tommy Jensen (Denmark), Jørgen Pedersen (Norway), Manfred Steffensdorfer (Germany), Teemu Konsti (Lithuania), Babis Andreopoulos (Greece), Tambet Ernits (Estonia), Jean-Claude Pons (France)

HULIO 21, 2017
RUSSIA

Sinuportaran ti Grupo ti Kakabsat Manipud iti Nagduduma a Nasion Dagiti Kapammatianda Idiay Russia Bayat ti Panangdengngeg ti Korte Suprema iti Apelar

Sinuportaran ti Grupo ti Kakabsat Manipud iti Nagduduma a Nasion Dagiti Kapammatianda Idiay Russia Bayat ti Panangdengngeg ti Korte Suprema iti Apelar

NEW YORK—Nangbukel ti Bagi a Manarawidwid dagiti Saksi ni Jehova iti maysa a grupo dagiti kakabsat manipud iti tallo a kontinente a mapan idiay Moscow tapno ipakitada ti suporta dagiti kakabsat iti intero a lubong kadagiti kapammatianda idiay Russia.

Idi simmangpet ti grupo idiay Moscow, sinabat ida dagiti nakaisem a kakabsat a Russian, a dadduma kadakuada ket naggapu pay iti adayo a lugar a kas iti Siberia. Impasigurado ti grupo kadagiti kakabsat a Russian a kanayonda ida a pampanunoten ken naimpusuan nga ikarkararagan ida dagiti kakabsat iti intero a lubong. Kuna ti maysa a miembro ti grupo: “Talaga a naparegtaak kadagiti kakabsatko a Russian ta nakaturturedda uray no nagbassit ti tsansa a mabaliktad ti di nainkalintegan a desision a mangiparit iti aktibidadda.”

Uray no maikontra kadagiti Saksi ti desision ti panel a buklen ti tallo a hues, nagari ti pudno nga ayat ken panagkaykaysa iti uneg ti korte. Nalidayan unay dagiti kakabsat gapu iti pannakainsulto ti nagan ni Jehova iti publiko ken nabigbigda nga adu a pakarigatan ti agur-uray kadagiti Saksi idiay Russia. Nupay kasta, ti kinakalmado ken ayat nga impakita dagiti kakabsat iti korte ket umanayen a pammaneknek a di umiso ti akusasion kadakuada nga “extremism” a pinaboran ti panel.

Indauluan ni Mark Sanderson, a miembro ti Bagi a Manarawidwid, ti grupo. Iti naayat a pamay-an, pinaregtana dagiti kakabsat a pabilgenda ti pakinakemda ken agbalinda a natured kadagiti umay nga aldaw. Bayat a rumrummuar ti grupo iti korte, inarakup ida dagiti Saksi a Russian ken nagyamyamanda iti suportada iti daytoy a nagpateg a pasamak.

Napan met ti grupo iti 21 nga embahada idiay Moscow tapno mangted iti eksakto nga impormasion maipapan kadagiti negatibo nga epekto ti panangatakar ti Russia kadagiti Saksi ni Jehova. Karaman kadagita ti pannakapuor dagiti balay dagiti Saksi, pannakasesante, nakaro a panang-bully kadagiti ubbing iti eskuelaan, ken pannakaidarum ti dadduma a panglakayen gapu iti panangyurnosda kadagiti gimong, a pakairamanan ni Brother Dennis Christensen, a nakapupok agingga ita sakbay a mabista. Adda dagiti embahador a nalidayan idi binuyada ti dua a minuto a video a nangipakita kadagita a pasamak. Ti kaaduan nga insalsaludsod dagiti opisial ket, ‘Apay a dagiti Saksi ni Jehova?’ Nakaipaay iti nabileg a panangsaksi dagiti kakabsattayo babaen iti panangilawlawagda a neutral iti politika dagiti miembro ti organisasiontayo ken gapu iti panangasabatayo, simmayaat ti biag ti adu a Russian. Kuna ti maysa nga embahador: “Saan a kayat ti Orthodox Church a kasabaanyo dagiti pasurotda.” Nasurok a 10 nga embahada ti nangibaon iti pannakabagida iti korte ket nagtalinaedda bayat ti walo nga oras a pannakadengngeg ti kaso.

Pimmanaw ti grupo dagiti kakabsat idiay Russia a napabileg ti pammatida ken naparegta iti determinasion dagiti kakabsatda sadiay nga agtalinaed a matalek ken iti gundaway a makaipaay iti nasayaat a panangsaksi kadagiti opisial.

Media Contact:

David A. Semonian, Office of Public Information, +1-845-524-3000