Mapan iti linaonna

Mapan iti segundario a pagpilian

Dagiti Saksi ni Jehova

Iloko

PEBRERO 17, 2014
PHILIPPINES

Update: Kalpasan ti Bagyo a Haiyan, Immarayat Dagiti Saksi ni Jehova

Update: Kalpasan ti Bagyo a Haiyan, Immarayat Dagiti Saksi ni Jehova

MANILA, Pilipinas—Gapu iti nakaro a panangdadael ti bagyo a Haiyan (naawagan iti Yolanda iti Pilipinas), nangorganisar dagiti Saksi ni Jehova iti agtultuloy a sangalubongan a panangsaranay para iti Pilipinas.

Nangyurnos ti sanga nga opisina dagiti Saksi ni Jehova iti Manila iti lima a komite a pangsaranay tapno mapapartak ti panangtulong kadagiti biktima. Nasurok a 190 a tonelada a suplay ti naipatulod iti makintengnga a paset ti Pilipinas. Nagboluntario dagiti Saksi iti di kumurang a 10 a pagilian a tumulong iti panangsaranay. Tumultulong dagiti boluntario a mangbangon manen ken mangtarimaan iti nasurok a 2,000 a balbalay wenno mangipaay iti medikal a suporta.

Nangibangon dagiti Saksi kadagiti tolda iti maysa a relocation site iti asideg ti Calbayog City, Samar. Agarup 225 a tattao ti aggigian pay laeng kadagita. Saan a Saksi ti 15 agingga iti 20 a porsiento kadakuada.

Gapu ta maysa dayta kadagiti kapipigsaan a bagyo a timmama iti daga, ti bilang dagiti natay ket immabuten iti 6,201 ken 1,785 ti di pay nasarakan. Agarup 28,000 a tattao ti nadangran ken nasurok a maysa a milion a balbalay ti nadadael. Kinompirma ti sanga nga opisina dagiti Saksi ni Jehova iti Pilipinas a 33 a Saksi ti natay ken 10 ti saan pay a nasarakan ken naipagarup a natayen.

Dagiti nakalasat iti bagyo ket binisita ni Mark Sanderson a miembro ti Bagi a Manarawidwid dagiti Saksi ni Jehova

Nangrugi idi Disiembre 7, 2013, pito nga aldaw a binisita ni Mark Sanderson a miembro ti Bagi a Manarawidwid dagiti Saksi ni Jehova ti lima a probinsia iti naapektaran a rehion. Kinunana: “Adu pay laeng ti apektado unay kadagiti nakalkaldaang a resulta ti Bagyo a Haiyan iti Pilipinas. Ngem nakasaganakami nga agtultuloy a mangibaon kadagiti mangasistir ken mangipaay kadagiti kasapulan a suplay ken liwliwa a tumulong kadagiti biktima a makabangon.”

Media Contact(s):

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090