Mapan iti linaonna

Mapan iti segundario a pagpilian

Dagiti Saksi ni Jehova

Iloko

AGOSTO 1, 2014
SANGALUBONGAN A DAMDAMAG

Ikampania Dagiti Saksi ti JW.ORG—Ti Website a Kaaduan ti Pannakaipatarusna iti Intero a Lubong

Ikampania Dagiti Saksi ti JW.ORG—Ti Website a Kaaduan ti Pannakaipatarusna iti Intero a Lubong

NEW YORK—Mangrugi iti Agosto 1, 2014 ti makabulan ken sangalubongan a panangiwaras dagiti Saksi ni Jehova iti baro a tract a napauluan iti Pakasarakantayo Kadagiti Sungbat iti Napapateg a Saludsod iti Biag? a mangipakaammo kadagiti tattao maipapan iti opisial a website-da a jw.org. Gapu ta ti jw.org ket maluktan iti agarup 500 a lengguahe, nga addaan kadagiti publikasion a mabalin nga i-download iti dandani 700 a lengguahe, dayta ti kaaduan ti pannakaipatarusna a website iti intero a lubong.

Nasurok a maysa a milion a nadumaduma a tattao ti inaldaw a mangbisbisita iti jw.org. Itampok dayta a site dagiti artikulo ken video a mangipapaay iti praktikal a balakad kadagiti tattao aniaman ti edad, kultura, ken kasasaadda. Ti maysa kadagita a video a napauluan iti Apay nga Adalem ti Biblia? ket mai-link iti QR code a makita iti baro a tract. Agpadpada a nausar iti dayta a video dagiti aktual a kasasaad iti biag ken animation tapno mayilustrar dagiti praktikal a pagsayaatan ti panagadal iti Biblia. Iti agdama, magun-odan dayta iti nasurok nga 450 a lengguahe ken dandani 4 a milion a daras a nai-download daytan sipud iti pannakairuarna idi Nobiembre 18, 2013.

Inlawlawag ni J. R. Brown a pannakangiwat dagiti Saksi ni Jehova iti sangalubongan a hedkuarterda idiay Brooklyn, New York: “Magagarankami unay iti daytoy a kampania. Agarup walo a milion dagiti Saksi ni Jehova iti intero a lubong ket ipakaammomi amin kadagiti padami a tattao ti maipapan iti daytoy a website. Mabalin a daytoy pay laeng ti kasasaknapan a kampania nga inorganisarmi.”

Kinuna ni Geoffrey Jackson a miembro ti Bagi a Manarawidwid dagiti Saksi ni Jehova: “Sipud idi nangrugi dayta, dua a tawenen ti napalabas, nakita dagiti tattao iti intero a lubong a nagdakkel ti maitulong ti jw.org. Iti dayta a site, mabalinyo ti agbuya kadagiti video a makatulong kadagiti annakyo, agkonsulta kadagiti artikulo a makatulong iti pamiliayo, ken agbasa pay ketdi iti Biblia online. Inyurnosmi daytoy nga espesial a kampania ta kayatmi nga adu ti matulongan ti jw.org aginggat’ mabalin.”

Media Contact(s):

International: J. R. Brown, Office of Public Information, tel. +1 718 560 5000