Ọwẹwẹ nya ịBayịbụụ

 Ehe. ỊBayịbụụ-ụ́ ya nyori okpoko nyị ri ang onyobyi lee nyori ọwa nya-à ju ọmwụ nya ang inyibyi wuu lẹ ka. “Okpoko à ju ọmwụ nya ang inyibyi wuu lẹ” ri ẹla ọlẹ kọ chọnụ ka, kọ tị ka kpa angịnyị hwahị myị́. Ẹla ọlẹ ká ịBayịbụụ ya ri, “Okpoko ọ-há ọngịnyị há lụmẹ, a ri ụtẹ nya ang onyobyi ọhọhọ wuu lẹ.” a—1 iTimoti 6:10.

•  Ẹlịyẹ ịBayịbụụ à tị́ ya u-uhye nya okpoko?

•  Ịyẹ à tị́ du ká ịBayịbụụ gbileehi ụbwọ ụ-ụrụ u-uhye nya okpoko ọ-háahị há?

•  Ányị ahị tí ka bwu ye apyobwuna bwu ẹla ọlẹ ká ịBayịbụụ mẹjẹ u-uhye nya okpoko?

•  Ọgba ịlẹ kị ya ẹla nya okpoko

 Ẹlịyẹ ịBayịbụụ à tị́ ya u-uhye nya okpoko?

 ỊBayịbụụ ya nyori okpoko nyị kaa ju apyobwuna kori ká ọngịnyị-ị́ kpa họ ang la ẹla ọjẹ́jẹ, nyị domwu kaa “chewu ke ọngịnyị.” (Ọngọlirya 7:12) Datị hi ọwẹ, ịBayịbụụ mịloja ha angịlẹ kị kaa pyẹ ụbwọ maa hu ha angịkịla, okpoko tị ka juwa ẹ-ẹpwụ nya o-hu ha nyaa ọwẹ myị́ ịnyịnyị.—Etu 11:25

 Ọ tị lịnyị odu lẹ, ịBayịbụụ gbileehi ụbwọ ụ-ụrụ nyori ahị nyị hu okpoko kụ ịlahị ẹ-ẹpwụ nya ọhịhị nyahị ka. Ọ yẹkẹẹ: “Anụ cheri kanụ juwa gba ụbwọ nyanụ kpehe hi ẹpwụ nya ẹhị nyanya nya okpoko ọchịchị wuu mẹ. Kanụ myị ká ang myị́ ang ọlẹ kanụ la juwa lẹ, a nwanụ ba ụ-ụwa mẹ.” (Ala iHiburu 13:5) Ẹla ọlẹ kahị jẹ́ ri ọ-ka kpa okpoko họ ụkụrwọ ụ-ụgbẹyị ọlẹ kọ pwoku, ọ-kaa ku ang-ụdụ ka. Ọkọkọ nyọọwa lẹ, ahị ka maga ká ang ọlẹ kahị la i-ijata ka nwahị ba ụ-ụwa, ang lala ang oriri, ang ịkụrụ-kụrụ bala ẹpwa.—1 iTimoti 6:8.

 Ịyẹ à tị́ du ká ịBayịbụụ gbileehi ụbwọ ụ-ụrụ u-uhye nya okpoko ọ-háahị há?

 Angị chẹhị nyanya nya okpoko-ó ka ri ugu nya Ịpyị-Adịrahụ nya Ohe ka. (Ala Efesọsị 5:5) Ang odudu ọhẹ ri, ẹhị nyanya ọchịchị ri ụpa nya ojiga ọkpụkpụ lee ịgba ọgbagba nya ọnọọkịla. (Ala iKolosi 3:5) Ang odudu ọkịla ri, jaabwọ kị wẹẹ maga nyọka ye ang ọlẹ kị tịtọ, ị kaa ya abwẹla ọnyịịla ụma ọnyị myị́ ọnyị ọlẹ kị la ene beji. Etu 28:20 bwu NW yẹkẹẹ: “Ọngọ chagaga nya ụdụ ọkpụkpụ kaakpa ụbwọ ka ju ang ọtịpyọ.” Ị dọmwụ ka la ọmayẹ nyọka họ ang inyibyi lala uhi ọ-chị ju angịnyị nyọka naa okpoko, angịnyị ọ-họ ri, angịnyị o-nu okpoko la agbụrụ, angịnyị o-wu yoyi lee angịnyị ọnwụnwu.

 Kori ká ọháha nya okpoko-ó dọmwụ kpa ọngịnyị ka họ ang ịtịpyọ ka wẹwẹ, ọ ka kpa akama ịkịla wọọ myị́. ỊBayịbụụ ya nyori “angịlẹ kị kaa charịnya nya ụdụ ọkpụkpụ a kaa chabwọ kpụ ẹpwụ nya ọmayẹ bala ọnya owuwu nya Ohe Onyobyi bala imyi nya ịnyịrọ ọlẹ kọ kaa kpaa kaka họ ang ohideeji ọlẹ kọ kaa kpa ang ọjụjụ kịlaa lẹlẹ. Ọlịnyị a kaa kpa iyabwọ bala ayịreji ọtata pyịyọọ kịla ọngịnyị lẹlẹ.”—1 iTimoti 6:9.

  Ányị ahị tí ka bwu ye apyobwuna bwu ẹla ọlẹ ká ịBayịbụụ mẹjẹ u-uhye nya okpoko?

 Kori kahị họ ang ọtịpyọ lee ọ-bịrị ehile nya Ohe ọọlajị nya okpoko ka aalẹ, ahị ka la ịlọhị ihi-ihi, Ohe tị ka wahị kụrụụhị bala ọ-chẹkpẹ juhi ịnyịnyị. Ohe chị angịlẹ kị wẹẹ maga nya ịlẹhị-ịlẹhị nyọka họ ẹla kpọọ ịpyọ ehe ọlẹ: “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.” (Ala iHiburu 13:5, 6) Ọ myịmyị chịhị ehe ọlẹ yẹkẹẹ: “Ọngọ la kpẹẹkpẹẹ kaa ye ahị ọwawa nya Ohe Oluhye.”—Etu 28:20.