Ọwẹwẹ nya ỊBayịbụụ

 IJisọsị chị angịnyị ehe ịlẹ kị chịla o-hu ọkịlẹtụ ha da ụka kọ hu ọhịhị nyamwụ kiliya. (ỊMatiyu 20:28) Lẹ, ịBayịbụụ wụrụ iJisọsị nya “Ọngọchịda [nya] alodehe wuu.” (1 ỊJọn 4:14) Ọ myịmyị yẹkẹẹ: “Ọchịda nya Ohe Oluhye á tị juwa hahị ahị angịnyị ehe la ụgbẹyị ọkịla ọhẹ-lọhẹ dala o-bwula ẹnyị nya iJisọsị ịKịrayịsị ọwẹ kaka. Chajị, ẹnyị ọkịla ọhẹ-lọhẹ á juwa ọlẹ ká Ohe Oluhye hu ha ọngọngọhẹ e-ekpeleji nya ẹnụ ọlẹ, kahị ka jẹ́-ẹ bwu lọọ, chịda myị́ kpong-kpong kaka.”—Ụkụrwọ nya Alẹrụ 4:12.

 IJisọsị ‘gbu igu wọnụ nya ọng myị́ ọng’ ọlẹ kọ la ọmyịmyị ẹ-ẹga nyamwụ ju. (Ala iHiburu 2:9; ịJọn 3:16) “Ohe Oluhye tị wule iJisọsị ọwẹ eji bwula igu,” ọọwa lẹ ọ rụ kele ka epwoohe la ugbinyịrọ nya olegu lẹlẹ. (Ụkụrwọ nya Alẹrụ 3:15) Ụ-ụwa, iJisọsị la ọngịrị ka jẹ́-ẹ ‘hu ọchịda ha angịlẹ wuu kị ka myị-ị kele ka ẹga nya Ohe Oluhye bwu lọọ myị́. Chajị o juwa hịhị pyịyọọ nyọka bịlọọ wọnụ nyaa ju.’—Ala iHiburu 7:25.

Ịyẹ tị́ du kahị baba nya iJisọsị nyọka bịlẹ wọnụ nyahị ju?

 Ahị wuu ri alọhọbịrị. (Ala iRom 3:23) Ọhọbịrị chịhị ebwo hi Ohe bala ọ-kaa ju ọmwụ nya igu. (Ala iRom 6:23) Ma iJisọsị kaa ‘bịlẹ wọnụ’ nya angịlẹ kị la ọmyịmyị ẹ-ẹga nya iya ọkịlaakịla nyamwụ. (1 Jọn 2:1) Ọ kaa bịlẹ Ohe nyọka wo abwọ ọrịrị bala ọ-ka hịnyọhi ịhọbịrị nyaa haa bwula iya ọkịlaakịla nyamwụ. (ỊMatiyu 1:21; Ala iRom 8:34) Ohe kaa ke ụrụ wo ọ-bịlẹ-bịlẹ nya iJisọsị ịwẹ chajị ị pwoku irya nyamwụ. Ohe du iJisọsị wẹ odehe nyọka ri “Ọngọchịda nyaa ịnyị.”—ỊJọn 3:17.

Ọ-ka myị la iJisọsị à ri ang ọlẹ kahị ka họ kẹnẹ-kẹnẹ nyọka ye ọchịda lẹ?

 Ehe. Nanana nyori o-ri opyii kahị ka myị la iJisọsị ene kahị ka chịda, ahị baba nyọka họ gụ ọọwa. (Ụkụrwọ nya Alẹrụ 16:30, 31) ỊBayịbụụ yẹkẹẹ: “Jaabwọ ká ugbinyịrọ nya ọngịnyị ehe ọlẹ ká [olegu] á gba kpehe rụ hi lẹ, kaa ri uguru nya ang wẹẹ, ịnyịnyị, ọmyịmyị ọlala ọlẹ kọ kaa kpa ụkụrwọ ọnyịịla ọhọhọ chị ịlọmwụ ehe ka, a tịtị ri uguru nya ang lala ogu lẹlẹ.” (IJemsi 2:26) Nyọka ye ọchịda, o ri opyi kahị ka:

•   Jẹ́ ang u-uhye nya iJisọsị bala Adamwụ, iJihova.—ỊJọn 17:3.

•   Nwụ ọmyịmyị ẹ-ẹga nyaa.—ỊJọn 12:44; 14:1.

•   Mẹ ọmyịmyị nyahị jẹ bwula o-ju ihi nya ehile nyaa. (ILuku 6:46; 1 ịJọn 2:17) IJisọsị mẹ ang jẹ nyori ọ-ọng myị́ ọng ọlẹ kọ wụrọọ nya “Ọngọlahị” à ka chịda ka, ma angịlẹ kẹnẹ-kẹnẹ kị “juwa họ irya nya Ohe Oluhye [Adamwu] ọlẹ kọ juwa e-epwoohe lẹ mẹ ịnyị.”—ỊMatiyu 7:21.

•   Kịnyaa la ọ-ka mẹ ọmyịmyị nyahị jẹ nanana ẹ-ẹpwụ nya akama. IJisọsị họ ẹla ọwẹ la gbagbịla ụka kọ yẹkẹẹ: “ọng myị́ ọng ọlẹ kọ ka kpa ugbodu ojuju nyamwụ pwụ ọbaba lẹ aalẹ, ọngọọwa a ka wu ọchịda nya Ohe Oluhye ọyị lụka ohyẹẹkpẹ lẹlẹ.”—ỊMatiyu 24:13.