Ọwẹwẹ nya ịBayịbụụ

 Ẹ-ẹpwụ nya ịBayịbụụ, omyi ẹla ọlẹ kị yẹda ka “owuleji bwula igu” la òja nya iGiriki ri a·naʹsta·sis. Etu nyamwụ ri “owuleji” lee “o-godayị kọkọ.” Ọngọnyị kọ wuleji bwula igu kaa wẹ ka hịhị myịmyị jaabwọ kọ la ene-ene.—1 Ala ịKọrịntị 15:12, 13.

 Ịlẹhị lẹ, ị́ da “owuleji bwula igu” kwọnggọ ẹ-ẹpwụ nya Ụpwụ Ịgọgọ ọlẹ Kị Da la Òja nya iHiburu ka, ma ang ọmẹjẹ u-uhye nyamwụ juwa. Ọ-chụ pwokwita, Ohe ya bwula ọlọmwụ iHoseya yẹkẹẹ: “M̀ ka gbaa kpehe bwu ẹpwụ nya ọngịrị nya iworu lee ọ-chaa da bwu ẹpwụ nya igu-ú?”—IHoseya 13:14; iJobu 14:13-15; Ayịsaya 26:19; ịDanẹlụ 12:2, 13.

 Ale angịnyị à tị́ ka wuleji bwula igu ka? Angịhyẹ kaa wuleji bwula igu kaka hịhị e-epwoohe nyọka kpeji bala iJisọsị. (2 Ala ịKọrịntị 5:1; Ọwụrụụ-wụrụ 5:9, 10) ỊBayịbụụ wụrwọọ nya “eji owule bwula igu nya ọgbanyẹ-ọgbanyẹ” lee “owuleji bwula igu” ojene. Ọọwa mẹjẹ nyori owuleji bwula igu ọkịla juwa datị hi ọwẹ wẹẹ. (Ọwụrụụ-wụrụ 20:6; Ala iFilipayị 3:11) Owuleji bwula igu ọọwa ka ri ịnya angịlẹ kị ka hịhị odehe. Ọwa iru nya angịnyị à ka la lẹ.—Eje Ọnyịịla 37:29.

 Ányị angịnyị à tị́ kaa la ụka kị wuleji bwula igu? Ohe ya ọngịrị ha iJisọsị nyọka wule egu eji. (ỊJọn 11:25) IJisọsị ka tịrị “angịlẹ kị gbugbu juwa i-iworu nyaa wuu” ẹkpẹ wẹ ọhịhị. Ọng myị́ ọng nyaa ka la abwụma ọlẹ kọ la ene koo gbu, ang ịlẹ kị kpa jọ́ọ wuu, bala ọ-kpịtịya nya ang inyogo ịnyịnyị. (ỊJọn 5:28, 29) Angịlẹ kị wuleji bwula igu ka epwoohe ka la ugbinyịrọ nya alegu, ma angịlẹ kị wuleji bwula kaka hịhị odehe ka la ugbinyịrọ ọkpẹẹkpẹẹ nya ọngịnyị ehe.—Ayịsaya 33:24; 35:5, 6; 1 Ala ịKọrịntị 15:42-44, 50.

 Owo à tí ka wuleji bwula igu? ỊBayịbụụ ya nyori “owuleji bwula igu ka ji ha alabwẹla ọnyịịla tụ́ alabwẹla ọtịpyọ.” (Ụkụrwọ nya Alẹrụ 24:15) Angịnyị lala iNuwa, iSera, bala Ebiraham juwa ẹ-ẹpwụ nya alabwẹla ọnyịịla ịwẹ. (Ọmwụ Ọdada 6:9; Ala iHiburu 11:11; iJemsi 2:21) Alabwẹla ọtịpyọ ri angịlẹ ki kpa ehile nya Ohe myị́ ka chajị nyọlẹ kị la iwe nyọka jọ́ọ bala ọ-bọọ jẹ ka.

 Ma angịlẹ kị ri alabwẹla inyibyi kpoye nya ọ-nwụ rịrị, á ka jẹ́-ẹ wuleji bwula igu ka. Ụka ká angịlịnyị á gbu lẹ, ọọwa à ri ayịreji o-gboyi myị́ oyi nyaa ịwa lẹlẹ, ị́ ka jẹ́-ẹ la iwe nyọka wuleji bwula igu kaka.—ỊMatiyu 23:33; Ala iHiburu 10:26, 27.

 Ụka oyina owuleji bwula igu à tị́ ka ji? ỊBayịbụụ ya nyori owuleji bwula igu ka epwoohe nyị ka họ jịra ụka ká ịKịrayịsị nyị ka mwẹẹkpẹ warị lee ụka nya ijata ojiji nya ịKịrayịsị, kọ dọmwụ la ẹka nya 1914. (1 Ala ịKọrịntị 15:21-23) Owuleji bwula igu ka hịhị odehe ka họ jịra lụka nya Eji Ọkpakpa nya ịKịrayịsị Ọlẹpwụ nya Ẹka Ụnọ, ká odehe wuu ka yẹ la ịparadayịsị.—ILuku 23:43; Ọwụrụụ-wụrụ 20:6, 12, 13.

 Ịyẹ tị́ du ko pwoku nyọka myị la owuleji bwula igu? ỊBayịbụụ ya ẹla rige-rige u-uhye nya owuleji bwula ihikichu ịhyẹ, ịlẹ ká angịnyị kpẹhị yẹ. (1 Ịdịrịhụ 17:17-24; 2 Ịdịrịhụ 4:32-37; 13:20, 21; iLuku 7:11-17; 8:40-56; ịJọn 11:38-44; Ụkụrwọ nya Alẹrụ 9:36-42; Ụkụrwọ nya Alẹrụ 20:7-12; 1 Ala ịKọrịntị 15:3-6) Owuleji bwula igu nya ịLasarọsị la ẹbyẹbyị lụmẹ chajị ọ la ahyẹẹnụ ine ká ịLasarọsị gbu lẹ, ị-ịlahị nya iru nya angịnyị iJisọsị à tị họ ụkụrwọ ẹbyẹbyị ọwẹ lẹ. (ỊJọn 11:39, 42) Angịlẹ kị dọmwụ kaa ba iJisọsị ẹtẹ á jẹ́ pwa rwarụ nyori ụkụrwọ ẹbyẹbyị ọwẹ nyị́ họ ka lẹ ka, ọkọkọ nya ọọwa lẹ, ị me obyi nyọka nwụ iJisọsị bala ịLasarọsị.—ỊJọn 11:47, 53; 12:9-11.

 ỊBayịbụụ mẹjẹ nyori Ohe nyị la ọngịrị nyọka wule egu eji bala ọ-tịtọ nyọka họ ịnyị. Ọ kpịtịya nya ẹla myị́ ẹla u-uhye nya ọng myị́ ọng ọlẹ kọ wẹẹ ka kpa ọngịrị nyamwụ wuleji bwula igu. (IJobu 37:23; ịMatiyu 10:30; iLuku 20:37, 38) Ohe tịtọ nyọka wule egu eji, ọ tị la ọngịrị nyọka họ ịnyị! U-uhye nya owuleji bwula igu, ịBayịbụụ ya ẹla ọlẹ rú Ohe: “Iwoo nya ụkụrwọ-ụbwọ nyang ka wung.”—IJobu 14:15.

Ọnọọkịla u-uhye nya owuleji bwula igu

 Ọnọọkịla: Owuleji bwula igu ri ụka ọlẹ ká ugbodu okpukpuru ka tịrẹkpẹ wẹ ẹpwụ nya ịnyịrọ myịmyị.

 Ẹlịlẹhị: ỊBayịbụụ mẹjẹ nyori ugbodu okpukpuru ri ọngịnyị lẹpwụ-lẹpwụ ịnyị, ụpa nyamwụ ọhẹ ọlẹ kọ ka chịda ụka ká ọngịnyị á gbu ka. (Ọmwụ Ọdada 2:7, Isikẹlụ 18:4) Ugbodu okpukpuru nya ọngọlẹ kọ wuleji bwula igu à kaa tịrẹkpẹ kaka jwoo ka; Ohe kaa mọọ họ myịmyị kọ ka wẹ kaka ri ugbodu okpukpuru ịnyị.

 Ọnọọkịla: Ị kaa wule angịhyẹ eji bwula kpụrụrụ ka tayịreji.

 Ẹlịlẹhị: ỊBayịbụụ ya nyori angịlẹ kị “họ abwẹla onyobyi,” nyị “ka wuleji bwula igu ka ju ka ẹpwụ nya eje.” (ỊJọn 5:29) Ma eje ọwẹ ka kpụnịrọ ang ọlẹ kị họ nyọlẹ kị wuleji bwula igu kpá ịnyị, a-ang ọlẹ kị họ ene kịị gbu ka. IJisọsị yẹkẹẹ: “Angịlẹ wuu kị gbugbu kpá wuu lẹ, ka wo omyi nya Ọnyẹwẹ nya Ohe Oluhye. Angịịwa ịlẹ kị ka wo omyi nyamwụ ọọwa ka la ọhịhị ọmyịmyị-ka.” (ỊJọn 5:25) Angịlẹ kị “wo omyi nyamwụ,” lee o-ju ihi nya ẹla ọlẹ kị jẹ́ nyọlẹ kị wuleji bwula igu kpá, ị ka da ẹnyị nyaa ẹ-ẹpwụ nya “ụpwụ nya ọhịhị.”—Ọwụrụụ-wụrụ 20:12, 13.

 Ọnọọkịla: Ụka ká ọngịnyị á wuleji bwula igu, ịnyịrọ ọlẹ kọ la ene koo gbu kpangga ọ wẹẹ ka la lẹ.

 Ẹlịlẹhị: Ụka ká ọngịnyị á gbu, ịnyịrọ nyamwụ kaa mama.—Ọngọlirya 3:19, 20.