Iru nya angịlẹ kị tọ ịtọ ẹla ịwẹ yẹ akama ọtụka-ọtụka bwu ẹlẹwẹ, ị́ tị tịtọ nya ọwẹwẹ kem ka, ma ị tịtọ nya ẹjẹ ọkpụ́kpụ ịnyịnyị. Angịkịla yẹ ẹlẹwẹ lala ẹla nya imajẹ nya ọngịnyị ehe ọlẹ kọ gụgụ wuu, dudu kọ kaa laa ujwo nyọka myị la Ohe.

Ịnịịkịla u-uhye nya Ohe bala igu nya ala iJuu

Ọnọọkịla: Ọ tịpyọ nyọka tọ Ohe ẹlẹwẹ wo.

 Ẹlịlẹhị: Angịnyị ịlẹ kị la ọmyịmyị nyịlẹhị-ịlẹhị tọ Ohe wo nya ang odudu kọ ya iwe da ká ang onyobyi ji. Ọ-chụ pwokwita, ọlọmwụ ịHabakuku tọ Ohe wo yẹkẹẹ: “Ịyẹ tị́ du ká juwa yẹ ang onyobyi ọhọhọ ịlịnyị chịng? M̀ yẹ ká angịnyị juwa ta ang ayịreji bala ọ-họ awụlẹ agbụrụ.” (ỊHabakuku 1:3) Ọkọkọ nyọka wẹẹjẹ ta ịHabakuku, Ohe da ịtọ ẹla nyamwụ ju ị-ịBayịbụụ chajị ká ọng myị́ ọng ka wa.

Ọnọọkịla: Akama nya angịnyị ehe-é ri Ohe ẹla ka.

 Ẹlịlẹhị: Ọkwọ ọhọhọ bala akama ọlẹ kọ kaa kpa wẹ angịnyị wụ́ Ohe ẹjẹ. (Etu 6:16-19) Nyọlẹ ká Ohe yẹ ọkwọ ọhọhọ ọlẹ kọ pyẹ myị̀ odehe lụka nya iNuwa, o yẹkẹẹ, “abwẹla onyobyi ọhọhọ nyaa tọm olujwo lụmẹ.” (Ọmwụ Ọdada 6:5, 6) Ọ́ ju ọ-dịwẹẹ ju ka, igu nya ala iJuu ịwẹ jụ Ohe bala ọ-tọọ olujwo ịnyịnyị.—ỊMalakayị 3:6.

Ọnọọkịla: Ohe à wẹẹ yẹ ala iJuu akama lẹ.

 Ẹlịlẹhị: Ịlẹhị lẹ, Ohe ya iwe da ha ala iRom nyọka ta iJerusalẹm ayịreji la oyi ọhọhẹ. (ỊMatiyu 23:37–24:2) Ma, bwu ụka ọọwa wẹ ịlahị tị lẹ, Ohe-é kaa chụ òja ọhẹ datị nyọka wahị kụrụ lee ọ-ka yaa akama kaka. “Ịngịngịhyẹ á ri ang ọdatị ẹ-ẹpwarịrị nya ala iJuu bala ala iJentayịlị ị-ịlahị nya Ohe Oluhye kpong-kpong ka.”—Ala iRom 10:12.

Ọnọọkịla: Kori ká Ohe ọlẹ kọ la ọháha bala ọ-la ọngịrị á ji ịnọ, ọ ka hu ẹlẹwẹ abwọ.

 Ẹlịlẹhị: Ohe-é kaa ju ọmwụ nya akama ka, ọ tị kaa ya iwe da họọ ụka ọhẹ.—iJemsi 1:13; 5:11.

Ịyẹ tị́ du ká Ohe ya iwe da kị nwụ ala iJuu?

 Ohe ya iwe da ha ẹlẹwẹ jaabwọ ọlẹ kọ ya iwe da ha akama nya angịnyị ehe wuu ịnyị, ko ri ọ-ka wẹ ịtọ ẹla ịlẹ kị kpehe lalẹ lụka ọtatata. ỊBayịbụụ meje nyori Olegu Onyobyi à kpa odehe ọlẹ ụ-ụbwọ lẹẹlẹẹ lẹ, o-Ohe ka. (ILuku 4:1, 2, 6; ịJọn 12:31) Ẹlịlẹhị ịkpọnchị imiiye bwu ịBayịbụụ ka jẹ́-ẹ dahị ụbwọ jẹ́ ang odudu ká Ohe ya iwe da ha uguru ẹla ọwẹ.

1.   Ohe ya ọngịrị hahị nyọka cheje ha ịlọhị. Ohe ya ẹla ọlẹ kọ tịtọ bwu ẹga nya Adam bala Iivu jaa, ma ọ́ gbịlaa ka ju ẹla nyamwụ ihi la agbụrụ ka. Ị chụ nyọka cheje ha ịlaa u-uhye nya ang ọnyịịla bala ang ọtịpyọ. Eje ọchịchị ọtịpyọ nyaa ọọwa bala eje ịtịpyọ ụma ịlịnyịịnyị ịlẹ ká angịkịla chị, kpa akama ịtụka-ịtụka wẹ angịnyị ehe. (Ọmwụ Ọdada 2:17; 3:6; Ala iRom 5:12) Ọ la jaabwọ ká ụpwụ nya Statement of Principles of Conservative Judaism ya: “Ụmụmẹ nya akama olodehe ọlẹ ji chajị nyọlẹ kahị kpa ọngịrị nyọka cheje hịlọhị họ ụkụrwọ ụ-ụgbẹyị ọtịpyọ.” Ọkọkọ nyọka nuhi ọngịrị ọọwa, Ohe ya ụka da ha angịnyị ehe kị ka maga nyọka kpịlaa, la ọ-ka ji ekpeleji nya eji ọkpakpa nyamwụ ka.

2.   Ọ ka jẹ́-ẹ nwụla ang ọlẹ ká uguru ẹla ọwẹ bịrị, ọ tị ja họ ịnyị. Ohe chehe nyọka wule uku ịmanyị tị́ nya angịlẹ kị gbu, eji bwula igu, tụ́ ala iJuu ịlẹ kị nwụ la ụka nya ụgụrụ ẹla ọwẹ. Ọ ka myịmyị-ị̀ myị́ ajụjụ ọlẹ ká angịlẹ kị chịda bwu ẹlẹwẹ kaa chịpwụrụ bwu ọọlajị nya ịtịya ọkpụkpụ nya ẹla ọlẹ kọ họ. (Ayịsaya 65:17; Ụkụrwọ nya Alẹrụ 24:15) Ọháha ọlẹ ká Ohe la ẹ-ẹga nya angịnyị ehe ya ahị ọdahile hahị nyori ọ ja họ ẹlẹwẹ jịra pyii.—ỊJọn 3:16.

 Iru nya angịlẹ kị chịda bwu ẹla onyobyi ọwẹ kịnyaa ẹ-ẹpwụ nya ọmyịmyị nyaa bala ọ-la ọhịhị ọ-la etu bwula ọ-jẹ́ ang odudu ká Ohe ya iwe da ha ang onyobyi bala irya ọlẹ kọ la nyọka nwụla ang ị-ịlahị.