Ọwẹwẹ nya ỊBayịbụụ

 Ọhọbịrị ri ẹla myị́ ẹla ká ọngịnyị họ bala o-me irya ju, kọ bịrị ehile nya Ohe. O ri ọ-bịrị ehile nya Ohe bwula ọ-họ ang ọlẹ kọ tịpyọ ẹ-ẹhị nyamwụ. (1 ịJọn 3:4; 5:17) ỊBayịbụụ myịmyị ya nyori nyị ri ọhọbịrị kori ká ọngịnyị nyị́ jẹ́ ang ọnyịịla kọ pwa la ọ-họọ.—IJemsi 4:17.

 La òja ọlẹ kị yọọ da bwu, etu nya ọhọbịrị ri “ọ-da lá ang,” jaabwọ kị kaa da ịcha lá ang. Ọ-chụ pwokwita, ebwo nya alẹwụ nya ala Isirẹlụ ịhyẹ jẹ́-ẹ da ọmẹ yẹẹyẹẹ, chajị kori kị yẹhị me ang lẹ, ‘ị́ kaa da lọọ kaka.’ Kori kị yẹ omyi ẹla ọwẹ da kpụrụrụ, ị ka jẹ́-ẹ ya nyị́ “ka họ ọhọbịrị ka” myị́. (Angịleje 20:16) Lẹ ọ-ka họ ọhọbịrị ri ọ-ka lá ehile nya Ohe.

 Ohe à họ angịnyị ehe wuu lẹ. Chajị nya ọọwa ọ la ọngịrị nyọka da angịnyị ehe ehile. (Ọwụrụụ-wụrụ 4:11) Ahị la ẹla ka wẹ ị-ịlahị nya Ohe u-uhye nya ang myị́ ang ọlẹ kahị họ.—Ala iRom 14:12.

Ọ chịkpẹẹ nyọka họ ọhọbịrị kpong-kpong ka?

 Ehe. ỊBayịbụụ yẹkẹẹ: “Alodehe wuu họ ang onyobyi lẹ, ọngọngọhẹ nyaa á la ọhịhị pwoku ogbo nya Ohe Oluhye myị́ kaka.” (Ala iRom 3:23; 1 Ịdịrịhụ 8:46; Ọngọlirya 7:20; 1 ịJọn 1:8) Ịyẹ tị́ du?

 Adam bala Iivu á kaa họ ọhọbịrị bwu ọmwụ ọdada ka, chajị Ohe haa kpẹẹkpẹẹ la abwụma nyamwụ. (Ọmwụ Ọdada 1:27) Ma, ọkpẹẹkpẹẹ ọlala nyaa gwaa byi nyọlẹ kị ju ihi nya Ohe ka. (Ọmwụ Ọdada 3:5, 6, 17-19) Ụka kị ma anyị, ị ya ọhọbịrị chị kịlaa lala ẹdụrụ ọlẹ ká ọnyị kaa ri ugu bwu ẹga nya adịda bala ịnịna. (Ala iRom 5:12) Adịrahụ iDevidi yoo ịlẹ, “M̀ ri ọlọhọbịrị bwu ẹnụ kị mam gbee daalẹ.”—Eje Ọnyịịla 51:5.

Ọhọbịrị ịhyẹ tịpyọ gụ ịkịla?

 Ee. Ọ-chụ pwokwita, ịBayịbụụ ya nyori ala ịSọdọm nyị kaa họ “ang onyobyi . . . ịnyịnyịịnyị” bala o-ri nyị kaa họ “ọhọbịrị ọtụka.” (Ọmwụ Ọdada 13:13; 18:20) Kụ ẹhị yẹ ang ịta ịlẹ kị kaa mẹjẹ jaabwọ ká ọhọbịrị lụmẹ lee ọ-la ilo kaka ba wẹẹ.

1.   Ilo nyamwụ. ỊBayịbụụ dahị ọna nyọka cheji ba hi ịhọbịrị ịtụka lala ụya ọhọhọ, ojiga ọkpụkpụ, oyi oyiyi, ere ọ-nwà kpoye, ọngịnyị o-nu ang la agbụrụ, ọngịnyị ọnwụnwụ, lee ọ-họ ala bala alegu inyibyi. (1 Ala ịKọrịntị 6:9-11; Ọwụrụụ-wụrụ 21:8) ỊBayịbụụ mẹjẹ nyori ịhọbịrị ịwẹ nyị datị hi ịhọbịrị ịlẹ ká ọngịnyị tọchị họ ka, lee ọ-họ la ajẹ́jẹ ka, kị tị jụ angịkịla. (Etu 12:18; Ala Efesọsị 4:31, 32) Ọ lịnyị odu lẹ, ịBayịbụụ juhi ọhụ nyori ahị nyị yẹhị da ọhọbịrị ọlẹlẹhẹ bwee ka, chajị ichiche-ichiche ịwẹ à kaa kpa ọngịnyị ka bịrị ehile nya Ohe ụ-ụgbẹyị ọtụka lẹ.—ỊMatiyu 5:27, 28.

2.   Irya ọlẹ ká ọngịnyị kpa họọ. Ọngịnyị kaa họ ịhọbịrị ịhyẹ, la ọ-jẹ́ nyori ẹla ịịwa nyị wụ́ Ohe ẹjẹ ka. (Ụkụrwọ nya Alẹrụ 17:30; 1 iTimoti 1:13) ỊBayịbụụ á myị ọnụ ju ịhọbịrị ịlịnyị ka, ma ọ mẹjẹ nyori nyị datị hi ọlẹ ká ọngịnyị nyị kaa mamachịng bịrị ehile nya Ohe. (Ọwawa 15:30, 31) Ọ-mamachịng họ ọhọbịrị kaa bwu ẹpwụ nya “aruwoka ọlọkịlẹtụ” lee ọkịlẹtụ onyobyi.—IJeremaya 16:12.

3.   Ọ-hyaahyaa nyamwụ. ỊBayịbụụ myịmyị ya nyori ọngịnyị ọ-họ ọhọbịrị ụka ookpokpo nyị datị hi ọ-ka juwa ma ọhọbịrị ọọwa họ ịnyịnyịịnyị lụka ọtata. (1 ịJọn 3:4-8) Angịlẹ kị “tọchị-tọchị wuleji kele kaka họ ang onyobyi” kpá nyọlẹ kị jẹ́ ẹla ọlẹ kọ pwoku, ka ju ka ẹpwụ nya eje ọlala ọtụka nya Ohe.—Ala iHiburu 10:26, 27.

 Ilo nya ọhọbịrị ọtụka ka lụmẹ u-uhye nya ọngọlẹ kọ họọ myị́. Ọ-chụ pwokwita, Adịrahụ iDevidi da yẹkẹẹ: “Ịhọbịrị nyam myị̀ birim hịkẹ-hịkẹ lala enyi, olo nyaa la tẹ̀mẹjẹ kịlam-kịla lọkpakpa.” (Eje Ọnyịịla 38:4) Ma ịBayịbụụ ya ẹhị ọrịrịị-rịrị ọlẹ hahị: “Angị họ ang onyobyi ā tụ hi ụgbẹyị onyobyi nyaa deeji, kị pẹhi irya ịtịpyọ nyaa ịnyịnyị mẹ. Ị jahị kpata nyà wẹ ẹga nya Amkpaa mẹ, ọ ka yẹ ahyẹẹrwẹrwẹ nyaa.”—Ayịsaya 55:7.