Ọwẹwẹ nya ỊBayịbụụ

 Ohe ka jẹ́-ẹ yẹ ang myị́ ang wuu bala họ ang ẹ-ẹga myị́ ẹga kọ chụ. (Etu 15:3; Ala iHiburu 4:13) Ma ịBayịbụụ á ya nyori Ohe nyị juwa ẹ-ẹga myị́ ẹga lee ẹ-ẹpwụ nya ang myị́ ang wuu ka. Ma ọkọkọ nya ọọwa, ịBayịbụụ mẹjẹ nyori ọ la ẹga ookpokpo ọlẹ koo ji.

•   Abwụma nya Ohe: Ohe ri olegu ịnyị. (ỊJọn 4:24) Angịnyị ehe á jẹ́-ẹ yọọ ka. (ỊJọn 1:18) Ọyị ọyẹyẹ a-arụrụ ịlẹpwụ nya ịBayịbụụ ịlẹ ká Ohe mẹ ịlọmwụ jẹ angịnyị, kaa chabwọ nyori Ohe nyị juwa ẹ-ẹga ookpokpo. ỊBayịbụụ á ya nyori nyị juwa ẹ-ẹga myị́ ẹga ụka ọlẹlẹhẹ lẹka.—Ayịsaya 6:1, 2; Ọwụrụụ-wụrụ 4:2, 3, 8.

•   Ẹga ọlẹ ká Ohe ji: Epwoohe Ohe à ji lẹ. ỊBayịbụụ ya nyori Ohe nyị ‘kụ epwoohe.’ (1 Ịdịrịhụ 8:30) IBayibuu ya ẹla nya ụka ọhẹ ọlẹ ká alegu-ẹrụ “kele ka tuguru ẹ-ẹga nya” iJihova. a Ọwẹ mẹjẹ nyori Ohe la ẹgẹhẹ ọlẹ kọ kaa ji datị.—IJobu 1:6.

Kori ká Ohe á ji ẹga myị́ ẹga ka, ọ ka jẹ́-ẹ kpahị jum?

 Ee. Ohe kaa kpahị ju ọngọngọọng. Nanana nyori iJihova juwa e-epwoohe, ọ kaa yẹ angịnyị ilodehe ịlẹ kị tịtọ nyọka họ ẹla kpọọ ịpyọ. Ọ tị kaa daa ụbwọ. (1 Ịdịrịhụ 8:39; 2 Ego Ogbegbe 16:9) Kụ ẹhị yẹ lẹẹ jaabwọ ọlẹ ká iJihova kaa bwu mẹjẹ nyori ọ kpahị ju anchẹ nyamwụ wẹẹ:

•   Ụka ká raabwọ: IJihova ka jẹ́-ẹ wo abwọ ọrịrị nyang jaabwọ kọ wẹẹ kpehe bwu ọnụ nyang bwaa.—2 Ego Ogbegbe 18:31.

•   Ụka ká la ọkịlẹtụ ọ-kpụ enyi: “Amkpaa ju angị la ọkịlẹtụ ọ-kpụ enyi chwẹẹ,ọọ chị angịlẹ ká ahị ọdahile gwaa myị da.”—Eje Ọnyịịla 34:18.

•   Ụka ká baba nya ọngọ ka kpang ụgbẹyị: IJihova “ka mẹjẹng ụgbẹyị ọlẹ ká ka bwu, [Ọ] ka jung irya bala ọ-kpẹhị rịrịng.—Eje Ọnyịịla 32:8.

Ịnịịkịla u-uhye nya ẹga ká Ohe ji

 Ọnọọkịla: Eje Ọnyịịla 139:8 mẹjẹ nyori Ohe juwa ẹ-ẹga myị́ ẹga nyọlẹ kọ yẹkẹẹ: “Ḿ wule ka epwoohe, à juwa ụ-ụwa! Ḿ nọnọ e-ejegu, à tị ka juwa ịnyịnyị!”

 Ẹlịlẹhị: Ụpwụ ịgọgọ ọwẹ á ya ẹla nya ẹga ọlẹ ká Ohe ji ka. Omyi ẹla nya eje ọwẹ wẹẹ mẹjẹ nyori ẹgẹgẹhẹ á lụrụ kpoye nya Ohe ọ-ka pwụ́ ma uya hahị ka ịnyị.