Ọwẹwẹ nya ịBayịbụụ

 ỊBayịbụụ-ụ́ gu ẹnyị nya ẹnyị ọbịrịị-bịrị kpụrụrụ ka. Ma ẹga lụmẹ-lụmẹ ẹ-ẹpwụ nya ịBayịbụụ mẹjẹ́ẹhị jaabwọ ká Ohe yẹ ọhịhị nya ọngịnyị ehe, tụ́ ịnya ọnyị ọlẹpwụ.

 Ọhịhị ri āhị bwu ẹga nya Ohe ịnyị. (Ọmwụ Ọdada 9:6; Eje Ọnyịịla 36:9) Ọhịhị nya angịnyị ehe wuu, tụ́ ịnya ọnyị ọlẹpwụ kọ Ohe ẹhị. Lẹ kori ká ọngịnyị á mamachịng nwụ ọnyị ọlẹ kị kpa ẹ-ẹpwụ aalẹ, ọọwa-á datị hi ọngịnyị ehe ọlam ọnwụnwụ ka.

 Ohe da ala Isirẹlụ ehile yẹkẹẹ: “Ó-ri ká alẹng ịhyẹ-ẹ́ juwa ma uya, kị mịla ọnyang ọlẹnyị nmoo kpụ kọ chị ọnyị ma, ká ang ọkịla ọhẹ dala ọwẹ-ẹ́ họọ ka aalẹ, ọngọ họọ ang kpangga ka jwo ijwo ha ọrụmwụ jaabwọ myị abwọ kọ há ọrụmwụ, ká angịleje-é tịtị myị jwoo. Ma, ang ọkịla-á họọ ba ọọwa u-uhye aalẹ, akama ọyẹyẹ chajị nya ọọwa ka ri ọ-ya ọhịhị kwiwa nya ọhịhị.”—Ehe Ọkpụkpụ 21:22, 23. a

•  Ụka oyina ọhịhị nya ọngịnyị ehe à tị́ dọmwụ?

•  Ohe ka jẹ́-ẹ hịnyọhi ha ọngọlẹ kọ bịrị ẹnyị ụka ọhẹ lẹ?

•  Ọ tịpyọ nyọka bịrị ẹnyị kori ká ọnyị ọọwa ọmama á ka ye ọhịhị nya ịnịna lee ịnya ọnyị myị́?

 Ụka oyina ọhịhị nya ọngịnyị ehe à tị́ dọmwụ?

 Ụka kị kpẹnyị nya ọngịnyị bwaa ọhịhị nyamwụ à dọmwụ ẹ-ẹhị nya Ohe lẹ. Ohe mẹjẹ ẹ-ẹpwụ nya Omyi Ẹla nyamwụ nyori ọnyị ọlẹpwụ nyị ri ọngịnyị ehe ọlẹ kọ datị hi ịnịna. Ahị kụ ẹhị yẹ ọ-chụ pwokwita ịhyẹ ịlẹ kị mẹjẹ nyori ẹhị ọlẹ ká Ohe kaa kpa yẹ ọngịnyị ehe ọlẹ kị ma kpá, ọ kaa kpa yẹ ọnyị ọlẹpwụ ịnyịnyị lẹ wẹẹ.

•   Olegu ịgọgọ kpa Adịrahụ iDevidi byi Ohe yẹkẹẹ: “À yẹm ene kịị mam.” (Eje Ọnyịịla 139:16) Ohe yẹ iDevidi lala ọngịnyị ehe ene kịị dọmwụ mọọ.

•   Ohe jẹ́ nyori ọwa nyị ja ya ụkụrwọ ọtụka-ọtụka ha ọlọmwụ iJeremaya ene kịị dọmwụ mọọ. Ohe byoo yẹkẹẹ: “Ene-ene kịị jẹnyị nyang lẹ, m̀ jẹng, ene ká ịnang ka mang lẹ, m̀ chịng ịgọ ha ịlọm, chụng nyọka ri ọlọmwụ ha ẹpwụma datị-datị.”—IJeremaya 1:5.

•   Ọngọ họ utoji iLuku, ko ri ọngọhẹ nya angị da ịBayịbụụ chabwọ nya ọnyị onyeewe bala ọnyị ọlẹpwụ la omyi ẹla ookpokpo.—ILuku 1:41; 2:12, 16.

 Ohe ka jẹ́-ẹ hịnyọhi ha ọngọlẹ kọ bịrị ẹnyị ụka ọhẹ lẹ?

 Ohe ka jẹ́-ẹ hịnyọhi ha angịlẹ kị bịrị ẹnyị ụka ọhẹ lẹ myị́. Kori kị kaa yẹ ọhịhị jaabwọ ká Ohe kaa yẹ ọhịhị lẹ aalẹ, ọkịlẹtụ-ụ́ chịla kọ ka laa eje kaka. “Amkpaa ri ọlahyẹẹrwẹrwa bala ọlọnahị . . . Jaabwọ ká ọmwẹnụ-ụtụrụ ji hwẹẹẹ hi ọmwẹnụ-obyi-ì wẹẹ, ịnyịnyị-ịnyịnyị ọ tụ ịhọbịrị nyahị rụ hwẹẹẹ hiihi lẹ.” b (Eje Ọnyịịla 103:8-12) IJihova ka hịnyọhi ha ọng myị́ ọng ọlẹ wuu kọ yẹda bwu ẹpwụ nya ịhọbịrị nyamwụ inyogo, tụ́ angịlẹ kị bịrị ẹnyị ụka ọhẹ lẹ.—Eje Ọnyịịla 86:5.

 Ọ tịpyọ nyọka bịrị ẹnyị kori ká ọnyị ọọwa ọmama á ka ye ọhịhị nya ịnịna lee ịnya ọnyị myị́?

 La ẹla ọlẹ ká ịBayịbụụ ya u-uhye nya ọnyị ọlẹpwụ i-irya, ó ka pwoku nya ọngịnyị ọ-ka bịrị ẹnyị kori ká ọnyị ọọwa ọmama á ka ya ẹdụrụ ha ịnịna myị́ lee kori ká ọnyị ọọwa á ka jụ ẹdụrụ myị́ ị-ịlahị ka.

 Ma kori ká ẹla ọkpịraka ọhẹ-ẹ́ tị họ ụka kị wẹẹ ka ma ọnyị, kị tị la ẹlẹlẹhẹ ka họ dala ọ-ka chụ ọngọlẹ kọ ka chịda bwu ẹpwụ nya ịnịna bala ọnyị ka tị bẹẹ? Ụka ọlịịwẹ, ị la eje ọwẹ ka chị lịlaa u-uhye nya ọngọlẹ kị ka maga nyọka chịda.