Ohe Họ Ang Ịhịhị Ịdatị-datị Bwula ọhẹ ọ-Yẹ ka Ọkịla?
Ọwẹwẹ nya ỊBayịbụụ
Ehe. ỊBayịbụụ ya gede-gede nyori Ohe Oluhye nya-à họ angịnyị ehe bala “ụma” nya iyo bala ekeji ịdatị-ịdatị lẹ. a (Ọmwụ Ọdada 1:12, 21, 25, 27; Ọwụrụụ-wụrụ 4:11) Ọ ya nyori angịnyị ehe wuu nyị bwu ẹga nya Adam bala Iivu, adahị bala ịnahị nya ọgbanyẹ. (Ọmwụ Ọdada 3:20; 4:1) ỊBayịbụụ-ụ́ myị ọnụ ju ọmẹjẹ nyori Ohe họ ang ịhịhị ịdatị-datị bwula ọhẹ ọ-yẹ ka ọkịla ka. Ma ịBayịbụụ á pwa ju ẹla nya angị chị ang ehe ọlẹ kị ya nyori ọ-yẹda nyị kaa ji u-ugbinyịrọ nya ang ọdịhụ ụma ọnyị myị́ ọnyị ka.
Ohe họ ang ịhịhị ịdatị-datị bwula ọhẹ ọ-yẹ ka ọkịla?
Angịlẹ kị myị ọnụ nyori Ohe Oluhye họ ang ịhịhị ịdatị-ịdatị bwula ọhẹ ọ-yẹ ka ọkịla lirya ịdatị-ịdatị u-uhye nya abwọlẹ kọ bwu họ ịnyị. Jaabwọ ká ụpwụ nya Encyclopædia Britannica ya, angịhyẹ myị nyori “ang ịhịhị ọ-yẹ abwụma da ri ụgbẹyị ọhẹ ọlẹ ká Ohe Oluhye kaa bwu kpẹhị rịrị odehe ọlẹ.”
Angịhyẹ myị nyori:
Ang ịhịhị wuu bwu ẹga nya ugbiyegu ookpokpo ọlẹ kọ hịhị lụka ọlụrụ tataata.
Ang ọhịhị ụma ọhẹ ka jẹ́-ẹ yẹda ka ụma ọkịla gbanggbang myị́.
Ohe Oluhye lụbwọ ẹ-ẹpwụ nya ọyẹda ọwẹ wuu.
ỊBayịbụụ myị ọnụ ju nyori Ohe họ ang ịhịhị bwula ọhẹ ọ-yẹ ka ọkịla?
Angị mẹjẹ nyori ang ọhịhị ọhẹ yẹ ka ọkịla wẹẹ ya nyori oja nya abwọlẹ ká Ohe bwu họ ang ọlụpwụ nya Ọmwụ Ọdada á la kpẹẹkpẹẹ ka. Ma, iJisọsị ya ẹla rụ́ ụpwụ nya Ọmwụ Ọdada nyori ọ la kpẹẹkpẹẹ. (Ọmwụ Ọdada 1:26, 27; 2:18-24; ịMatiyu 19:4-6) ỊBayịbụụ ya nyori ene kọọ wẹ odehe, iJisọsị nyị juwa e-epwoohe bala Ohe Oluhye bala ọ-dọọ ụbwọ họ “Ang myị́ ang . . . wuu”. (ỊJọn 1:3) Lẹẹlẹ, ọmẹjẹ nyori Ohe họ ang ịdatị-datị bwula ọhẹ ọ-yẹ ka ọkịla á myị ọnụ ju ẹla ọlẹpwụ nya ịBayịbụụ ka.
Ekeji bala iyo ọ-jẹ-ẹ́ yẹda chajị nyọka jẹ́-ẹ hịhị ẹ-ẹga ọlẹ kị ji ri ang ẹjẹẹ ọlẹ kọ mẹjẹ nyori ang ọhịhị ọhẹ kaa yẹ ka ọkịla?
ỊBayịbụụ-ụ́ ya ụma ịmanyị ịlẹ ká ang ọhịhị ọnyọnyọọnyị ka la ka. Ọ́ tị pwa ju nyori iyo bala ekeji ụma ịdatị-datị ịlẹ ká Ohe Oluhye họ kaa yẹda ụka kị juwa kpa nwà lee ọ-yẹ ba ọhịhị ọla ẹga onyeewe ka. Ọyẹda ọwẹ á mẹjẹ nyori ọhịhị onyeewe wẹ ka ji ka.
a ỊBayịbụụ kpa omyi ẹla ọlẹ kọ ri “ụma” ya ẹla, ọlẹ ká etu nyamwụ ju ẹpwụ gụ omyi ẹla nya “abwụma” ọlẹ ká angị chị angị chị ang ehe kaa kpa ya ẹla. Ụka lụmẹ-lụmẹ, ang ọlẹ ká angị chị ang ehe kaa wụrụ nya abwụma nya ọhịhị onyeewe ri ọdatị pyịnyẹng ọlẹ kọ kaa ji ẹga nya abwụma nya ang ọdịhụ ụma ookpokpo ịnyị, jaabwọ kị kpa omyi ẹla ọwẹ ya ẹla ụ-ụpwu nya Ọmwụ Ọdada.
Ịlẹ ka Háng Ịnyịnyị Myị́
ẸLA ỌMẸJẸ NYA ỊBAYỊBỤỤ I-JU APYOBWUNA
Ị Họ Uhye-ọgba Bala Odehe Họ Ịnyị?
Angịhyẹ á wo etu nya ẹla ọlẹ ká ịBayịbụụ ya u-uhye nya ọmwụ ọdada nya odehe ka, angịkịla kaa ya nya ujwo nya-à ri lẹ. Ahị ka jẹ́-ẹ dahịhile ẹla ọlẹ ká ịBayịbụụ ya?
U-UHYE NYAHỊ
Du Ẹrụ Nyọka Jung Ụga
Kụ ẹhị yẹ ịtọ ẹla u-uhye nya ịBayịbụụ lawụlẹ, lee jẹ́ ang gụ ọọwa u-uhye nya Alibeenu nya iJihova.