Ọmayẹ ọhẹ ọlẹ ká angịhyẹ họ mẹjẹ nyori iru nya anjwo ikolobya bala ịyẹẹnọ ịla America kaa raabwọ, ma ẹhya nya angịlẹ kị kaa raabwọ à kaa họ ịnyi ẹnẹnẹẹnụ lẹ. Ịwẹẹ ọdada á juwa ka, angịhyẹ nyaa ka juwa me irya myị́ nyori: ‘Abwọ ọrịrị tị́ ri ang ọ-da ịnyịrọ chaa ịnyị lee ọ tị́ gụ ọọwa?’

•  Ịyẹ à tị́ ri abwọ ọrịrị?

•  Ohe kaa ke ụrụ?

•  U-uhye nya ẹlịyẹ m tị́ ka jẹ́-ẹ raabwọ?

•  Ẹla ọlẹ ká aliko nyang ya

 Abwọ ọrịrị ri ẹla oyaya ọlam bala Ọngọlẹ kọ họ ang wuu. Kụ irya nya etu nya ẹlẹwẹ wẹẹ! IJihova gụ angịnyị ehe ụ-ụgbẹyị ọnyị myị́ ọnyị, ma “ọ́ dọmwụ lụrụ la, hiihi ahị angịnyị ehe kpong-kpong ka!” (Ụkụrwọ nya Alẹrụ 17:27) ỊBayịbụụ dọmwụ byihi ẹla ọkpịpyọ-kpịpyọ ọlẹ: “Ó ri kanụ tụ ịlọnụ ju Ohe Oluhye chwẹẹ aalẹ, Ohe Oluhye tịtị ka tụ junu chwẹẹ ịnyịnyị.”—IJemsi 4:8.

 Ányị a tị́ ka bwu tụ́ ju Ohe chwẹẹ?

•   Ụgbẹyị ọhẹ ri o-bwula abwọ ọrịrị—ịnyị a kaa bwu ya ẹla ta Ohe lẹ.

•   Ọkịla ri ịBayịbụụ ọwawa—ịnyị Ohe à kaa bwu “ya ẹla” tang lẹ.

 Ẹla oyaya tawụlẹ bwula abwọ ọrịrị bala ịBayịbụụ ọwawa ọwẹ ka dang ụbwọ ri oligu nya Ohe yẹẹyẹẹ.

 “Ẹla o-ya ta iJihova, Agụgụ à ri iwe ọtụka ọlẹ ká ọngịnyị ehe la gụgụ wuu lẹ.”—Jeremy.

 “Ẹla olirya nyam o-ya je iJihova ẹ-ẹpwụ nya abwọ ọrịrị kaa tụm jwoo chwẹẹ gụ ọwọwa.”—Miranda.

 Kori ká myị nyori Ohe ji, lee ọ-kaa raabwọ họọ wẹwẹ, ọ ka lang ujwo nyọka myị nyori Ohe nyị kaa ke ụrụ ịnyịlẹhị myị́. Ma, ịBayịbụụ wụrụ iJihova nya Ọngọ “kaa wo abwọ ọrịrị.” (Eje Ọnyịịla 65:2) Ọ dọmwụ jung ọhụ nyọka “kpa imahị omeme [nyang] wuu kịla Ohe Oluhye.” Ịyẹ tị́ du? ‘Chajị Ọngọ họ ọbaba nyang wụụ hang myị́, Ohe Oluhye ayidang à ri lẹ,’ ọ kpahị jung.—1 iPita 5:7.

 Kụ irya ju ẹla ọlẹ: À kaa ya ẹla bala aligu ịlịkẹjẹ nyang hyaahyaa? À ka jẹ́-ẹ họ ịnyị bala Ohe ịnyịnyị. Ya ẹla balọọ ẹ-ẹpwụ nya abwọ ọrịrị, wụrwọọ ẹnyị nyamwụ, ko ri iJihova. (Eje Ọnyịịla 86:5-7; 88:9) ỊBayịbụụ dọmwụ juhi ọhụ nyọka “raabwọ ha Ohe Oluhye ụka myị́ ụka wuu.”—1 Ala ịTẹsalonika 5:17.

 “Abwọ ọrịrị ri ẹla oyaya bala Adam olepwoohe. M̀ kaa ya ẹla myị́ ẹla ọlẹpwụ ọkịlẹtụ nyam joo ẹ-ẹpwụ nya abwọ ọrịrị.”—Moises.

 “M̀ kaa ya ẹla ikpori-kpori ju iJihova, jaabwọ kam kaa ya ta adam bala ịnam bala aligu ịlịkẹjẹ nyam.”—Karen.

 ỊBayịbụụ yẹkẹẹ: “Ẹ-ẹpwụ nya ang myị́ ang wuu, anụ́-ụ juwa raabwọ ha Ohe Oluhye bala o-juwa bịlọọ bịlẹ la obe ojiji, kanụ juwa gu ang ị-banụ ba wuu ẹnyị ya je Ohe Oluhye la abwọ ọrịrị ọọwa mẹ.”—Ala iFilipayị 4:6.

 Ọọwa ri à ka jẹ́-ẹ raabwọ u-uhye nya akama nyang? Ee! ỊBayịbụụ dọmwụ yẹkẹẹ: “Pẹ hi akama nyang ha Amkpaa mẹ, Ọ ka ma uya yẹng dada.”—Eje Ọnyịịla 55:22.

 Ma, ẹ-ẹla nya akama nyang kem a ka ya ẹ-ẹpwụ nya abwọ ọrịrị nyang ka. Ọyẹẹnọ ọhẹ kị wụrụ nya Chantelle yẹkẹẹ: “Ó ka ri igu oriri ọlam kori ká ụbwọ ọdada kem m kaa bịlẹ iJihova ka. Ọ chịla ká obe ojiji à ka jene, ká ang ịlẹ kam ka ji Ohe obe chajị nyaa ka la chẹẹ ịnyịnyị.”

 Kụ irya ju ẹla ọlẹ: Ang iyina ọ-ọhịhị nyang à tị́ myịng lẹhị? À ka jẹ́-ẹ kụ irya nya ang ịta ịhyẹ ịlẹ ká ka jẹ́-ẹ ji iJihova obe chajị nyaa alẹ?

 “Ang ọ-pyịnyẹng lala ịfụlawa ọhụ́hị dọmwụ ka jẹ́-ẹ guhi gbịla nyọka raabwọ ji iJihova obe.”—Anita.

 “Kụ irya nya ịngịhyẹ ọlẹ ká iJihova họ ọlẹ kọ myịng lẹhị bala ụpa nya ụpwụ ịgọgọ ọhẹ ọlẹ kọ gung ọ-ọkịlẹtụ, ká ji iJihova obe chajị nyamwụ.”—Brian.